ប្រែសម្រួល : កញ្ញាដាលីស (ដេល្លីម៉េល) ៖ ចិនកាលពីថ្ងៃចន្ទបានប្រកាសពីការគ្រប់គ្រងការនាំចេញលើដ្រូនមួយចំនួននិងឧបករណ៍ដែលទាក់ទងនឹងដ្រូន ដោយនិយាយថាខ្លួនចង់ការពារ “សន្តិសុខនិងផលប្រយោជន៍ជាតិ” ចំពេលមានភាពតានតឹងកាន់តែខ្លាំងជាមួយសហរដ្ឋអាម៉េរិកជុំវិញសិទ្ធិចូលប្រើប្រាស់បច្ចេកវិជ្ជា។
ក្រសួងពាណិជ្ជកម្មបាននិយាយថា ការរឹតបន្តឹងលើឧបករណ៍នានា រួមទាំងម៉ាស៊ីនដ្រូន ឡាស៊ែរ ឧបករណ៍ទំនាក់ទំនង និងប្រព័ន្ធប្រឆាំងដ្រូន នឹងចូលជាធរមាននៅថ្ងៃទី ១ ខែកញ្ញា។
អ្នកនាំពាក្យក្រសួងបាននិយាយនៅក្នុងសេចក្តីថ្លែងការណ៍មួយថា ការគ្រប់គ្រងនេះក៏ប៉ះពាល់ដល់ដ្រូនធម្មតាមួយចំនួនផងដែរ ហើយគ្មានដ្រូនស៊ីវិលណាអាចត្រូវបាននាំចេញសម្រាប់គោលបំណងយោធានោះឡើយ។
អ្នកនាំពាក្យមិនបញ្ចេញឈ្មោះខាងលើបាននិយាយថា “ការពង្រីកវិសាលភាពនៃការគ្រប់គ្រងដ្រូនរបស់ចិននៅពេលនេះគឺជាវិធានការសំខាន់មួយដើម្បីបង្ហាញពីជំហររបស់យើងជាប្រទេសសំខាន់ ដែលមានការទទួលខុសត្រូវ ដើម្បីអនុវត្តគំនិតផ្តួចផ្តើមសន្តិសុខពិភពលោក និងរក្សាសន្តិភាពពិភពលោក”។
អ្នកនាំពាក្យបាននិយាយថា អាជ្ញាធរបានជូនដំណឹងដល់បណ្តាប្រទេសនិងតំបន់ពាក់ព័ន្ធរួចហើយ។
ចិនមានឧស្សាហកម្មផលិតដ្រូនដ៏ធំបំផុតមួយលើពិភពលោក ហើយបាននាំចេញទៅកាន់ទីផ្សារជាច្រើន រួមទាំងសហរដ្ឋអាម៉េរិកផងដែរ។
ក្រសួងការពារជាតិនិងក្រសួងពាណិជ្ជកម្មរបស់អាម៉េរិកមិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។
សភាអាម៉េរិកក្នុងឆ្នាំ ២០១៩ បានហាមប្រាមមន្ទីរបញ្ចកោណមិនឱ្យទិញឬប្រើប្រាស់ដ្រូននិងគ្រឿងបន្លាស់ដែលផលិតនៅក្នុងប្រទេសចិនទេ។
សមាជិកសភាអាម៉េរិកបាននិយាយថា ជាង ៥០% នៃដ្រូនដែលលក់នៅសហរដ្ឋអាម៉េរិកគឺផលិតដោយក្រុមហ៊ុន DJI ដែលមានមូលដ្ឋាននៅប្រទេសចិន ហើយពួកវាជាដ្រូនពេញនិយមបំផុតដែលប្រើប្រាស់ដោយបណ្តាទីភ្នាក់ងារសុវត្ថិភាពសាធារណៈ។
DJI បាននិយាយកាលពីថ្ងៃចន្ទថា ខ្លួនតែងតែគោរពយ៉ាងតឹងរ៉ឹងនិងអនុវត្តតាមច្បាប់និងបទប្បញ្ញត្តិនៃប្រទេសឬតំបន់ដែលខ្លួនធ្វើប្រតិបត្តិការ រួមទាំងកិច្ចតម្រូវក្នុងបទប្បញ្ញត្តិគ្រប់គ្រងការនាំចេញរបស់ចិនផងដែរ៕
ចិនចាប់ផ្តើមរឹតបន្តឹងការនាំចេញដ្រូនទៅក្រៅប្រទេស ក្រោមហេតុផលចង់ការពារ “សន្តិសុខនិងផលប្រយោជន៍ជាតិ”