ប្រែសម្រួល : កញ្ញាដាលីស (The Drive) ៖ ឧទ្ធម្ភាគចក្រប្រយុទ្ធ AH-1Z Viper ថ្មីរបស់សហរដ្ឋអាម៉េរិកចំនួនពីរគ្រឿងដំបូងគេសម្រាប់សាធារណរដ្ឋឆែកត្រូវបានបញ្ជូនទៅដល់ប្រទេសនេះហើយ។ ការមកដល់របស់ពួកវាកើតឡើងខណៈដែលឧទ្ធម្ភាគចក្រប្រយុទ្ធ Mi-24/Mi-35 សម័យសូវៀតចាស់របស់សាធារណរដ្ឋឆែកគ្រោងនឹងចូលនិវត្តន៍ពីសេវាកម្មនៅខែកញ្ញា ដោយឧទ្ធម្ភាចក្របែបនេះចំនួនបួនគ្រឿងត្រូវបានបញ្ជូនទៅអ៊ុយក្រែនរួចហើយ ហើយនឹងបញ្ជូនទៅច្រើនគ្រឿងទៀត។
ការដឹកជញ្ជូនឧទ្ធម្ភាគចក្រ AH-1Z ក៏កើតឡើងផងដែរចំពេលមានការចាប់អារម្មណ៍ខ្លាំងឡើងលើឧទ្ធម្ភាគចក្រប្រយុទ្ធទំនើបក្នុងចំណោមសមាជិកអឺរ៉ុបខាងកើតរបស់អង្គការណាតូក្នុងការឆ្លើយតបទៅនឹងជម្លោះនៅអ៊ុយក្រែន ខណៈមានលទ្ធភាពនៃការបញ្ជូនឧទ្ធម្ភាគចក្រស៊េរី H-1 បន្ថែមទៀតទៅកាន់តំបន់នេះក្នុងរយៈពេលដ៏ខ្លីខាងមុខ។
យោងតាមក្រសួងការពារជាតិរបស់សាធារណរដ្ឋឆែក មូលដ្ឋានទ័ពឧទ្ធម្ភាគចក្រទី ២២ ដែលមានទីតាំងនៅតំបន់ណាមីស ណាត អូស្លាវ៉ូ( Náměšť nad Oslavou )ភាគអាគ្នេយ៍ប្រទេស បានទទួលឧទ្ធម្ភាគចក្រទាំងពីរកាលពីថ្ងៃទី ២៦ ខែកក្កដា។
នៅពាក់កណ្តាលខែកញ្ញា មូលដ្ឋាននេះនឹងទទួលបានឧទ្ធម្ភាគចក្រ Viper ពីរគ្រឿងបន្ថែមទៀត ហើយឧទ្ធម្ភាគចក្រ UH-1Y Venom ពីរគ្រឿងដំបូងក៏ត្រូវបានបញ្ជូនដោយសហរដ្ឋអាម៉េរិកផងដែរ។ សរុបមក កងកម្លាំងឧទ្ធម្ភាគចក្ររបស់កងទ័ពឆែកនឹងទទួលបានឧទ្ធម្ភាគចក្រស៊េរី H-1 ចំនួន ២០ គ្រឿង ដែល ១០ គ្រឿងជាម៉ូដែល AH-1Z និង ១០ គ្រឿងទៀតជាម៉ូដែល UH-1Y។ មីស៊ីលបាញ់ពីអាកាសទៅដី Hellfire និង APKWS គ្រាប់រ៉ុក្កែតមិនបញ្ជាទិស និងគ្រាប់សម្រាប់កាណុងនិងកាំភ្លើងយន្ត នឹងត្រូវបានផ្តល់ជូនផងដែរ។
ឧទ្ធម្ភាគចក្រ AH-1Z ទាំងពីរគ្រឿងត្រូវបានដឹកជញ្ជូនពីសហរដ្ឋអាម៉េរិកទៅកាន់សាធារណរដ្ឋឆែកតាមរយៈយន្តហោះដឹកទំនិញ C-17 Globemaster III ។ យោងតាមក្រសួងការពារជាតិឆែក អ្នកឯកទេសអាម៉េរិកមួយក្រុមធំក៏បានមកដល់ជាមួយឧទ្ធម្ភាគចក្រផងដែរ។ ដោយធ្វើការជាមួយបុគ្គលិកឆែក ពួកគេនឹងផ្គុំឧទ្ធម្ភាគចក្រ Viper ឡើងវិញ ហើយចាប់ផ្តើមហោះហើរពួកវាក្នុងរយៈពេលពីរសប្តាហ៍ខាងមុខ៕
ឧទ្ធម្ភាគចក្រ AH-1Z ទាំងពីរគ្រឿងត្រូវបានដឹកជញ្ជូនពីសហរដ្ឋអាម៉េរិកទៅកាន់សាធារណរដ្ឋឆែកតាមរយៈយន្តហោះដឹកទំនិញ C-17 Globemaster III