ប្រែសម្រួលៈបំណង(VvExpress)៖ ស្ត្រីវៀតណាមម្នាក់នៅក្នុងខេត្តគៀនយ៉ាង( Kien Giang)ភាគខាងត្បូង ជាប់ចោទពីបទដឹកនាំក្រុមជួយដូរអាវុធមួយ ដែលបានបញ្ជូនកាំភ្លើងខ្លីជាង៦០០ដើមពីខេត្តញ៉ាត្រាង(Nha Trang)មកកាន់ខេត្តក្នុងតំបន់ដីសណ្តទន្លេមេគង្គនេះ។
នាង វូ ធី ឌីអេប (Vu Thi Diep)អាយុ៣៣ឆ្នាំ ជាមួយនឹងហ្សឿង មិញ ទ័ន( Duong Minh Tuan)អាយុ៣១ឆ្នាំ រួមនឹងជនសមគំនិត១៥នាក់ទៀតត្រូវបាននាំឡើងតុលការប្រជាជនខេត្តគៀនយ៉ាងកាលពីថ្ងៃព្រហស្បតិ៍ ដើម្បីកាត់ទោសចំពោះការផលិត ស្តុកទុក ដឹកជញ្ជូន ប្រើនិងមានសព្វាវុធយោធាដោយខុសច្បាប់។
នាង វូ ធី ឌីអេប ឈរនៅក្នុងតុលាការប្រជាជនខេត្តគៀនយ៉ាង កាលពីថ្ងៃ១០សីហា
កាលពីខែសីហា ឆ្នាំ២០២០ ប៉ូលិសខេត្តគៀនយ៉ាង បានចាប់ខ្លួនទ័នចំពោះការលាក់ទុកថ្នាំញៀននៅសណ្ឋាគារមួយ។ការឆែកឆេរនៅផ្ទះរបស់ទ័ន បង្ហាញឧបករណ៍ជាច្រើនសំរាប់ផលិតកាំភ្លើង។ទ័នបាននិយាយថា ខ្លួនចេះផលិតកាំភ្លើង និងចាប់ពីខែឧសភាដល់សីហា ឆ្នាំ២០២២ ខ្លួននិងមនុស្សមួយចំនួនទៀតផលិតបានកាំភ្លើង១៥ដើមសំរាប់បាញ់គ្រាប់ជ័រនិងលក់បានប្រាំបីដើម។
ការឆែកឆេរនៅផ្ទះជនសមគំនិតពីរនាក់ទៀតបានរកឃើញកាំភ្លើងប្រមាណ៧០ដើម និងពួកគេបានប្រាប់ថាកាំភ្លើងនិងគ្រាប់ជ័រជាង២០០ផ្តល់ដោយ នាង ឌីអេប។ការស្រាវជ្រាវបន្ថែមបាននាំដល់ការចាប់ខ្លួនឌីអេប នៅក្រុងហូជីមិញ និងជនសមគំនិតបីនាក់ទៀតហើយកាំភ្លើង២២៩ដើម ត្រូវបានរកឃើញនៅផ្ទះរបស់ឌីអេប។
កាំភ្លើងដែលរឹបអូសបានមកពីក្រុមរបស់ វូ ធី ឌីអេប
ពួកអ្នកស៊ើបអង្កេតបាននិយាយថា ចាប់ពីដើមឆ្នាំ២០២២ ដល់ខែតុលាឆ្នាំដដែល ឌីអេប បានបញ្ជូនកាំភ្លើង៤០០ដើមអោយមនុស្សរបស់ខ្លួនពីរនាក់ជាមួយនឹងគ្រាប់ជាង២ពាន់គ្រាប់ដើម្បីលក់។នៅឆ្នាំ២០១៩ឌីអេប និងប្តីត្រូវបានកាត់ទោសអោយជាប់គុកចំពោះការលក់អាវុធខុសច្បាប់។នាងត្រូវជាប់គុកបីឆ្នាំ តែទោសត្រូវព្យួរដោយសារនាងត្រូវចិញ្ចឹមកូនតូច តែក្រោយចេញពីគុក ឌីអេបបានបន្តទាក់ទងបណ្តាញរបស់ខ្លួននិងលក់អាវុធពីកម្ពុជាចូលវៀតណាម៕