ប្រែសម្រួលៈបំណង(VnExpress)៖នាយករដ្ឋមន្ត្រីវៀតណាមលោក ផាំ មិញ ជិញ និងសមភាគីម៉ាឡេស៊ី លោកអាន់វ៉ា អ៊ីប្រាហ៊ីម កាលពីថ្ងៃសុក្របានទៅទស្សនវិថីហាងសៀវភៅក្នុងទីក្រុងហាណូយនិងរីករាយនឹងការទទួលទានកាហ្វេពេលព្រឹកនៅទីនោះ។
លោកជិញនិងភរិយា បានអញ្ជើញលោក អាន់វ៉ា និងភរិយាទៅទស្សនាវិថីសៀវភៅនេះក្នុងអំឡុងពេលមេដឹកនាំម៉ាឡេស៊ីធ្វើទស្សនកិច្ចផ្លូវរដ្ឋនៅវៀតណាមរយៈពេលពីរថ្ងៃ។លោកអាន់វ៉ាបានមកទស្សនាវៀតណាមជាលើកដំបូងកាលពីថ្ងៃព្រហស្បតិ៍ចាប់តាំងពីលោកចូលកាន់តំណែងនាយករដ្ឋមន្ត្រីម៉ាឡេស៊ីកាលពីខែធ្នូឆ្នាំ២០២២។
ក្រៅពីទទួលទានកាហ្វេរួមគ្នា លោកជិញបានបង្ហាញប្រភេទកាហ្វេដាំនៅតំបន់ខ្ពង់រាប ក្នុងខេត្តឡាំ ដុងដល់លោកវ៉ាន់វ៉ានិងមេដឹកនាំទាំងពីរក៏បានពិភាក្សាគ្នាអំពីវប្បធម៌អានសៀវភៅរបស់វៀតណាម។
លោកជិញបានជូនសៀវភៅបីក្បាលដល់លោកអាន់វ៉ា រួមមានសៀវភៅពីរក្បាលនិយាយអំពីលោកប្រធានាធិបតីហូជីមិញ និងមួយក្បាលនិយាយអំពីការអភិវឌ្ឍន៍សង្គមនិយមនៅវៀតណាម។
សូមបញ្ជាក់ថា ក្នុងជំនួបកាលពីថ្ងៃព្រហស្បតិ៍ នាយករដ្ឋមន្ត្រីវៀតណាមនិងម៉ាឡេស៊ី បានព្រមព្រៀងបង្កើនទំហំពាណិជ្ជកម្មទ្វេភាគីពី១៥ពាន់លានអោយដល់១៨ពាន់លានដុល្លារនៅត្រឹមឆ្នាំ២០២៥ ក្នុងចំណោមកិច្ចសហការលើវិស័យផ្សេងៗ។
មេដឹកនាំទាំងពីរក៏សម្តែងការពេញចិត្តចំពោះការអភិវឌ្ឍន៍ទំនាក់ទំនងទ្វេភាគី ជាពិសេសចាប់តាំងពីពេលបង្កើតភាពជាដៃគូយុទ្ធសាស្ត្រនៅឆ្នាំ២០១៥។ពួកលោកក៏បានរំលេចអំពីទំនាក់ទំនងនយោបាយ ការទូត ពាណិជ្ជកម្មនិងការវិនិយោគ ព្រមទាំងការរើបរើឡើងវិញចំពោះវិស័យដែលបានរងផលប៉ះពាល់ពីវិធានការគ្រប់គ្រងកូវីដ១៩ ដូចជាការងារ ទេសចរណ៍ ការបណ្តុះបណ្តាលនិងការសិក្សាអប់រំ។
នាយករដ្ឋមន្ត្រីវៀតណាម បានបញ្ជាក់អះអាងឡើងវិញថាវៀតណាមត្រៀមខ្លួនធ្វើជាប្រភពផ្គត់ផ្គង់អង្ករដ៏មានស្ថិរភាពមួយដល់ម៉ាឡេស៊ី និងបានសុំម៉ាឡេស៊ីអោយជួយវៀតណាមអភិវឌ្ឍឧស្សាហកម្មអាហារហាឡាល់ ហើយគ្រោងនឹងចុះហត្ថលេខាលើកិច្ចការនេះក្នុងពេលឆាប់ៗ។
ភាគីទាំងពីក៏បានយល់ព្រមបង្កើនភាពជាដៃគូក្នុងវិស័យការពារជាតិនិងសន្តិសុខ ហើយជំរុញការចុះហត្ថលេខាលើឯកសារពាក់ព័ន្ធ ពិភាក្សាលើការជំរុញកិច្ចសហការក្នុងឧស្សាហកម្មយោធានិងការបណ្តុះបណ្តាល បង្កើតយន្តការសហការមួយរវាងកងទ័ពជើងទឹក អាកាស និងកងឆ្មាំសមុទ្រនៃប្រទេសទាំងពីរ ហើយធ្វើការរួមគ្នាប្រឆាំងភេរវកម្មនិងបទឧក្រិដ្ឋឆ្លងដែន…៕