ប្រែសម្រួលៈបំណង(បាងកកប៉ុស្តិ៍)៖ គណបក្សភឿថៃនៅថ្ងៃ១០សីហានេះបានស្វាគមន៍គណបក្សឆាតថៃផាតាណា(Chatthaipattana)ដែលកាន់កាប់កៅអីសភា១០ អោយចូលមកក្នុងក្រុមចំរុះរបស់ខ្លួនជាហេតុនាំអោយសម្ពន្ធភាពប្រាំបួនគណបក្សនេះកើនសម្លេងសភាដល់២៣៨ក្នុងសភាដែលមាន៥០០អាសនៈ។
គណបក្សទាំងពីរកាលពីព្រឹកថ្ងៃព្រហស្បតិ៍បានបង្ហាញការតាំងចិត្តសហការមកពីគ្រប់គណបក្សនយោបាយនិងព្រឹទ្ធសភាសំរាប់ការជ្រើសរើសនាយករដ្ឋមន្ត្រីម្នាក់និងបង្កើតរដ្ឋាភិបាលថ្មីមួយ។
ប្រធានបក្សភឿថៃលោក ឆុលណាន ស្រ៊ីកែវ បាននិយាយក្នុងសេចក្តីថ្លែងការណ៍រួមមួយនៅសភាថា ប្រទេសស្ថិតក្នុងស្ថានការណ៍នយោបាយប្លែកពីគេនិងទាមទារគណបក្សទាំងអស់រួមកម្លាំងគ្នាដើម្បីដោះស្រាយបញ្ហាធម្មនុញ្ញ ការប្រឈមសេដ្ឋកិច្ចនិងជម្លោះសង្គម។
គណបក្សទាំងពីរបានទទូចសុំសារធារណជនមានជំនឿលើសម្ពន្ធភាពនយោបាយថ្មីនេះ ដែលចង់អោយសង្គមថៃវិលទៅរកប្រក្រតីភាពអោយបានឆាប់។
ចំណែកប្រធានបក្ស ឆាតថៃផាតាណាបានអរគុណភឿថៃដែលបានអញ្ជើញគណបក្សលោកអោយចូលរួមក្នុងក្រុមចំរុះនេះ ហើយរីករាយនឹងការធ្វើជាដៃគូ។
ជាមួយនឹងការចូលរួមរបស់ឆាតថៃផាតាណាមួយទៀត ក្រុមចំរុះនេះឥឡូវមានប្រាំបួនគណបក្ស រួមបក្សធំលំដាប់ទីបី គឺបក្សភូមចៃថៃ ដែលមានអាសនៈសភា៧១។
ក្រុមចំរុះប្រាំបីគណបក្សមុន ដឹកនាំដោយបក្សឈ្នះឆ្នោតលំដាប់ទីមួយ គឺបក្សឈានទៅមុខMFPមានអាសនៈសភាសរុប៣១២តែបេក្ខជននាយករដ្ឋមន្ត្រីរបស់MFPមិនទទួលបានការគាំទ្រគ្រប់គ្រាន់ពីសមាជិកសភានិងព្រឹទ្ធសភាសំរាប់ដឹកនាំរដ្ឋាភិបាលថ្មីទេ ។
ការបោះឆ្នោតជ្រើសរើសនាយករដ្ឋមន្ត្រីនាពេលខាងមុខអាចធ្វើឡើងនៅសប្តាហ៍ក្រោយ អាស្រ័យលើលទ្ធផលនៃកិច្ចប្រជុំរបស់តុលាការធម្មនុញ្ញនៅថ្ងៃ១៦សីហា ដើម្បីពិនិត្យបណ្តឹងមួយរបស់MFPប្រឆាំងនឹងការសំរេចរបស់សភាក្នុងការរារាំងការតែងតាំងមេដឹកនាំMFPជាលើកទីពីរសំរាប់តំណែងបេក្ខជននាយករដ្ឋមន្ត្រី៕
មន្ត្រីភឿថៃនិងឆាតថៃផាតាណា ជួបប្រជុំគ្នាកាលពីថ្ងៃព្រហស្បតិ៍