ប្រែសម្រួលៈបំណង(បាងកកប៉ុស្តិ៍)៖ថៃបានស្វាគមន៍ភ្ញៀវទេសចរបរទេស១៥លាននាក់នៅប្រាំពីរខែដំបូងក្នុងឆ្នាំ២០២៣ នេះបើតាមអ្នកនាំពាក្យរងរបស់រដ្ឋាភិបាលលោកស្រីរ៉ាឆាដា ឌីអេចណាឌីរ៉េក(Rachada Dhnadirek)។
កាលពីថ្ងៃព្រហស្បតិ៍ លោកស្រីរ៉ាឆាដា បាននិយាយថា វិសម្សកាលរដូវក្តៅនៅបណ្តាប្រទេសនៅអឌ្ឍគោលខាងជើងបានចូលរួមដល់កំណើនចំនួនទេសចរបរទេសមកកាន់ប្រទេសថៃ។ក្នុងអំឡុងពេលនេះ អាជ្ញាធរទេសចរណ៍ថៃ បានជំរុញយុទ្ធនាការទេសចរណ៍ថ្មីរបស់ខ្លួនហៅថា “Amazing Thailand Health and Wellness: New Chapters New Experience” ដែលមានបំណងជំរុញទេសចរណ៍សុខុមាលភាពនិងសុខភាពជាមួយនឹងកម្លាំងទិញខ្ពស់។
សំរាប់ទេសចរណ៍ក្នុងស្រុក អាជ្ញាធរទេសចរណ៍ថៃ(TAT)មានផែនការជំរុញការបង្កើតភាពទាក់ទាញតាមមូលដ្ឋាននៅគ្រប់តំបន់ដើម្បីបែងចែកចំណូលចេញពីទេសចរណ៍ទៅដល់ប្រជាជនមូលដ្ឋាននៅទូទាំងប្រទេសថៃ។លោកស្រីរ៉ាឆាដា បាននិយាយថា TATរំពឹងថា ថៃនឹងទទួលចំណូលបានបីទ្រីលានបាតពីវិស័យទេសចរណ៍នៅឆ្នាំនេះ ក្នុងនេះ១,៩២ទ្រីលានបាតបានមកពីទេសចរអន្តរជាតិនិង១,០៨បានមកពីទេសចរក្នុងស្រុក។
ក្រៅពីល្បីខាងទេសចរណ៍នៅក្រោយសម័យកូវីដ១៩ ថៃក៏ជាកន្លែងពេញនិយមមួយសំរាប់ការថតខ្សែភាពយន្តនៅឆ្នាំនេះ។នាយកដ្ឋាននៃការិយាល័យខ្សែភាពយន្តថៃបាននិយាយកាលពីថ្ងៃពុធថា ២៤៦ផលិតកម្មមកពី៣២ប្រទេសកំពុងប្រើប្រាស់ថៃជា ទីតាំងថតខ្សែភាពយន្តនៅពាក់កណ្តាលឆ្នាំ២០២៣។ក្នុងរយៈពេលដូចគ្នាកាលពីឆ្នាំមុន មានខ្សែភាពយន្តបរទេសត្រឹមតែ១៤៣រឿងបានថតនៅថៃ។
យោងតាមនាយកដ្ឋាន អាម៉េរិកចំណាយថតភាពយន្តច្រើនជាងគេនៅថៃ គឺ៥១៩លានបាតលើ១៤គំរោង បន្ទាប់មកចិន៣៤៩លានបាតលើ១៧គំរោង ហុងកុង៣២៨លានបាតលើ១១គំរោង អង់គ្លេស២៦១លានបាតលើ១៩គំរោងនិងអាល្លឺម៉ង់២០១លានបាតលើ១១គំរោង៕
អ្នកដំណើរទៅដល់អាកាសយានដ្ឋានសុវណ្ណភុមិក្នុងក្រុងបាងកក