ប្រែសម្រួល : កញ្ញាដាលីស (ដេល្លីម៉េល) ៖ ប្រធានាធិបតីតួកគីលោក រីស៊ីប ថាយយីប អឺដូហ្គាន (Recep Tayyip Erdogan) បានមកដល់ទីក្រុងដូហា (Doha) ប្រទេសកាតាកាលពីថ្ងៃអង្គារ ជាជើងទីពីរនៃដំណើរទស្សនកិច្ចនៅតំបន់ឈូងសមុទ្រពែក្ស បន្ទាប់ពីឈប់សំចតនៅក្នុងប្រទេសអារ៉ាប៊ីសាអូឌីត កន្លែងដែលគាត់បានយល់ព្រមលើកិច្ចព្រមព្រៀងផ្តល់ដ្រូនដល់ព្រះរាជាណាចក្រនេះ។
លោកអឺដូហ្គាន ដែលឈ្នះឆ្នោតអាណត្តិប្រាំឆ្នាំមួយផ្សេងទៀតក្នុងការបោះឆ្នោតខែឧសភា កំពុងស្វែងរកការគាំទ្រសម្រាប់សេដ្ឋកិច្ចដែលកំពុងធ្លាក់ចុះរបស់ប្រទេសតួកគី។
មេដឹកនាំតួកគីបានមកដល់កាលពីល្ងាចថ្ងៃអង្គារជាមួយនឹងភរិយារបស់គាត់ លោកស្រី អេមីន អឺដូហ្គាន (Emine Erdogan) នៅក្នុងរដ្ឋធានីនៃសម្ពន្ធមិត្តសំខាន់របស់ខ្លួនគឺកាតា មុនពេលកិច្ចប្រជុំជាមួយព្រះអង្គម្ចាស់ ថាមីម ប៊ីន ហាម៉ាដ អាល់ ថានី (Tamim bin Hamad Al-Thani) នេះបើយោងតាមប្រព័ន្ធផ្សព្វផ្សាយរដ្ឋកាតា។
ទីភ្នាក់ងារសារព័ត៌មានផ្លូវការរបស់អារ៉ាប៊ីសាអូឌីត ( SPA) បាននិយាយថា ការឈប់សំចត់នៅអារ៉ាប៊ីសាអូឌីតមុននេះបានឃើញការចុះហត្ថលេខាលើកិច្ចសន្យាជាច្រើន រួមទាំងកិច្ចព្រមព្រៀងដ្រូនជាមួយក្រុមហ៊ុនឯកជន Baykar ក្នុងអំឡុងកិច្ចប្រជុំរវាងលោកអឺដូហ្គាននិងព្រះអង្គម្ចាស់អារ៉ាប៊ីសាអូឌីត ម៉ូហាម៉េដ ប៊ីន សាល់ម៉ាន់ (Mohammed bin Salman) នៅទីក្រុងកំពង់ផែសមុទ្រក្រហម ជេដដា (Jeddah) កាលពីថ្ងៃចន្ទ។
លោក ហាលុក បាយរាក់តា (Haluk Bayraktar) នាយកប្រតិបត្តិនៃក្រុមហ៊ុនផលិតដ្រូនដែលគ្រប់គ្រងដោយកូនប្រសារម្នាក់របស់លោកអឺដូហ្គាន បានហៅកិច្ចព្រមព្រៀងនេះថាជា “កិច្ចសន្យានាំចេញផ្នែកការពារជាតិនិងអាកាសចរណ៍ដ៏ធំបំផុតនៅក្នុងប្រវត្តិសាស្ត្រនៃសាធារណរដ្ឋតួកគី”។
តម្លៃនៃកិច្ចព្រមព្រៀងនេះមិនត្រូវបានបង្ហាញជាសាធារណៈទេ។
SPA បានរាយការណ៍ថា បន្ទាប់ពីបានចូលរួមវេទិកាធុរកិច្ចអារ៉ាប៊ីសាអូឌីតនិងតួកគីនៅទីក្រុងជេដដាកាលពីថ្ងៃចន្ទ លោកអឺដូហ្គាននិងព្រះអង្គម្ចាស់ម៉ូហាម៉េដបានពិភាក្សាអំពី “ទស្សនវិស័យសម្រាប់កិច្ចសហប្រតិបត្តិការរួមគ្នា” នៅក្នុងកិច្ចប្រជុំរបស់ពួកគាត់។
SPA និយាយថា មេដឹកនាំទាំងពីរបានចុះហត្ថលេខាលើកិច្ចព្រមព្រៀងសហប្រតិបត្តិការក្នុងវិស័យថាមពល ការវិនិយោគផ្ទាល់ ការការពារជាតិ និងប្រព័ន្ធផ្សព្វផ្សាយ។
SPA បានបន្ថែមថាមន្ត្រីអារ៉ាប៊ីសាអូឌីតក៏បានចុះហត្ថលេខាលើ “កិច្ចសន្យាពីរជាមួយក្រុមហ៊ុនតួកគី Baykar ផងដែរ”។
ដ្រូនផលិតដោយក្រុមហ៊ុន Baykar ត្រូវបានប្រើប្រាស់នៅក្នុងប្រទេសអាហ្សែបៃហ្សង់ លីប៊ី និងអ៊ុយក្រែន។
រដ្ឋមន្ត្រីការពារជាតិអារ៉ាប៊ីសាអូឌីត ព្រះអង្គម្ចាស់ ខាលីដ ប៊ីន សាល់ម៉ាន់ (Khalid bin Salman) បានបន្ទូលកាលពីថ្ងៃអង្គារថា អារ៉ាប៊ីសាអូឌីតនឹងទិញដ្រូនក្នុងគោលបំណងបង្កើនការត្រៀមខ្លួនរបស់កងកម្លាំងប្រដាប់អាវុធរបស់ព្រះរាជាណាចក្រនេះនិងពង្រឹងសមត្ថភាពការពារជាតិ និងផលិតកម្មរបស់ខ្លួន៕
លោកអឺដូហ្គាន (ឆ្វេង) និងព្រះអង្គម្ចាស់ប៊ីនសាល់ម៉ាន់របស់អារ៉ាប៊ីសាអូឌីត