ប្រែសម្រួល : កញ្ញាដាលីស (ដេល្លីម៉េល) ៖ ជប៉ុនបានសម្តែងការព្រួយបារម្ភកាលពីថ្ងៃចន្ទជុំវិញកម្មវិធីចម្រាញ់សារធាតុអ៊ុយរ៉ានីញ៉ូមទំនើបរបស់អ៊ីរ៉ង់និងការសង្ស័យថាប្រទេសមជ្ឈិមបូព៌ានេះផ្គត់ផ្គង់ដ្រូនប្រយុទ្ធដល់រដ្ឋាភិបាលក្រុងមូស្គូសម្រាប់សង្គ្រាមរុស្ស៊ីលើអ៊ុយក្រែន។
ក្រសួងការបរទេសក្នុងទីក្រុងតូក្យូបាននិយាយថា រដ្ឋមន្ត្រីការបរទេសជប៉ុនលោក យ៉ូស៊ីម៉ាសា ហាយ៉ាស៊ី (Yoshimasa Hayashi) បានលើកឡើងពីបញ្ហាទាំងពីរនេះក្នុងអំឡុងកិច្ចពិភាក្សាជាមួយសមភាគីអ៊ីរ៉ង់ដែលកំពុងបំពេញទស្សនកិច្ច គឺ លោក ហូសសេន អាមីរ៉ាប់ឌុលឡាហ៊ីយ៉ាន (Hossein Amirabdollahian)។
សេចក្តីថ្លែងការណ៍របស់ក្រសួងបាននិយាយថា លោកហាយ៉ាស៊ីបានអំពាវនាវឱ្យអ៊ីរ៉ង់ធ្វើសកម្មភាពប្រកបដោយការស្ថាបនាក្នុងបញ្ហានេះ ប៉ុន្តែមិនបានបញ្ជាក់លម្អិតទេ។
ដ្រូនរបស់អ៊ីរ៉ង់គឺជាធាតុសំខាន់នៃការបន្តសង្គ្រាមរបស់រុស្ស៊ីលើអ៊ុយក្រែន។ រដ្ឋាភិបាលក្រុងតេហេរ៉ង់បានផ្តល់អំណះអំណាងមិនច្បាស់លាស់អំពីដ្រូន ដោយដំបូងឡើយបានបដិសេធថា អ៊ីរ៉ង់មិនបានផ្គត់ផ្គង់ពួកវាទៅឱ្យរុស្ស៊ីទេ ហើយក្រោយមកបានអះអាងថា ដ្រូនទាំងនោះត្រូវបានលក់មុនពេលការឈ្លានពានរបស់រុស្ស៊ីប៉ុណ្ណោះ។
ទោះយ៉ាងណា ចំនួនដ្រូនផលិតដោយអ៊ីរ៉ង់ ដែលប្រើប្រាស់ក្នុងជម្លោះនេះ បានបង្ហាញពីការផ្គត់ផ្គង់ឥតឈប់ឈរនូវអាវុធដែលផ្ទុកគ្រាប់បែក។ កាលពីខែមិថុនា សេតវិមានបាននិយាយថា អ៊ីរ៉ង់កំពុងផ្តល់សម្ភារៈដល់រុស្ស៊ីដើម្បីសាងសង់រោងចក្រផលិតដ្រូននៅភាគខាងកើតទីក្រុងមូស្គូ ខណៈវិមានក្រឹមឡាំងសម្លឹងរក្សាចរន្តការផ្គត់ផ្គង់ដ្រូនស្ថិតស្ថិរ។
ក្នុងនាមជាសម្ពន្ធមិត្តរបស់សហរដ្ឋអាម៉េរិកនិងជាសមាជិកនៃក្រុមប្រទេសជឿនលឿនទាំងប្រាំពីរ (G7) ជប៉ុនបានចូលរួមក្នុងការដាក់ទណ្ឌកម្មប្រឆាំងនឹងរដ្ឋាភិបាលក្រុងមូស្គូ ខណៈផ្តល់ជំនួយមនុស្សធម៌និងឧបករណ៍ការពារមិនគ្រោះថ្នាក់ដល់អ៊ុយក្រែន ដែលភាគច្រើនគឺដោយសារតែបារម្ភថា ការឈ្លានពានរបស់រុស្ស៊ីអាចជំរុញចិនឱ្យកាន់តែបានចិត្តនៅក្នុងអាស៊ី។
ទូរទស្សន៍រដ្ឋរបស់អ៊ីរ៉ង់បាននិយាយថា លោកអាមីរ៉ាប់ឌុលឡាហ៊ីយ៉ានបានបដិសេធការផ្តល់ដ្រូនដល់រុស្ស៊ី ហើយបានទទូចថា រដ្ឋាភិបាលក្រុងតេហេរ៉ង់ផ្តោតលើកិច្ចខិតខំប្រឹងប្រែងសម្រាប់ការសន្ទនានិងការស្វែងរកដំណោះស្រាយនយោបាយដើម្បីបញ្ចប់សង្គ្រាម។ របាយការណ៍ក៏បានដកស្រង់សម្តីអ្នកការទូតកំពូលអ៊ីរ៉ង់ផងដែរ ដោយនិយាយថា សហរដ្ឋអាម៉េរិកនិងលោកខាងលិចគួរតែបញ្ឈប់អ្វីដែលគាត់បានពណ៌នាថាជាការចោទប្រកាន់គ្មានមូលដ្ឋានលើអ៊ីរ៉ង់។
ក្រសួងបានបន្ថែមថា លោកហាយ៉ាស៊ីក៏បានសម្តែងការព្រួយបារម្ភយ៉ាងខ្លាំងអំពីការពង្រីកសកម្មភាពនុយក្លេអ៊ែររបស់អ៊ីរ៉ង់ផងដែរ និងបានជំរុញឱ្យមានកិច្ចសហប្រតិបត្តិការពេញលេញនិងគ្មានលក្ខខណ្ឌរបស់រដ្ឋាភិបាលក្រុងតេហេរ៉ង់ជាមួយទីភ្នាក់ងារថាមពលអាតូមិកអន្តរជាតិ៕
លោកអាមីរ៉ាប់ឌុលឡាហ៊ីយ៉ានជួបនាយករដ្ឋមន្ត្រីជប៉ុនគីស៊ីដា (ស្តាំ) ក្នុងក្រុងតូក្យូកាលពីថ្ងៃចន្ទទី៧សីហា