ប្រែសម្រួល : កញ្ញាដាលីស (ដេល្លីម៉េល) ៖ កូនប្រុសរបស់តារាសម្ដែងអេស្ប៉ាញ រ៉ូដូលហ្វូ សាន់ឆូ អាគ្វីរ៉េ (Rodolfo Sancho Aguirre) បានសារភាពថាបានសម្លាប់និងបំផ្លាញសាកសពគូស្នេហ៍ស្រឡាញ់ភេទដូចគ្នារបស់គាត់នៅលើកោះ Full Moon Party របស់ថៃ។
ដានីញែល សាន់ឆូ ប្លង់កាឡូ (Daniel Sancho Bronchalo) ដែលជាកូនប្រុសរបស់តារាសម្តែងស្រី ស៊ីលវីយ៉ា ប្លង់កាឡូ (Silvia Bronchalo) ដែរនោះ ត្រូវបានចោទប្រកាន់ពីបទវាយដំគ្រូពេទ្យកែសម្ផស្សជនជាតិកូឡុំប៊ី អេដវីន អារីតា អាធីហ្គា (Edwin Arrieta Arteaga) រហូតដល់ស្លាប់នៅលើកោះផាង៉ាន (Pha Ngnan) កាលពីថ្ងៃពុធទី២៧កក្កដា។
ផ្នែកនៃសាកសពបុរសអាយុ ៤៤ ឆ្នាំនេះ រួមទាំងត្រគាកនិងភ្លៅរបស់គាត់ ត្រូវបានរកឃើញដោយអ្នកស្រុក ដែលមានការភ្ញាក់ផ្អើលយ៉ាងខ្លាំងនៅឯទីលានចាក់សំរាមកាលពីថ្ងៃព្រហស្បតិ៍ ទី៣ ខែសីហា។
ប៉ូលិសក្នុងតំបន់បាននិយាយថា សាន់ឆូ អាយុ ២៩ ឆ្នាំ បានមកដល់ប្រទេសថៃកាលពីថ្ងៃទី ៣១ ខែកក្កដាក្នុងនាមជាអ្នកទេសចរហើយបានសារភាពចំពោះអាជ្ញាធរថាបានសម្លាប់លោកអារីតាក្នុងការឈ្លោះប្រកែកគ្នាអំពី “ផ្លូវភេទនិងប្រាក់”។
តាមការចោទប្រកាន់ មេចុងភៅនេះបានកាត់សាកសពជា១៤ បំណែក មុនពេលយកទៅបោះចោលក្នុងសមុទ្រនិងកន្លែងផ្សេងទៀតជុំវិញកោះ រួចហើយរត់ទៅដាក់ពាក្យប្តឹងអំពីអ្នកបាត់ខ្លួន។
ក្រុមមន្ត្រីបានអះអាងថា អ្នកទាំងពីរ ដែលមានទំនាក់ទំនងស្នេហាមួយឆ្នាំ បានស្គាល់គ្នាមុនពេលមកដល់កោះនេះដើម្បីចូលរួមជប់លៀងជាមួយគ្នាកាលពីសប្តាហ៍ទៅមិញ។
នៅព្រឹកថ្ងៃអាទិត្យទី៦សីហា ជនជាតិអេស្ប៉ាញរូបនេះឃើញអមដោយប៉ូលិសនៅលើកោះខាងលើ ជាកន្លែងដែលគាត់បាននាំផ្លូវមន្ត្រីទៅកាន់កន្លែងមួយនៅលើឆ្នេរដែលគាត់បានជិះទូកកាយ៉ាក់ដើម្បីយកបំណែកសាកសពចាក់ចោល។ ក្រោយមក ប៉ូលិសបានរកឃើញក្បាល និងដៃរបស់ជនរងគ្រោះ។
ឥឡូវនេះគាត់ត្រូវបានឃុំខ្លួននៅក្នុងមន្ទីរឃុំឃាំងនិងដាក់ក្រោមការឃ្លាំមើលបង្ការក្រែងលោលួចធ្វើអត្តឃាត មុនពេលបង្ហាញខ្លួននៅតុលាការក្នុងប្រទេសថៃនៅថ្ងៃចន្ទទី៧សីហានេះ៕
លោកឧត្តមសេនីយ៍ទោ ស៊ូរ៉ាពង់ ថាណុមចិត បាននិយាយថា “ជនសង្ស័យបានសារភាពថាជាអ្នកសម្លាប់ អេដវីន អារីតា អាធីហ្គា(រូបក្រោម) និងកាត់សាកសពជាបំណែក
ដានីញែល សាន់ឆូ ប្លង់កាឡូ
ដានីញែល សាន់ឆូ ប្លង់កាឡូ (កណ្តាល)សារភាពថាបានសម្លាប់គូស្នេហ៍របស់ខ្លួន នៅប្រទេសថៃកាលពីថ្ងៃទី ២៧ កក្កដា ឆ្នាំ២០២៣