ប្រែសម្រួល : កញ្ញាដាលីស (ដេល្លីម៉េល) ៖ រដ្ឋមន្ត្រីហិរញ្ញវត្ថុ និងប្រធានធនាគារកណ្តាល G20 បានបើកកិច្ចពិភាក្សាកាលពីថ្ងៃចន្ទទី១៧កក្កដាស្តីពីកិច្ចព្រមព្រៀងរៀបចំរចនាសម្ពន្ធបំណុល កំណែទម្រង់ធនាគារពហុភាគី និងហិរញ្ញវត្ថុដើម្បីដោះស្រាយការប្រែប្រួលអាកាសធាតុ ខណៈពួកគេមានគោលបំណងជំរុញសេដ្ឋកិច្ចពិភពលោកដែលកំពុងធ្លាក់ចុះ។
រដ្ឋមន្ត្រីហិរញ្ញវត្ថុឥណ្ឌា លោកស្រី នៀម៉ាឡា ស៊ីថារ៉ាម៉ាន់ (Nirmala Sitharaman) ដែលជាប្រធាននិងជាម្ចាស់ផ្ទះនៃកិច្ចប្រជុំកំពូលនៅទីក្រុងគន្ធីរណាហ្គា (Gandhinagar) បានចាប់ផ្តើមដោយប្រាប់ក្រុមមេដឹកនាំហិរញ្ញវត្ថុអំពី “ទំនួលខុសត្រូវដែលយើងមាន…ដើម្បីដឹកនាំសេដ្ឋកិច្ចពិភពលោកឆ្ពោះទៅរកកំណើនដ៏រឹងមាំ និរន្តរភាព តុល្យភាព និងរួមបញ្ចូលគ្នា”។
ថ្លែងកាន់អ្នកសារព័ត៌មានជាមួយរដ្ឋមន្ត្រីក្រសួងរតនាគារអាម៉េរិក លោកស្រី ចាណេត យែលឡិន (Janet Yellen) លោកស្រីស៊ីថារ៉ាម៉ាន់បាននិយាយនៅព្រឹកថ្ងៃចន្ទថា គន្លឹះលើរបៀបវារៈរយៈពេលពីរថ្ងៃនេះនឹងជា “ការសម្របសម្រួលការមូលមតិគ្នាចំពោះបញ្ហាដែលមិនអាចដោះស្រាយបាន ដែលទាក់ទងនឹងការកើនឡើងនៃបំណុល”។
លោកស្រីស៊ីថារ៉ាម៉ាន់បានបន្ថែមថា កិច្ចពិភាក្សាក៏នឹងផ្តោតលើ “បញ្ហាសកលសំខាន់ៗផងដែរ ដូចជាការពង្រឹងធនាគារអភិវឌ្ឍន៍ពហុភាគី និងការធ្វើសកម្មភាពអាកាសធាតុដែលមានការសម្របសម្រួល”។
លោកស្រីយែលឡិនបាននិយាយថា “ពិភពលោកកំពុងសម្លឹងមើល G20 ដើម្បីធ្វើឱ្យមានវឌ្ឍនភាពលើបញ្ហាប្រឈមសំខាន់ៗដូចជាការប្រែប្រួលអាកាសធាតុ និងជំងឺរាតត្បាត ជាផ្នែកនៃការងាររបស់យើងដើម្បីពង្រឹងសេដ្ឋកិច្ចពិភពលោក”។
លោកស្រីក៏បានលើកឡើងពីការងារដើម្បីដោះស្រាយវិបត្តិបំណុលក្នុងចំណោមប្រទេសក្រីក្របំផុតរបស់ពិភពលោកផងដែរ ដោយកត់សម្គាល់ពីវឌ្ឍនភាពនៃការរៀបចំរចនាសម្ពន្ធបំណុលនៅក្នុងប្រទេសសំប៊ី ដែលលោកស្រីបានពិភាក្សានៅពេលធ្វើទស្សនកិច្ចនៅទីក្រុងប៉េកាំងក្នុងខែនេះ៕
លោលស្រីយែលឡិន (ឆ្វេង) ស្តាប់លោកស្រីស៊ីថារ៉ាម៉ាន់ ក្នុងអំឡុងសន្និសីទកាសែតក្នុងកិច្ចប្រជុំរដ្ឋមន្ត្រីហិរញ្ញវត្ថុនិងប្រធានធនាគារកណ្តាល G20