ប្រែសម្រួល : កញ្ញាដាលីស (ស្ត្រេតថែមស៍) ៖ ជម្លោះរវាងនាង បាប៊ី ស៊ូ (Barbie Hsu) ឬហៅសាន់ឆាយ និងអតីតស្វាមី លោក វ៉ាង សៀវហ្វេយ (Wang Xiaofei) ហាក់មិនចេះចប់សោះ។
លើកនេះតារាស្រីតៃវ៉ាន់កំពុងប្តឹងលោកវ៉ាង ជាអ្នកជំនួញចិន និង អតីតម្តាយក្មេកពីបទបរិហារកេរ្តិ៍។
នៅក្នុងសារបង្ហោះលើ Weibo កាលពីថ្ងៃអង្គារ នាងស៊ូ វ័យ ៤៦ ឆ្នាំបានចែករំលែកសេចក្តីថ្លែងការណ៍មួយ ដែលបង្ហាញថា ក្រុមមេធាវីរបស់នាងនឹងបន្តចាត់វិធានការប្រឆាំងនឹងលោកវ៉ាង អាយុ ៤២ ឆ្នាំ និង ម្តាយរបស់គាត់ឈ្មោះ ចាង ឡាន (Zhang Lan) អាយុ ៦៥ ឆ្នាំពីបទប្រមាថ និងបង្ខូចកេរ្តិ៍ឈ្មោះនាងនៅលើវេទិកាអនឡាញជាច្រើនដូចជា Weibo និង Douyin ។
លិខិតផ្លូវច្បាប់បានបញ្ជាក់ថា លោកស្រីចាង ដែលជាសហគ្រិនជនជាតិចិន បានជេរប្រមាថនាងស៊ូនៅលើបណ្តាញឡាយស្ទ្រីមរបស់ Douyin ចាប់តាំងពីថ្ងៃទី ២១ ខែវិច្ឆិកា ឆ្នាំ ២០២២ ខណៈលោកវ៉ាងបានបន្តបញ្ចេញពាក្យប្រមាថតាមអនឡាញចាប់តាំងពីចុងឆ្នាំ ២០២២។
មេធាវីរបស់នាងស៊ូបានបន្ថែមថានឹងចាត់វិធានការផងដែរប្រឆាំងនឹងការជេរប្រមាថ ដែលតារាស្រីរូបនេះ បានទទួលរងពីអ្នកនិយមលេងអ៊ីនធឺណិត ដោយសារតែការបរិហារកេរ្តិ៍នេះ។
គូស្នេហ៍ដែលមានជម្លោះនេះបានប្រកាសលែងលះគ្នានៅខែវិច្ឆិកា ឆ្នាំ២០២១ ក្រោយរៀបការបាន១១ឆ្នាំ។ ពួកគេមានកូនស្រីអាយុ៨ឆ្នាំម្នាក់ និងកូនប្រុសអាយុ៦ឆ្នាំម្នាក់។
ចាប់តាំងពីពេលនោះមក អ្នកទាំងពីរបានចោទប្រកាន់គ្នាទៅវិញទៅមក ដោយនាងស៊ូអះអាងថា លោកវ៉ាងមិនបានផ្តល់ការថែទាំមាតុភាព ដែលមានចែងក្នុងកិច្ចព្រមព្រៀងលែងលះរបស់ពួកគេទេ។
ចំណែកលោកវ៉ាងបានបង្ហោះទស្សនៈរបស់ខ្លួនលើអតីតភរិយា ស្វាមីថ្មីរបស់នាង គឺឌីជេ គូ (DJ Koo) អាយុ ៥៣ ឆ្នាំ និង ប្អូនស្រីរបស់នាង ដែលជាពិធីការិនី-តារាសម្ដែង ឈ្មោះ ឌី ស៊ូ (Dee Hsu) អាយុ ៤៤ ឆ្នាំ នៅលើបណ្តាញសង្គម ដោយចោទប្រកាន់ពីភាពមិនស្មោះត្រង់ ការប្រើប្រាស់គ្រឿងញៀន និង សូម្បីប្រើប្រាស់ទឹកភ្លើងច្រើនហួសហេតុ ដែលលោកបានអះអាងថានៅតែជាអ្នកចេញលុយឱ្យ៕
នាងសាន់ឆាយ និង លោកវ៉ាង