ប្រែសម្រួល : កញ្ញាដាលីស (ដេល្លីម៉េល) ៖ ក្រុមហ៊ុន ដែលពីមុនត្រូវគេស្គាល់ថា Twitter បានដកចេញស្លាកសញ្ញា X ភ្លឺភ្លឹបភ្លែតពីលើកំពូលទីស្នាក់ការកណ្តាលរបស់ខ្លួននៅក្រុងសាន់ហ្វ្រាន់ស៊ីស្កូកាលពីថ្ងៃចន្ទបន្ទាប់ពីក្រុមហ៊ុនបច្ចេកវិជ្ជា ដែលប្តូរម៉ាកថ្មីថ្មោងនេះ បានបង្កភាពច្របូកច្របល់ជាមួយមន្ត្រីទីក្រុងជុំវិញស្លាកសញ្ញាដ៏ចម្រូងចម្រាសនេះ។
X ដែលត្រូវបានដំឡើងនៅលើដំបូលការិយាល័យកណ្តាលរបស់ក្រុមហ៊ុនកាលពីសប្តាហ៍មុន គឺជាផ្នែកមួយនៃការប្រឹងប្រែងរបស់ម្ចាស់ គឺលោក អេឡុន ម៉ាស ដើម្បីប្តូរឈ្មោះក្រុមហ៊ុនយក្សបណ្តាញសង្គមពោរពេញដោយបញ្ហានេះ ទៅជាអក្សរទី ២៤ នៃអក្ខរក្រមអង់គ្លេស។
ប៉ុន្តែអ្នកស្រុកបានត្អូញត្អែរពីពន្លឺភ្លើងភ្លឺខ្លាំងពេកដែលបញ្ចេញពីស្លាកសញ្ញានៅពេលយប់។ អ្នកខ្លះក៏បានត្អូញត្អែរអំពីសុវត្ថិភាពផងដែរ ដោយលើកឡើងថា ស្លាកសញ្ញា ដែលបង្ហាញលើកំពូលអគារ ហាក់ផ្សារមិនជាប់មាំទាំនៅគែមដំបូលអគារនោះទេ។
នាយកដ្ឋានត្រួតពិនិត្យអគារនិងផែនការទីក្រុងរបស់សាន់ហ្វ្រាន់ស៊ីស្កូបានទទួលពាក្យបណ្តឹងចំនួន ២៤ អំពីសញ្ញានេះ រួមទាំងការព្រួយបារម្ភអំពី “សុវត្ថិភាពស្លាកសញ្ញានិងការបំភ្លឺភ្លើងភ្លឺពេក” នេះបើយោងតាមនាយកផ្នែកទំនាក់ទំនងរបស់ទីភ្នាក់ងារខាងលើ លោក ផាទ្រីក ហានណាន់ (Patrick Hannan) ប្រាប់ទៅទីភ្នាក់ងារសារព័ត៌មាន AFP។
លោកហានណាន់បាននិយាយថា “ព្រឹកនេះ អ្នកត្រួតពិនិត្យអគារបានសង្កេតមើលគេរុះរើស្លាកសញ្ញាចេញហើយ”។
យោងតាមលោកហានណានបានឱ្យដឹងថា ម្ចាស់អគារ ដែលក្រុមហ៊ុន X កំពុងជួលការិយាល័យ នឹងត្រូវបង់ថ្លៃការអនុញ្ញាតក្នុងការដំឡើងនិងដកចេញស្លាកសញ្ញា ក៏ដូចជាការចំណាយលើការស៊ើបអង្កេតរបស់ទីក្រុងផងដែរ៕
ស្លាកអក្សរ X ត្រូវបានរុះរើ
