ប្រែសម្រួល : កញ្ញាដាលីស (ដេល្លីម៉េល) ៖ ទាហានម៉ារីនម៉ិកស៊ិក ដែលកំពុងបំពេញកាតព្វកិច្ចគយ បាននិយាយកាលពីថ្ងៃពុធថា ពួកគេបានរកឃើញកុងតឺន័រដឹកជញ្ជូនមួយ ដែលផ្ទុកដបទឹកសុទ្ធចំនួន ៧.២០០ ដបដែលមានស្លាកជាតិអាល់កុលសម្រាប់ផលិតស្រា ប៉ុន្តែតាមពិតវាមានផ្ទុកសារធាតុមេតំហ្វេតាមីនរាវ។
ការដឹកជញ្ជូនថ្នាំញៀនដ៏ធំនេះត្រូវបានរកឃើញនៅលើកប៉ាល់ដោតទង់ជាតិលីបេរីយ៉ានៅកំពង់ផែឆ្នេរប៉ាស៊ីហ្វិក ម៉ាន់ហ្សានីលឡូ (Manzanillo)។ កុងតឺន័រមានទិសដៅទៅប្រទេសអូស្ត្រាលី នេះបើយោងតាមឯកសារដឹកជញ្ជូន។
កងម៉ារីនបាននិយាយថា ការដឹកជញ្ជូននេះមានផ្ទុកនូវសារធាតុថ្នាំញៀនចំនួន ៩,៥ តោន ទោះបីជាទម្ងន់គ្រឿងញៀនស្ងួតមានតិចជាងនេះក៏ដោយ។
ដបទាំងនោះមានម៉ាកយីហោ Mezcal Social ហើយត្រូវបានសម្គាល់ថាជា “ធាតុផ្សំសម្រាប់ផលិតស្រា”។
មកទល់ពេលនេះ កងម៉ារីនម៉ិកស៊ិកបានរឹបអូសថ្នាំញៀនជាង ១២៤ តោននៅទូទាំងប្រទេស។
វាមិនមែនជាលើកទីមួយទេ ដែលក្រុមជួញដូរគ្រឿងញៀនម៉ិកស៊ិក ដែលគ្រប់គ្រងពាណិជ្ជកម្មអន្តរជាតិលើគ្រឿងញៀន បានព្យាយាមរត់ពន្ធគ្រឿងញៀនទៅកាន់ប្រទេសអូស្ត្រាលី ឬ ក្នុងទម្រង់វត្ថុរាវ។
ក្នុងឆ្នាំ ២០២២ មន្ត្រីក្នុងទីក្រុងហុងកុងបានរឹបអូសបានថ្នាំញៀនគ្រីស្តាល់តម្លៃ ៥,៩ លានដុល្លារ ដែលលាក់ទុកក្នុងកុងតឺន័រដឹកជញ្ជូនឧបករណ៍បំប្លែងអគ្គិសនី ពីម៉ិកស៊ិកឆ្ពោះទៅអូស្ត្រាលី។
ប៉ុន្មានថ្ងៃក្រោយមក ពួកគេបានរាយការណ៍ថាបានរកឃើញថ្នាំញៀនប្រភេទមេតំហ្វេតាមីនរាវ ២ តោនលាក់ទុកក្នុងដបដែលបិតស្លាកទឹកដូង ដែលបានមកពីម៉ិកស៊ិកតាមសមុទ្រ។ គ្រឿងញៀនដែលគេប៉ាន់ប្រមាណថាមានតម្លៃ ១៤០ លានដុល្លារនេះគឺជាការរឹបអូសថ្នាំញៀនដ៏ធំបំផុតនៅហុងកុង៕
កងម៉ារីនម៉ិកស៊ីករកឃើញថាដបទាំង ៧.២០០ ជាមេតំហ្វេតាមីនរាវ កាលពីថ្ងៃទី ២៦ កក្កដា ២០២៣