ប្រែសម្រួលៈបំណង(ដេល្លីម៉េល)៖រលកកំដៅបង្កភ្លើងព្រៃជាច្រើនកន្លែងនៅទូទាំងប្រទេសអាល់ហ្សេរី និងសម្លាប់មនុស្សជាង៣០នាក់ ហើយបង្ខំអោយមនុស្សរាប់ពាន់នាក់ភៀសខ្លួន។នៅពេលសីតុណ្ហភាពឡើងដល់៤៨អង្សាសេនៅផ្នែកខ្លះនៃប្រទេសអាហ្វ្រិកខាងជើងមួយនេះ គេសង្កេតឃើញមានភ្លើងព្រៃ៩៧នៅ១៦ខេត្ត ដោយអណ្តាតភ្លើងកាន់តែរាលដាលដោយសារខ្យល់ខ្លាំង។
ក្រសួងមហាផ្ទៃបាននិយាយថា ភ្លើងព្រៃបានសម្លាប់មនុស្សយ៉ាងតិច៣៤នាក់ រួមមានទាហាន១០នាក់ នៅពេលភ្លើងឆេះរាលចូលតំបន់មនុស្សរស់នៅ។មនុស្ស២៦នាក់ទៀតបានរងរបួសនិងប្រមាណ១.៥០០នាក់ត្រូវបានជម្លៀសចេញពីខេត្តបីបួននៅខាងកើតរដ្ឋធានីអាល់ហ្ស៊ែរ។
ប្រធានាធិបតី អាប់ដែលម៉ាតជីត តេបបូន(Abdelmadjid Tebboune )កាលពីថ្ងៃចន្ទបានសម្តែងការចូលរួមរំលែកទុក្ខគ្រួសារជនរងគ្រោះដោយអគ្គិភ័យនេះ។
ក្រសួងបានបញ្ជាក់ថា អ្នកពន្លត់អគ្គិភ័យ៧.៥០០នាក់និងរថយន្តបាញ់ទឹកចំនួន៣៥០បានចូលករួមក្នុងប្រតិបត្តិការប្រយុទ្ធនឹងភ្លើងព្រៃដែលកំពុងឆេះនៅក្នុងខេត្តចំនួនប្រាំមួយ ។
សូមបញ្ជាក់ថា ភ្លើងព្រៃតែងកើតមាននៅក្នុងព្រៃនិងវាលស្រែនៅអាល់ហ្សេរីនារដូវក្តៅ តែឆ្នាំនេះវាហាក់មានសភាពខ្លាំងឡើងដោយសាររលកកំដៅមួយដែលកំពុងវាយប្រហារប្រទេសជាច្រើននៅតំបន់សមុទ្រម៉េឌីទែរ៉ាណេ។
ដោយសាររលកកំដៅនេះ នៅទុយនេស៊ីកាលពីថ្ងៃចន្ទសីតុណ្ហភាពបានឡើងដល់ជិត៥០អង្សាសេនិងបង្កភ្លើងឆេះព្រៃនៅក្បែរព្រំដែនអាល់ហ្សេរី៕