ប្រែសម្រួល : កញ្ញាដាលីស (ដេល្លីម៉េល) ៖ មនុស្សមួយចំនួនបានចំណាយប្រាក់រាប់រយដុល្លារដើម្បីអាចនិយាយថាពួកគេបានស្ថិតនៅក្នុងកីឡាដ្ឋានសម្រាប់ការបង្ហាញខ្លួនលើកដំបូងរបស់ លីអូនែល ម៉េសស៊ី សម្រាប់ Inter Miami ។ អ្នកខ្លះបានចំណាយប្រាក់រាប់ពាន់សម្រាប់កៅអីរបស់ពួកគេ។
ម្ចាស់ក្លិបបានចំណាយជាង ១០០ លានដុល្លារ ដើម្បីមានឱកាសបែបនេះតែរហូតមកទល់ពេលនេះ វាហាក់ដូចជាលុយបានចាយវាយយ៉ាងល្អមិនខ្ជះខ្ជាយទេ។
ម៉េសស៊ីបានបើកឆាកទាំងយប់ជាមួយក្លិបថ្មីរបស់គាត់ដោយផ្តល់នូវការលេងដែលមិនអាចបំភ្លេចបាន។ ជើងឆ្វេងដ៏អស្ចារ្យរបស់គាត់បានបញ្ជូនបាល់ហ្វ្រីឃីកចូលកែងខាងឆ្វេងនៃសំណាញ់ទីនៅនាទីទី ៩៤ កាលពីយប់ថ្ងៃសុក្រ ដែលជួយឱ្យ Inter Miami ឈ្នះ ២-១ លើក្លិបម៉ិកស៊ិក Cruz Azul ក្នុងការប្រកួត Legends Cup ។
ម៉េសស៊ីបាននិយាយក្នុងបទសម្ភាសន៍លើទីលានចំពេលកំពុងមានការអបអរក្រោយចប់ការប្រកួតថា “អ្វីដែលខ្ញុំបានឃើញគឺទី។ ខ្ញុំបានឃើញទី។ ខ្ញុំដឹងថាខ្ញុំត្រូវតែរកគ្រាប់បាល់ឱ្យបាន”។
គាត់បានធ្វើឱ្យវាស្តាប់ទៅងាយស្រួលណាស់និងធ្វើឱ្យការស៊ុតមើលទៅក៏ងាយស្រួលណាស់ដែរ។
កីឡាករ ម្ចាស់ពាន Ballon d’Or ប្រាំពីរសម័យនិងម្ចាស់ជើងឯក World Cup មួយសម័យរូបនេះ បានទាត់បាល់រំលងពីលើជញ្ជាំងខ្សែការពាររបស់ Cruz Azul បួននាក់សម្រាប់គ្រាប់បាល់ជ័យជម្នះនេះ ដែលជាគ្រាដ៏អស្ចារ្យបំផុតនៅក្នុងប្រវត្តិសាស្ត្ររបស់ Inter Miami ។ កាំជ្រួចបានបាញ់ទៅលើមេឃ ហើយការលេងបានបន្តប្រហែលមួយនាទីមុនពេលអាជ្ញាកណ្តាលផ្លុំកញ្ចែបញ្ចប់៕
ម៉េសស៊ីស៊ុតហ្វ្រ៊ីឃីកចូលទីងាយៗនៅចុងម៉ោង ជួយឱ្យ Inter Miami ឈ្នះ Cruz Azul ក្នុងការប្រកួត Legends Cup
តារាល្បីៗមានវត្តមានក្នុងការប្រកួតបើកឆាកដំបូងរបស់ក្លិប Inter Miami