ប្រែសម្រួលៈបំណង(ស្ត្រេតថែមស៍)៖ ប្រធានាធិបតីកូរ៉េខាងត្បូងលោក យូន ស៊ុកយ៉ូលកាលពីថ្ងៃសៅរ៍បានសន្យា«ពង្រីកទំហំ»ជំនួយមនុស្សធម៌និងជំនួយយោធាមិនសម្លាប់មនុស្សដល់អ៊ុយក្រែនក្រោយជំនួបកំពូលមួយជាមួយសមភាគីអ៊ុយក្រែន លោកវ៉ូឡូឌីមៀ ហ្សេឡេនស្គីនៅទីក្រុងគៀវ។
លោកបាននិយាយនៅក្នុងសន្និសីទកាសែតមួយថា« រដ្ឋាភិបាលទីក្រុងសេអ៊ូលនឹងពង្រីកការផ្គត់ផ្គង់ជំនួយកាលពីឆ្នាំមុននៅពេលយើងបានផ្តល់សម្ភារដូចជាមួកដែកនិងអាវការពារគ្រាប់»។ជំនួយមនុស្សធម៌នឹងត្រូវបង្កើនដល់១៥០លានដុល្លារនៅឆ្នាំ២០២៣ ដោយកើនពីចំនួន១០០លានកាលពីឆ្នាំមុន។
លោកយូនបានបន្តថា រដ្ឋាភិបាលទីក្រុងសេអ៊ូលក៏សហការជាមួយរដ្ឋាភិបាលទីក្រុងគៀវក្នុងគំរោងដូចជា សំណង់ហេដ្ឋារចនាសម្ពន្ធ ក្រោមការគាំទ្រដោយឥណទានសម្បទានពីកូរ៉េខាងត្បូង។
ចំណែកលោកហ្សេឡេនស្គីបាននិយាយថា «យើងកំពុងពិភាក្សាអ្វីគ្រប់យ៉ាងដែលសំខាន់សំរាប់ការរស់នៅធម្មតានិងសុវត្ថិភាពរបស់ប្រជាជន។អរគុណលោកយូនចំពោះការគាំទ្រដ៏មានឥទ្ធិពល»។
លោកយូនបានទៅធ្វើទស្សនកិច្ចអ៊ុយក្រែនដោយមិនបានប្រកាសប្រាប់ជាមុន។លោកបានទៅដល់ទីនោះក្រោយ ចូលរួមកិច្ចប្រជុំកំពូលរបស់អង្គការណាតូនៅលីទុយអានី និងបានទៅទស្សនកិច្ចប៉ូឡូញកន្លែងដែលលោកបានសម្តែងសាមគ្គីភាពជាមួយអ៊ុយក្រែននិងស្វែងរកវិធីដើម្បីគាំទ្រការប្រយុទ្ធរបស់អ៊ុយក្រែនប្រឆាំងនឹងការឈ្លានពានរបស់រុស្ស៊ី។
មុននេះក្នុងថ្ងៃសៅរ៍ លោកយូនបានទៅទស្សនាកន្លែងសម្លាប់រង្គាលនៅក្រុងប៊ូឆា ក្បែររដ្ឋធានីគៀវ។លោកក៏បានទៅកាន់ទីក្រុងអៀពីន ជាតំបន់ដែលអាគារជនស៊ីវិលរស់នៅរងការវាយប្រហារខ្លាំងដោយកាំជ្រួចរុស្ស៊ី។
លោកហ្សេឡេនស្គីក៏បានសម្តែងការចូលរួមរំលែកទុក្ខដល់ក្រុមគ្រួសារជនរងគ្រោះពីទឹកជំនន់ដ៏ហិនហោចនៅកូរ៉េខាងត្បូង ដែលរហូតដល់ពេលនេះបានសម្លាប់មនុស្សជាង៣០នាក់៕
ប្រធានាធិបតីកូរ៉េខាងត្បូង និងភរិយា ទៅទស្សនាកន្លែងសម្លាប់រង្គាលដោយកងកម្លាំងរុស្ស៊ីនៅក្រុងប៊ូឆា និងក្រុងអៀពីន មុនមកជួបហ្សេឡេនស្គីនៅទីក្រុងគៀវ