ឯកឧត្តមបណ្ឌិត ហ៊ុន ម៉ាណែត ធ្វើលិខិតថ្លែងអំណរគុណជូនចំពោះ ថ្នាក់ដឹកនាំគណៈកម្មា ធិការគណបក្ស និងគណៈកម្មាធិការសាខាគណបក្សប្រជាជនកម្ពុជា នៅក្រៅប្រទេស និងក្រុមការងារយុវជនគណបក្សប្រជាជនកម្ពុជា នៅក្រៅប្រទេស

ភ្នំពេញ: ឯកឧត្តមបណ្ឌិត ហ៊ុន ម៉ាណែត សមាជិកគណៈអចិន្ត្រៃយ៍ នៃគណៈកម្មាធិការកណ្ដាល និងជាប្រធានយុវជនគណបក្សថ្នាក់កណ្ដាល តាងនាមយុវជនគណបក្សប្រជាជនកម្ពុជាថ្នាក់កណ្ដាល និងក្រុមការងាររៀបចំអង្គការចាត់តាំងយុវជនគណបក្ស ប្រជាជនកម្ពុជានៅក្រៅប្រទេស និងក្នុងនាមខ្លួនឯកឧត្តមផ្ទាល់ សូមសម្តែងនូវការកោតសរសើរ វាយតម្លៃខ្ពស់ និងសេចក្តី ថ្លែងអំណរគុណដ៏ជ្រាលជ្រៅ និងស្មោះស្ម័គ្រ ជូនចំពោះបងប្អូន លោកពូ អ្នកមីង លោកយាយ លោកតា ទាំងអស់ ជា ថ្នាក់ដឹកនាំគណៈកម្មាធិការគណបក្ស គណៈកម្មាធិការសាខាគណបក្សប្រជាជនកម្ពុជា ក្រុមការងារយុវជនគណបក្ស ប្រជាជនកម្ពុជា បងប្អូនសមាជិក សមាជិកាគណបក្សប្រជាជនកម្ពុជា នៅតាមតំបន់និងបណ្តាប្រទេសនានាដែលកំពុង រស់នៅ និងស្នាក់នៅក្រៅប្រទេសទាំងអស់ ដែលបានលះបង់កម្លាំងកាយ កម្លាំងចិត្ត ពេលវេលា ប្រាជ្ញាស្មារតី ធនធាន សម្ភារៈ និងថវិកាផ្ទាល់ខ្លួន ចាប់តាំងពីការអំពាវនាវឱ្យមានការចូលរួមបោះឆ្នោតជ្រើសតាំងតំណាងរាស្ត្រ នីតិកាលទី៧ តាមរយៈការចេញវីដេអូឃ្លីប និងសារគាំទ្រជាបន្តបន្ទាប់ រហូតដល់នាំក្រុមគ្រួសារធ្វើដំណើរមកប្រទេសកម្ពុជាដោយ ផ្ទាល់ចូលរួមយុទ្ធនាការឃោសនាបោះឆ្នោត និងបងប្អូន លោកពូ អ្នកមីង លោកយាយ លោកតា មួយចំនួន បានធ្វើជា អ្នកសង្កេតការណ៍បោះឆ្នោត និងមួយចំនួនទៀតដែលមានសិទ្ធិបោះឆ្នោត ក៏បានចូលរួមបោះឆ្នោតកាលពីថ្ងៃទី២៣ ខែ កក្កដា ឆ្នាំ២០២៣ កន្លងទៅផងដែរ។

ឆ្លៀតក្នុងឱកាសនេះដែរ ឯកឧត្តមបណ្ឌិត ហ៊ុន ម៉ាណែត បានពាំនាំនូវការផ្តាំផ្ញើសាកសួរសុខទុក្ខដ៏ជ្រាលជ្រៅ សេចក្តីនឹករលឹក និងសេចក្ដីថ្លែងអំណរគុណពីសំណាក់សម្ដេចអគ្គមហាសនាបតីតេជោហ៊ុនសែន ប្រធានគណបក្សប្រជាជនកម្ពុជា និងសូមប្រសិទ្ធិពរជ័យជូនបងប្អូន លោកពូ អ្នកមីង លោកយាយ លោកតា – ថ្នាក់ដឹកនាំ សមាជិក សមាជិកា ទាំងអស់ ព្រមទាំងក្រុមគ្រួសារទាំងក្នុង និងក្រៅប្រទេស សូមប្រកបដោយពុទ្ធពរទាំងបួនប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ និងសូមបងប្អូនវិលត្រឡប់ទៅវិញប្រកបដោយសុខសុវត្ថិភាព៕ សរន / N