ដោយ : ប.ជ័យ / បន្ទាយមានជ័យ:ករណីលួចមានស្ថានទម្ងន់ទោសនៅចំណុចមុខហាងស៊ុបស្មងគោស្ថិតក្នុងភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណខេត្តបន្ទាយមានជ័យ ដែលប្រព្រឹត្តកាលពីវេលាម៉ោង០១និង៣០នាទី រំលងអាធ្រាតឈានចូលថ្ងៃទី០៨ខែសីហាឆ្នាំ២០២៣ កម្លាំងកងរាជអាវុធហត្ថបានបង្ក្រាបនិងបញ្ជូនសង្ស័យ៤នាក់ ។
លោកវរសេនីយ៍ត្រី យ៉ាន់ សុវណ្ណ មេបញ្ជាការមូលដ្ឋានអាវុធហត្ថក្រុង បានដឹកនាំកម្លាំងស្រាវជ្រាវរហូតឈានដល់ការឃាត់ខ្លួនជនសង្ស័យចំនួន០៤នាក់ ។
ករណីនេះធ្វើឡើងតាមពាក្យបណ្តឹងរបស់ជនរងគ្រោះឈ្មោះ ហាង សុផាន់ណា ភេទស្រី អាយុ១៧ឆ្នាំ មុខរបរសិស្ស មានទីលំនៅបច្ចុប្បន្ន ភូមិពន្លៃ ឃុំភ្នំដី ស្រុកភ្នំស្រុក ខេត្តបន្ទាយមានជ័យ។
លោកវរសេនីយ៍ត្រី យ៉ាន់ សុវណ្ណ មេបញ្ជាការមូលដ្ឋានកងរាជអាវុធហត្ថក្រុង បានឲ្យដឹងថា : ជនសង្ស័យទាំង៤នាក់ ១.ឈ្មោះ ឈឿត សម្បត្តិ (ទៀ) ភេទប្រុស អាអាយុ១៧ឆ្នាំ ២.ឈ្មោះ សំណាង អាណាន់ ភេទប្រុស អាយុ២០ឆ្នាំ ៣.ឈ្មោះ នូ ណាវីន ភេទប្រុស អាយុ២៣ឆ្នាំ ៤.ឈ្មោះ មល់ ដេវីត ភេទប្រុស អាយុ២៨ឆ្នាំ ។
លោកវរសេនីយ៍ត្រី យ៉ាន់ សុវណ្ណ បន្តថា កាលពីនៅវេលាម៉ោងប្រហែល៩ និង៣០នាទីយប់ ថ្ងៃទី០៧ ខែសីហា ឆ្នាំ២០២៣ ជនរងគ្រោះរួមនិងមិត្តភត្តិ ចំនួន៧នាក់ បាននាំគ្នាជិះម៉ូតូ៣គ្រឿង ចេញពីភ្នំស្រុក ជិះទៅក្រុងសិរីសោភ័ណ ដើម្បីទៅកម្មពិធីខួបកំណើតអ្នកភូមិទៅរៀនជាមួយគ្នា នៅក្រុងសិរីសោភ័ណ ។ ពេលចប់កម្មពិធី រហូតដល់ម៉ោង១ និង៣០នាទី រំលងអាធ្រាត ចូលថ្ងៃទី០៨ ខែសីហា ឆ្នាំ២០២៣ ជនរងគ្រោះ និងមិត្តភក្កិ បាននាំគ្នាជិះម៉ូតូត្រឡប់ទៅស្រុកភ្នំស្រុកវិញ ខណៈជិះដល់ចំណុចហាងលក់ស៊ុបស្នងគោ ស្ថិតក្នុងភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណ ស្រាប់តែមានក្មេងស្ទាវ១ក្រុម ពុំដែលស្គាល់ មានគ្នាប្រហែល៨នាក់ ជិះម៉ូតូ៣គ្រឿង មានកាន់កាំបិត ជិះបញ្ច្រាស់ទិសគ្នាត្រលប់ក្រោយ បានជិះម៉ូតូតាមកាប់ ។ ពេលនោះខ្លួនផ្តួលម៉ូតូដេីម្បីគេចខ្លួនក្រោយមកក៏បានត្រឡប់ទៅយកម៉ូតូស្រាប់តែបាត់ម៉ូតូ ក៏បានទៅដាក់ពាក្យបណ្តឹងនៅកងរាជអាវុធហត្ថក្រុងសិរីសោភ័ណ ។
ពេលទទួលបានពាក្យបណ្ដឹងពីជនរងគ្រោះ កម្លាំងមូលដ្ឋានកងរាជអាវុធហត្ថក្រុងសិរីសោភ័ណ បានសហការជាមួយការិយាល័យព្រហ្មទណ្ឌ បានធ្វើការស្រាវជ្រាវ ។ ចុះដល់កន្លែងកើតហេតុ និងពិនិត្យកាមេរ៉ាសុវត្ថិភាពជុំវិញកន្លែងកើតហេតុ រហូតកំណត់បាននូវមុខសញ្ញានិងបានពិនិត្យឃើញថា ជនសង្ស័យមានគ្នាប្រហែល១០នាក់ កម្លាំងបន្តស្រាវជ្រាវរហូតឈានដល់ឃាត់ជនសង្ស័យចំនួន៤នាក់ ។ ដោយឡែកបក្ខពួកមួយចំនួនបាត់រត់គេចខ្លួន។ បន្ទាប់ពីឃាត់ខ្លួនជនសង្ស័យទាំង៤នាក់ ត្រូវបាននាំមកកាន់មូលដ្ឋានកងរាជអាវុធហត្ថក្រុងដើម្បីសួរនាំតាមនីតិវិធី។
ក្រោយឃាត់ខ្លួន និងសួរចម្លេីយជនសង្ស័យបានសារភាពថា ក្រុមពួកខ្លួនពិតជាបានធ្វេីសកម្មភាពដេញកាប់ និងយកម៉ូតូជនរងគ្រោះពិតប្រាកដមែន។
លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារស្រាវជ្រាវ និងបង្ក្រាបបទល្មេីសបានឱ្យដឹងថា ការបង្ក្រាបករណីខាងលើនេះ ក៏ទទួលបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលនីតិវិធីពី កើត វណ្ណារ៉េត ព្រះរាជអាជ្ញា អមសាលាដំបូងខេត្តផងដែរ ។
កម្លាំងការិយាល័យព្រហ្មទណ្ឌ កងរាជអាវុធហត្ថខេត្ត បញ្ជូនទៅសាលាដំបូងខេត្តហើយ នៅព្រឹកថ្ងៃសុក្រ ទី១១ ខែសីហា ឆ្នាំ២០២៣នេះ អនុវត្តតាមនីតិវិធី ៕/R
