ដោយ: សុខសុភ័ណ្ឌ / កំពង់ស្ពឺ: បុរសជនជាតិចិនពីរនាក់ដែលព្យាយាមបើករថយន្ត ឆ្លងកាត់ខ្សែទឹក កំពុងហូរខ្លាំង លើកំណាត់ផ្លូវជាតិលេខ៤ ត្រង់ចំណុចស្ពានអូរគគី ស្ថិតក្នុងឃុំយាយម៉ៅពេជ្រនិល ហើយជាប់ផុងទៅមុខមិនរួចត្រូវបានកម្លាំងសមត្ថកិច្ច ជួយសង្គ្រោះឱ្យផុតពីគ្រោះថ្នាក់ ដោយជោគជ័យ នៅព្រឹកថ្ងៃទី៣០ ខែកក្កដា ឆ្នាំ២០២៣ ។
សមត្ថកិច្ច បានឱ្យដឹងថា ជនជាតិចិនទាំងពីរនាក់ បានធ្វើដំណើរតាមរថយន្ត មួយគ្រឿង ក្នុងទិសដៅពីទិសខាងលិចទៅខាងកើត មកដល់ចំណុចកើតហេតុបានព្យាយាមបើក ឆ្លងកំណាត់ផ្លូវដែលមានទឹកហូរកាត់ខ្លាំង បណ្តាលឱ្យរថយន្ត រលត់ជាប់ផុង នៅក្នុងខ្សែទឹក ដែលងាយរងគ្រោះថ្នាក់ ដល់អាយុជីវិត។
ដោយពិនិត្យឃើញស្ថានភាពដូច្នេះ កម្លាំងសមត្ថកិច្ច ដែលប្រចាំការត្រួតពិនិត្យ និងសម្រួលចរាចរណ៍ បានបើកប្រតិបត្តិការ ជួយសង្គ្រោះភ្លាមៗ ដើម្បីសង្គ្រោះមនុស្ស ដែលជាប់គាំង នៅក្នុងរថយន្តនោះ។ ដោយខ្សែទឹកហូរខ្លាំង ធ្វើឱ្យសមត្ថកិច្ចពិបាក ក្នុងការចូលទៅយកមនុស្ស តែទោះយ៉ាងណាក្តី ក្នុងប្រតិបត្តិការនោះ ទទួលបានជោគជ័យ ដោយសង្គ្រោះបានទាំងមនុស្ស និងរថយន្ត ចេញពីខ្សែទឹកជំនន់។
សូមបញ្ជាក់ថា នៅចំណុចកើតហេតុ ទឹកបានហក់ឡើងខ្លាំង ខណៈដែលភ្លៀង នៅតែបន្តធ្លាក់ជាប់ៗគ្នា ផ្លូវបានរងការខូចខាត ចរាចរណ៍នៃរថយន្តធំ ត្រូវបានកាត់ផ្តាច់ ទាំងស្រុង៕/V
