ប្រែសម្រួល : កញ្ញាដាលីស (VnExpress) ៖ ក្រុមហ៊ុននាំចេញអង្កររបស់វៀតណាមអាចដំឡើងថ្លៃនិងចុះហត្ថលេខាលើកិច្ចសន្យារយៈពេលវែងជាមួយអ្នកទិញ ដោយហេតុថាឥឡូវនេះឥណ្ឌា ដែលជាអ្នកផ្គត់ផ្គង់ធំបំផុតរបស់ពិភពលោក បានបញ្ជាឱ្យផ្អាកការនាំចេញអង្ករសពាក់កណ្តាល។
រដ្ឋាភិបាលឥណ្ឌាកាលពីថ្ងៃទី ២០ ខែកក្កដាបានប្រកាសការហាមប្រាមលើការនាំចេញអង្ករ ខណៈតម្លៃអង្ករលក់រាយបានកើនឡើង ៣% ក្នុងរយៈពេលមួយខែ បន្ទាប់ពីភ្លៀងមូសុងខ្លាំងបានបង្កការខូចខាតយ៉ាងខ្លាំងដល់ដំណាំ។
យោងតាមក្រសួងកសិកម្មអាម៉េរិកបានឱ្យដឹងថា ឥណ្ឌានាំចេញអង្ករជាង ៤០ ភាគរយលើពិភពលោក ហើយអង្ករពណ៌ត្នោតនិងអង្ករបាក់មានប្រហែល ១០ លានតោននៃការនាំចេញអង្ករសរុបចំនួន ២២ លានតោនរបស់ឥណ្ឌាកាលពីឆ្នាំមុន។ ជាមួយនឹងការហាមឃាត់នេះចូលជាធរមាន អ្នកដឹងរឿងផ្ទៃក្នុងនៅលើពិភពលោកបានបង្កើនការព្រួយបារម្ភអំពីការឡើងថ្លៃម្ហូបអាហារ។
សាស្ត្រាចារ្យ វ៉ូ តុង សួន (Vo Tong Xuan) ជាអ្នកសេដ្ឋកិច្ចនិងជាអ្នកជំនាញខាងធ្វើស្រែ បាននិយាយថា ដោយមើលឃើញពីស្ថានភាពនេះ ឆមាសទីពីរនៃឆ្នាំនេះនឹងផ្តល់ឱកាសមាសសម្រាប់ការនាំចេញអង្កររបស់វៀតណាម។
ក្នុងឆមាសទីមួយនៃឆ្នាំនេះ តម្លៃនាំចេញអង្ករវៀតណាមជាមធ្យមបានកើនឡើង ១១ ភាគរយស្មើនឹង ៥៣៩ ដុល្លារក្នុងមួយតោន។
បន្ទាប់ពីការហាមឃាត់នេះ លោកសួនគិតថាតម្លៃអាចខ្ពស់រហូតដល់ទៅ ៦០០ ដុល្លារក្នុងមួយតោនជាមធ្យម ហើយពូជអង្ករគុណភាពខ្ពស់អាចលក់បាន ៧០០ ដុល្លារក្នុងមួយតោន។
លោកសាស្ត្រាចារ្យបាននិយាយថា ការហាមឃាត់ការនាំចេញភ្លាមៗរបស់ឥណ្ឌានឹង “បង្កើតផលប៉ះពាល់ធំ” លើបណ្តាប្រទេសនាំចូល ដោយសារតែពួកគេមិនអាចស្វែងរកការនាំចូលអង្ករជំនួសពីប្រទេសដែលមានការផ្គត់ផ្គង់តិចតួច។
ដូច្នេះ វៀតណាមនិងថៃនឹងក្លាយជាគោលដៅបន្ទាប់របស់ពួកគេ។ លោកបានព្យាករថា ចំណូលពីការនាំចេញរបស់វៀតណាមក្នុងឆមាសទីពីរឆ្នាំនេះអាចនឹងកើនឡើងយ៉ាងខ្លាំង។
ថ្លែងទៅកាន់ VnExpress នាយកក្រុមហ៊ុននាំចេញអង្ករនៅទីក្រុងកាន់ថឺ (Can Tho) បាននិយាយថា ក្នុងខែកក្កដា ការបញ្ជាទិញនាំចេញអង្កររបស់ក្រុមហ៊ុនបានកើនឡើង ២០% ធៀបនឹងខែមុន និង ៣០% បើធៀបនឹងរយៈពេលដូចគ្នាកាលពីឆ្នាំមុន។
លោកនាយកបាននិយាយថា “ពីរថ្ងៃបន្ទាប់ពីព័ត៌មានថាឥណ្ឌាបានហាមឃាត់ការនាំចេញអង្ករ អ្នកទិញជាច្រើនបានស្នើសុំឱ្យយើងចុះហត្ថលេខាលើកិច្ចសន្យារយៈពេលវែងរបស់ពួកគេដើម្បីធានាការផ្គត់ផ្គង់ ប៉ុន្តែយើងនៅតែពិចារណាលើការផ្តល់ជូននេះសិន”។
លោកបានបន្ថែមថា ក្នុងឆមាសទី១ឆ្នាំនេះ តម្លៃនាំចេញអង្កររបស់ក្រុមហ៊ុនបានកើនឡើង ២២ ភាគរយធៀបនឹងរយៈពេលដូចគ្នាកាលពីឆ្នាំមុន។
ក្រោយការហាមឃាត់ លោកបានព្យាករថា តម្លៃនាំចេញអាចនឹងកើនឡើង ៣០-៤០% បើធៀបនឹងឆ្នាំមុន។
សមាគមអ្នកនាំចេញអង្ករនិយាយថា អង្ករគឺជាអាហារចម្បងសម្រាប់មនុស្សជាង ៣ ពាន់លាននាក់ ហើយជិត ៩០% នៃដំណាំដែលប្រើទឹកត្រូវបានផលិតនៅក្នុងទ្វីបអាស៊ី ជាកន្លែងដែលលំនាំអាកាសធាតុអែលនីណូ (El Nino) តែងនាំមកនូវទឹកភ្លៀងទាប។ តម្លៃអង្ករជាសកលកំពុងកើនឡើងដល់កម្រិតខ្ពស់បំផុតក្នុងរយៈពេល ១១ ឆ្នាំ។
យោងតាមទិន្នន័យផ្លូវការ ការនាំចេញអង្កររបស់ឥណ្ឌាបានឈានដល់កំណត់ត្រា ២២,២ លានតោនក្នុងឆ្នាំ ២០២២ គឺច្រើនជាងការនាំចេញអង្កររួមគ្នារបស់អ្នកនាំចេញអង្ករធំបំផុតបន្ទាប់របស់ពិភពលោកចំនួនបួនទៀតគឺ ថៃ វៀតណាម ប៉ាគីស្ថាន និងសហរដ្ឋអាម៉េរិក។ ឥណ្ឌានាំចេញអង្ករទៅកាន់ជាង ១៤០ ប្រទេស៕
អង្ករវៀតណាមកំពុងទទួលការបញ្ជាទិញច្រើនឡើង