ប្រែសម្រួលៈបំណង(ស្ពុតនិច)៖យោងតាមអាជ្ញាធរសុខាភិបាលអាម៉េរិកនិងអង់គ្លេស វីរុសអូមីក្រុងពូជថ្មីហៅថា EG.5ឬ អ៊ីរីស(Eris)បានក្លាយជាប្រភេទវីរុសកូវីដ១៩ដែលកំពុងចម្លងរាលដាលខ្លាំងជាងវីរុសកូវីដប្រភេទដទៃទៀតនៅក្នុងប្រទេសទាំងពីរ។
ទិន្នន័យចុងក្រោយមកពីមជ្ឈមណ្ឌលគ្រប់គ្រងនិងបង្ការជំងឺអាម៉េរិក(CDC) កាលពីថ្ងៃ៥សីហាបានបង្ហាញថា EG.5ទទួលខុសត្រូវលើការចម្លង១៤-២១ភាគរយនៃការឆ្លងកូវីដ១៩ថ្មីនៅអាម៉េរិក។ទោះជាវាមិនតំណាងអោយចំនួនភាគច្រើន ក៏ EG.5ឬ អ៊ីរីសជាចំណែកធំបំផុតក្នុងចំណោមអូមីក្រុងបំប្លែងខ្លួនផ្សេងៗរួមមាន XBB.1.5 ដែលចម្លងត្រួតត្រាលើវីរុសដទៃទៀតក្នុងអំឡុងពេលផ្ទុះជំងឺនៅកាលពីរដូចរំហើយឆ្នាំ២០២៣។
តាមពិតEG.5ត្រូវបានអង្គការសុខភាពពិភពលោកចាត់ទុកជាអនុវីរុសបំប្លែងខ្លួនមួយ តែមិនទាន់ជាវីរុសនៃការព្រួយបារម្ភមួយនៅឡើយទេ។
វីរុសអូមីក្រុងនិងកូនចៅបំប្លែងខ្លួនបន្តបន្ទាប់របស់វា បានបង្កការឆ្លងនៅទូទាំងពិភពលោកអស់ពេលជិតពីរឆ្នាំមកហើយ ដោយសារតែលទ្ធភាពរបស់ពួកវាអាចគេចចេញពីប្រព័ន្ធស៊ាំរាងកាយនិងចម្លងជាថ្មីទៅមនុស្សដែលធ្លាប់ឆ្លងពីមុន ឬមនុស្សដែលបានចាក់វ៉ាក់សាំងការពាររួចហើយ។
សូមបញ្ជាក់ថាក្រុមហ៊ុនឳសថPfizer, Moderna និង Novavax សុទ្ធតែត្រៀមវ៉ាក់សាំងដូសជំរុញផ្តោតលើអូមីក្រុងបំប្លែងខ្លួនរងស៊េរីXBB ស្របតាមការណែនាំរបស់រដ្ឋបាលឳសថនិងម្ហូបអាហារអាម៉េរិក (FDA)។យោងតាមអ្នកជំនាញការ EG.5 មានលក្ខណៈរួមដូចនឹងពពួកអនុវីរុសXBB ដែលវ៉ាក់សាំងរបស់ក្រុមហ៊ុនទាំងនេះមានប្រសិទ្ធភាពអាចបង្រ្កាបពួកវា៕
វីរុស្សកូវីដ១៩ថ្មីបង្ហាញខ្លួននៅអាម៉េរិកនិងអង់គ្លេស តែអ្នកជំនាញជឿថាវានឹងមិនបង្កការឆ្លងរាលដាលខ្លាំងទេ ហើយវ៉ាក់សាំងបច្ចុប្បន្នអាចបង្ក្រាបវាបាន