ប្រែសម្រួលៈបំណង(ដេល្លីម៉េល)៖ ក្រុមមេដឹកនាំយោធានៃប្រទេសនីហ្សេបានព្រមានប្រឆាំងនឹងអន្តរាគមន៍យោធាណាមួយនៅក្នុងប្រទេសនេះ នៅពេលពួកមេដឹកនាំអាហ្វ្រិកគ្រោងនឹងជួបប្រជុំគ្នានៅក្នុងរដ្ឋធានីរបស់នីហ្សេរីយ៉ា នាថ្ងៃអាទិត្យនេះសំរាប់ជំនួបកំពូលគ្រាអាសន្នមួយដើម្បីសំរេចចំណាត់វិធានការបន្ទាប់ត្រូវប្រកាន់យកដើម្បីដាក់សម្ពាធលើកងទ័ពនីហ្សេអោយស្តារសណ្តាប់ធ្នាប់តាមរដ្ឋធម្មនុញ្ញឡើងវិញ។
ប្រមុខរដ្ឋនៃសហគមន៍សេដ្ឋកិច្ចរបស់រដ្ឋអាហ្វ្រិកខាងលិច(ECOWAS)ដែលមានសមាជិក១៥ប្រទេស រួមជាមួយអង្គការ«សហភាពសេដ្ឋកិច្ចនិងរូបិយវត្ថុអាហ្វ្រិកខាងលិច»ដែលមានសមាជិកប្រាំបីប្រទេស អាចព្យួរសមាជិកភាពរបស់នីហ្សេចេញពីស្ថាប័នរបស់គេ កាត់ផ្តាច់ប្រទេសនេះចេញពីធនាគារកណ្តាលនិងទីផ្សារហិរញ្ញវត្ថុតំបន់ ព្រមទាំងបិទព្រំដែនថែមទៀត។
ប្រទេសឆាត ដែលនៅជាប់ព្រំដែនខាងកើតរបស់នីហ្សេនិងមិនជាសមាជិករបស់ស្ថាប័នទាំងពីរ តែត្រូវបានអញ្ជើញអោយចូលរួមជំនួបកំពូល ECOWAS ។
នីហ្សេជាប្រទេសក្រីក្របំផុតមួយនៅក្នុងលោក កន្លងមកបានទទួលជំនួយអភិវឌ្ឍន៍ផ្លូវការចំនួនជិត២ពាន់លាន នេះបើតាមធនាគារពិភពលោក។ប្រទេសនេះក៏ជាដៃគូសន្តិសុខរបស់អតីតមហាអំណាចអាណានិគមនបារាំង និងអាម៉េរិក ដោយប្រទេសលោកខាងលិចទាំងពីរនេះប្រើប្រទេសនីហ្សេជាមូលដ្ឋានមួយដើម្បីប្រយុទ្ធប្រឆាំងនឹងការបះបោរអ៊ីស្លាមនៅតំបន់សាហែលនៅអាហ្វ្រិកខាងលិចនិងខាងកើត។
ក្រុមមេដឹកនាំអាហ្វ្រិកខាងលិចក៏អាចពិចារណាជាលើកដំបូង អំពីអន្តរាគមន៍យោធាមួយដើម្បីនាំប្រធានាធិបតី ម៉ូហាម៉េដ បាហ្សួម ( Mohamed Bazoum)មកកាន់អំណាចវិញក្រោយយោធាធ្វើរដ្ឋប្រហារទម្លាក់លោក ហើយឧត្តមសេនីយ៍អាប់ឌូរ៉ាម៉ាន់ ជិននី ( Abdourahamane Tiani )បានប្រកាសខ្លួនឯងជាប្រមុខរដ្ឋថ្មីកាលពីថ្ងៃសុក្រ។
នៅមុនជំនួបកំពូល ពួកមេដឹកនាំយោធានីហ្សេកាលពីយប់ថ្ងៃសៅរ៍ បានព្រមានតាមបញ្ចក់ទូរទស្សន៍កុំអោយមានអន្តរាគមន៍យោធាណាមួយ។
អ្នកនាំពាក្យរបបយោធា បាននិយាយថា«កម្មវត្ថុនៃកិច្ចប្រជុំECOWASគឺអនុម័តផែនការឈ្លានពានមួយប្រឆាំងនីហ្សតាមរយៈអន្តរាគមន៍យោធាក្នុងពេលឆាប់ៗមួយដោយសហការជាមួយប្រទេសអាហ្វ្រិកដទៃទៀតដែលមិនជាសមាជិកECOWAS ព្រមទាំងប្រទេសលោកខាងលិចមួយចំនួន»។
«យើងសូមរំលឹកECOWASឬអ្នកផ្សងព្រេងផ្សេងណាមួយ អំពីការតាំងចិត្តការពារមាតុភូមិរបស់យើង»។
របបយោធានីហ្សេកាលពីយប់ថ្ងៃសៅរ៍ក៏បានចេញសេចក្តីថ្លែងការណ៍ទីពីរ ដោយអំពាវនាវប្រជាជនក្នុងរដ្ឋធានីនីម៉ាញ៉េ ចេញមកតាមដងវិថីចាប់ពីម៉ោង៧ព្រឹកថ្ងៃអាទិត្យដើម្បីប្រឆាំងនឹងECOWASហើយគាំទ្រក្រុមមេដឹកនាំយោធាថ្មី។
សហភាពអឺរ៉ុបនិងបារាំង បានកាត់ផ្តាច់ការគាំទ្រហិរញ្ញវត្ថុដល់នីហ្សេ ហើយអាម៉េរិកបានគំរាមធ្វើដូចគ្នា៕
ឧត្តមសេនីយ៍អាប់ឌូរ៉ាម៉ាន់ ជិននី (កណ្តាលខាងស្តាំ) ដឹកនាំធ្វើរដ្ឋប្រហារ ប្រកាសខ្លួនឯងជាប្រមុខរដ្ឋថ្មីរបស់នីហ្សេ និងព្រមានអន្តរាគមន៍ពីខាងក្រៅ