ប្រែសម្រួលៈបំណង(ស្ត្រេតថែមស៍)៖យ៉ាងហោចណាស់មនុស្សម្នាក់បានស្លាប់និង១៤នាក់ទៀតរងរបួសក្នុងការវាយប្រហារដោយការចាក់នឹងកាំបិតនៅផ្សារក្បែរស្ថានីយរថភ្លើងមួយនៅជិតក្រុងសេអ៊ូលរបស់កូរ៉េខាងត្បូង។
ហេតុការណ៍នេះបានកើតឡើងនៅម៉ោង៦ល្ងាចថ្ងៃព្រហស្បតិ៍ នៅផ្សារ AK Plaza ជិតស្ថាននីយសេអូហ្សុន( Seohyeon)នៅទីប្រជុំជនសេអូនណាម( Seongnam)។
បុគ្គលិកឆ្លើយតបគ្រាអាសន្នសង្គ្រោះអ្នករងរបួស ក្រោយបុរសម្នាក់វាយប្រហារដោយកាំបិត
ផ្នែកឆ្លើយតបគ្រាអាសន្នបានទទួលការហៅទូរស័ព្ទមកថា «បុរសម្នាក់ចាក់មនុស្ស»។
កាសែតជូនជែង ដេល្លី(JoongAng Daily )បានរាយការណ៍ថា ជនសង្ស័យម្នាក់ត្រូវបានចាប់ខ្លួន។របាយការណ៍សារព័ត៌មានខ្លះទៀតបានពណ៌នាជននេះថាមានអាយុខ្ទង់២០ឆ្នាំប្លាយ ជាអ្នកដឹជញ្ជូនទំនិញនិងមានបញ្ហាសុខភាពផ្លូវចិត្ត(វិកលចរិត)។
សារព័ត៌មានក្នុងបណ្តាញសង្គមក៏បាននិយាយថា រថយន្តមួយបានបើកបុកចិញ្ចើមផ្លូវហើយបុរសម្នាក់បានហក់ចេញមកសំដៅទៅកាន់ផ្សារក្បែរនោះ ហើយរបាយការណ៍មុននេះបាននិយាយថា ជនសង្ស័យបានបើករថយន្តបំបុកមនុស្សបណ្តាលអោយរបួសបួននាក់មុនចេញពីរថយន្តសំដៅផ្សារមួយនៅក្បែរនោះនិងចាក់អោយរបួសមនុស្សប្រាំបួននាក់។
ហេតុផលចំពោះការវាយប្រហារនេះគេនៅមិនទាន់ដឹងនៅឡើយទេ តែសារព័ត៌មានNews1បានស្រង់សម្តីរបស់មេប៉ូលិសក្រុងសេអ៊ូលដែលថា ឧបទ្ទវហេតុនេះត្រូវបានចាត់ទុកជា«អំពើភេរវកម្ម»។
ប៉ូលិសបិទតំបន់លក់ដូរក្នុងផ្សារផ្លូវក្រោយដីមួយ កន្លែងដែលមានការចាក់មនុស្សកាលពីថ្ងៃ៣សីហា ទីប្រជុំជនសេអូនណាម
ឧបទ្ទវហេតុកាលពីថ្ងៃព្រហស្បតិ៍បានកើតឡើងពីរសប្តាហ៍ក្រោយមានការវាយប្រហារចាក់ដោយកាំបិតមួយទៀតនៅក្នុងទីក្រុងសេអ៊ូល ដែលបានសម្លាប់មនុស្សម្នាក់និងរបួសបីនាក់៕