ប្រែសម្រួល : កញ្ញាដាលីស (ដេល្លីម៉េល) ៖ កងទ័ពបាននិយាយថា មនុស្សប្រាំបួននាក់ រួមទាំងទាហានបួននាក់ ត្រូវបានសម្លាប់កាលពីល្ងាចថ្ងៃអាទិត្យនៅពេលដែលយន្តហោះស៊ីវិលមួយបានធ្លាក់នៅក្នុងប្រទេសស៊ូដង់ដោយសារតែហេតុផល “បច្ចេកទេស” ខណៈដែលសង្គ្រាមនៅក្នុងប្រទេសអាហ្វ្រិកខាងកើតនេះបានឈានចូលដល់ថ្ងៃទី ១០០ របស់ខ្លួន។
ការប្រយុទ្ធគ្នាបានធ្វើឱ្យមនុស្សរាប់លាននាក់ជាប់នៅក្នុងផ្ទះរបស់ពួកគេនិងខ្លះទៀតគ្មានទឹកប្រើប្រាស់ ជាពិសេសនៅតំបន់ជាយរដ្ឋធានីកាទុំ ជាទីដែលអ្នកស្រុកកំពុងអំពាវនាវរកអំណោយស្បៀងអាហារដើម្បីជួយពួកគេឱ្យរស់រានមានជីវិត។
នៅក្នុងសង្កាត់ដែលរងការបំផ្លិចបំផ្លាញដោយសង្គ្រាមនៃទីក្រុងកាទុំ លោក អាប់បាស ម៉ូហាម៉េដ បាប៊ីកឺ (Abbas Mohammed Babiker) បាននិយាយថា គាត់និងក្រុមគ្រួសាររបស់គាត់អាចញ៉ាំអាហារបានតែម្តងគត់ក្នុងមួយថ្ងៃ។ ឥឡូវនេះ ទោះបីជារឿងនោះនៅតែមានមន្ទិលក៏ដោយ ក៏ប៉ុន្តែកាលពីថ្ងៃអាទិត្យ ក្រុមគាំទ្រពលរដ្ឋបានចេញការអំពាវនាវជាបន្ទាន់សម្រាប់ការបរិច្ចាគដើម្បីជួយមនុស្សដូចជាគាត់។
លោកបាប៊ីកឺបាននិយាយពីភាគខាងជើងទីក្រុងកាទុំ កន្លែងដែលអ្នកស្រុកនិយាយថាយ៉ាងហោចណាស់មនុស្សម្នាក់ជាតន្ត្រីករក្នុងស្រុកបានស្លាប់ដោយសារភាពអត់ឃ្លានរួចហើយ យ៉ាងដូច្នេះថា “យើងមានអាហារគ្រប់គ្រាន់សម្រាប់តែពីរថ្ងៃទៀតប៉ុណ្ណោះ”។
នៅទីក្រុងផតស៊ូដង់ (Port Sudan) នៅឆ្នេរសមុទ្រភាគខាងកើត ជាទីដែលរួចខ្លួនពីសង្គ្រាម កងទ័ពបាននិយាយថា កុមារម្នាក់បានរួចរស់ជីវិតពីការធ្លាក់យន្តហោះ Antonov ដែលបានសម្លាប់មនុស្សប្រាំបួននាក់ផ្សេងទៀត។ អាកាសយានដ្ឋានក្រុងផតស៊ូដង់គឺជាអាកាសយានដ្ឋានតែមួយគត់ដែលនៅតែដំណើរការនៅក្នុងប្រទេសនេះ ដោយសារតែជម្លោះ។
ចាប់តាំងពីថ្ងៃទី ១៥ ខែមេសា ការប្រយុទ្ធគ្នារវាងកងទ័ពដែលដឹកនាំដោយលោក អាប់ឌែល ហ្វាតតា អាល់បួហាន (Abdel Fattah al-Burhan) និងកងកម្លាំងគាំទ្ររហ័ស (RSF) ដែលដឹកនាំដោយលោក ម៉ូហាម៉េដ ហាមដាន់ ដាកឡូ (Mohamed Hamdan Daglo) បានសម្លាប់មនុស្សជាង ៣.៩០០ នាក់ នេះបើយោងតាមចំនួនស្លាប់ចុងក្រោយពីគម្រោងទិន្នន័យទីតាំងជម្លោះប្រដាប់អាវុធនិងព្រឹត្តិការណ៍ (ACLED)។
អង្គការអន្តោប្រវេសន៍អន្តរជាតិបាននិយាយថា មនុស្សជាង ២,៦ លាននាក់ត្រូវបានផ្លាស់ទីលំនៅក្នុងស្រុក ដែលភាគច្រើនគឺមកពីទីក្រុងកាទុំ។
មនុស្សរាប់ពាន់នាក់ ដែលនៅសេសសល់ក្នុងរដ្ឋធានី ជាពិសេសនៅភាគខាងជើងក្រុងកាទុំ ត្រូវជាប់គាំង ដោយគ្មានទឹក ដោយហេតុថាស្ថានីយទឹកក្នុងតំបន់ត្រូវបានខូចខាតនៅពេលចាប់ផ្តើមសង្គ្រាម៕
សង្គ្រាមនៅក្នុងប្រទេសអាហ្វ្រិកខាងកើតនេះបានឈានចូលដល់ថ្ងៃទី១០០