ប្រែសម្រួលៈបំណង(បាងកកប៉ុស្តិ៍)៖ ផែនការវិលចូលស្រុករបស់អតីតនាយករដ្ឋមន្ត្រីថៃលោកថាក់ស៊ីន ស៊ីណាវ៉ាតនឹងត្រូវពន្យារពេលរហូតដល់ពេលរដ្ឋាភិបាលថ្មីដឹកនាំដោយគណបក្សភឿថៃមួយត្រូវបានបង្កើតឡើង នេះបើតាមប្រភពបក្សភឿថៃបានបញ្ចេញអោយដឹងកាលពីថ្ងៃព្រហស្បតិ៍។
អតីតមេដឹកនាំដែលកំពុងរស់នៅដោយការនិរទេសខ្លួននៅក្រៅប្រទេសអស់១៥ឆ្នាំរូបនេះត្រូវគេទទួលស្គាល់ទូទៅថាជាមេដឹកនាំតាមការជាក់ស្តែងរបស់គណបក្សភឿថៃ។ដំបូងលោកប្រកាសវិលចូលស្រុកកាលពីខែមុន និងបន្ទាប់មកដូរមកថ្ងៃ១០សីហាដោយទំនងជាផ្លាស់ប្តូរតាមសភាពការណ៍នយោបាយ។
តែក្រោយសភាលើកពេលប្រជុំជ្រើសរើសនាយករដ្ឋមន្ត្រីសំរាប់បេក្ខជនមកពីបក្សភឿថៃរហូតដល់តុលាការចេញការសំរេចមួយ ប្រភពព័ត៌មានដែលស្និទ្ធនឹងគណបក្សនេះបាននិយាយថា ដើម្បីធានាការវិលវិញដោយរលូន ដំណើរវិលចូលស្រុករបស់លោកថាក់ស៊ីននឹងត្រូវលើកទៅពេលក្រោយទៀត។
ប្រភពព័ត៌មានបានបន្ថែមថា លោកថាក់ស៊ីននៅរង់ចាំមើលការចរចារវាងភឿថៃជាមួយគណបក្សនានាដើម្បីបង្កើតក្រុមចំរុះថ្មីមួយ។បច្ចុប្បន្ន មានគណបក្សធំៗគួរសមចំនួនបីមានបំណងចូលរួមក្នុងប្លុកដឹកនាំដោយភឿថៃ រួមមានភូមចៃថៃ(Bhumjaithai) ឆាតថៃផាតាណា(Chartthaipattana)និងគណបក្សប្រជាធិបតេយ្យ។ការចរចាកំពុងធ្វើឡើងផងដែរជាមួយគណបក្សជាតិថៃរួបរួម(UTN)និងគណបក្សផាឡាំងប្រចារ៉ាត(PPRP) ។គេរំពឹងគណបក្សតូចៗជាច្រើនទៀតក៏នឹងចូលរួមក្នុងសម្ពន្ធភាពថ្មីដែលគ្មានគណបក្សឈ្នះឆ្នោតកាវក្លៃឬឈានទៅមុខ(MFP)នេះដែរ។
មេប៉ូលិសជាតិថៃ បាននិយាយកាលពីថ្ងៃព្រហស្បតិ៍ថា ថាក់ស៊ីនមិនបានជូនដំណឹងអំពីដំណើរចូលប្រទេសថៃនៅឡើយទេ។
សូមបញ្ជាក់ថា ថាក់ស៊ីន បានភៀសខ្លួនចេញពីប្រទេសនៅឆ្នាំ២០០៨ នៅពេលតែបន្តិចមុនតុលាការសំរេចអោយលោកជាប់គុកចំពោះទោសរំលោភអំណាច ពាក់ព័ន្ធនឹងការជួយសំរួលអោយអតីតភរិយារបស់លោកអាចទិញដីល្អមួយកន្លែងក្នុងតំលៃថោក ក្នុងពេលលោកនៅធ្វើជានាយករដ្ឋមន្ត្រី។
កាលពីសប្តាហ៍មុន កូនស្រីរបស់ថាក់ស៊ីន បានប្រកាសថាឳពុកខ្លួននឹងមកដល់អាកាសយានដ្ឋានដនមឿងនៅថ្ងៃ១០សីហា តែបើតាមលោក ជូវិត កាម៉ុលវីស៊ីត(Chuvit Kamolvisit)អតីតសេដ្ឋីហាងម៉ាស្សា បានអះអាងថា «តើអ្នកជឿថាថាក់ស៊ីននឹងមកស្រុកនៅថ្ងៃ១០សីហាដើម្បីចូលដេកគុក?»។
អ្នកចូលចិត្តខ្សិបខ្សៀវរឿងនយោបាយរូបនេះបាននិយាយថា វាជាការខុសឆ្គងមួយដែលនាំគ្នាគិតថាប៉ូលិសនឹងទៅទទួលមេដឹកនាំជាក់ស្តែងរបស់ភឿថៃរូបនេះពីអាកាសយានដ្ឋានទៅបំពេញទោសជាប់គុក១០ឆ្នាំ។« បើអតីតនាយករដ្ឋមន្ត្រីរូបនេះពិតជាចង់មកទោះជាជាប់គុកក្តី គាត់មិនរង់ចាំអស់១៥-១៦ឆ្នាំកន្លងមកនេះទេ»។
លោកជូវីតបានបង្កការចាប់អារម្មណ៍ថ្មីមួយទៀតកាលពីថ្ងៃសុក្រសប្តាហ៍មុនពេលលោកបង្ហោះសារមួយនិយាយថា ថាក់ស៊ីនដូរផែនការវិលចូលស្រុកដោយរង់ចាំមើលស្ថានការណ៍នយោបាយថ្មីមួយ៕
ថាក់ស៊ីនបានអះអាងជាច្រើនដងថាលោកត្រូវតែចូលស្រុកនៅខែកក្កដាកន្លងទៅ តែបានដូរកាលបរិច្ឆេទវិលមកស្រុកជាបន្តបន្ទាប់ដោយរង់ចាំមើលសភាពការណ៍នយោបាយ