ប្រែសម្រួល : កញ្ញាដាលីស (ដេល្លីម៉េល) ៖ បេឡារូសបាននិយាយកាលពីថ្ងៃសុក្រថា គ្រូបង្ហាត់មកពីកងកម្លាំងទាហានស៊ីឈ្នួលរុស្ស៊ី Wagner កំពុងបណ្តុះបណ្តាលកងទ័ពរបស់ខ្លួន បន្ទាប់ពីមានភាពមិនច្បាស់លាស់ជាច្រើនសប្តាហ៍អំពីអនាគតរបស់ក្រុមនេះនៅក្រោយការបះបោរបរាជ័យនៅក្នុងប្រទេសរុស្ស៊ី។
ការបះបោររយៈពេលខ្លីត្រូវបានបញ្ចប់ដោយកិច្ចព្រមព្រៀងមួយ ដែលក្រោមនោះអ្នកប្រយុទ្ធ Wagner មួយចំនួននិងមេដឹកនាំមាត់ដាចរបស់ពួកគេគឺ លោក យេវហ្គេនី ព្រីហ្គោហ្ស៊ីន (Yevgeny Prigozhin) ត្រូវបានសន្មត់ថានឹងផ្លាស់ទៅប្រទេសបេឡារូស។
ប៉ុន្តែប្រធានាធិបតីបេឡារូស លោក អាឡិចសាន់ឌ័រ លូកាសេនកូ (Alexander Lukashenko) បានបង្កឱ្យមានការសង្ស័យលើកិច្ចព្រមព្រៀងនេះ នៅពេលដែលលោកបាននិយាយកាលពីដើមខែនេះថា គ្មានអ្នកប្រយុទ្ធ Wagner ណាម្នាក់បានផ្លាស់ទៅប្រទេសនេះនៅឡើយទេ។
ក្រសួងការពារជាតិបេឡារូសហាក់បញ្ជាក់កាលពីថ្ងៃសុក្រថា យ៉ាងហោចណាស់មានអ្នកប្រយុទ្ធ Wagner មួយចំនួនបានមកដល់ហើយ។
ក្រសួងការពារជាតិបាននិយាយនៅក្នុងសេចក្តីថ្លែងការណ៍មួយថា “នៅជិតតំបន់អាស៊ីប៉ូវីឈី (Asipovichy) អង្គភាពនៃកងទ័ពការពារទឹកដីកំពុងទទួលការបណ្តុះបណ្តាល”។
ក្រសួងបាននិយាយថា “អ្នកប្រយុទ្ធនៃក្រុមហ៊ុនយោធាឯកជន Wagner កំពុងដើរតួជាគ្រូបង្រៀននៅក្នុងវិន័យយោធាមួយចំនួន”។
ក្រោយមកក្រសួងបានបន្ថែមថា ខ្លួននិង Wagner បានដាក់ចេញ “ផែនទីបង្ហាញផ្លូវសម្រាប់រយៈពេលខ្លីមួយស្តីពីការបណ្តុះបណ្តាលនិងចែករំលែកបទពិសោធន៍” រវាងអង្គភាពផ្សេងៗ៕
ក្រសួងការពារជាតិបេឡារូសហាក់បញ្ជាក់កាលពីថ្ងៃសុក្រថា យ៉ាងហោចណាស់មានអ្នកប្រយុទ្ធ Wagner មួយចំនួនបានមកដល់ហើយ និងថែមទាំងបង្ហាញរូបភាពទាហានWagnerបង្ហាត់ទាហានបេឡារូសផង