ដោយ៖ សុផល / សៀមរាប៖ ក្រុមប្រឹក្សាផ្សព្វផ្សាយទេសចរណ៍ម៉ាឡេស៊ី បានសហការជាមួយ សមាគមទេសចរណ៍កម្ពុជា (CATA) រៀបចំកម្មវិធីសិក្ខាសាលាទេសចរណ៍ម៉ាឡេស៊ី នៅខេត្តសៀមរាប ដែលប្រមូលផ្តុំទៅដោយការណាត់ជួប រវាងសាជីវកម្មទេសចរណ៍កម្ពុជា និងម៉ាឡេស៊ី រួមទាំងការចងជាសក្ខីភាព រវាងភ្នាក់ងារទេសចរណ៍ តំណាងសណ្ឋាគារ រមណីយដ្ឋាន និងម្ចាស់ផលិតផល មកពីប្រទេសទាំងពីរ។
នេះក៏ជាលើកទីពីរហើយ ដែលក្រុមប្រឹក្សាផ្សព្វផ្សាយទេសចរណ៍ម៉ាឡេស៊ី បានរៀបចំព្រឹត្តិការណ៍នេះ ។ លើកទីមួយ ធ្វើនៅសណ្ឋាគារ NagaWorld 1 ក្នុងរាជធានីភ្នំពេញ និងលើកទី២ នេះ គឺនៅសណ្ឋាគារ Sokha Angkor Resort ក្នុងខេត្តសៀមរាប។
សិក្ខាសាលានេះ បានធ្វើឡើង ក្រោមវត្តមាន លោកស្រី ឆាយ ស៊ីវលីន ប្រធានសមាគមទេសចរណ៍កម្ពុជា (CATA) លោកស្រី Zalina Ahmad, នាយករងផ្នែក ផ្សព្វផ្សាយអន្តរជាតិ (អាស៊ីអាគ្នេយ៍), លោកស្រី ពត រ៉ានី ប្រធានផ្នែកទីផ្សារ មកពី ក្រុមប្រឹក្សាទេសចរណ៍ម៉ាឡេស៊ី និងមានការចូលរួមដោយក្រុមហ៊ុនឧស្សាហកម្មទេស ចរណ៏ធំៗ ពីប្រទេសម៉ាឡេស៊ី មានចំនួន៩ ក្រុមហ៊ុន ហើយក៏មានការចូលរួមជាង ៤០ ក្រុមហ៊ុនទេសចរណ៍ ដែលស្ថិតក្នុងខេត្តសៀមរាប ក៏បានចូលរួមផងដែរ។
នាឱកាសនោះ លោកស្រី Zalina Ahmad បានថ្លែងថាៈ យើងនឹងទន្ទឹងរង់ចាំដោយស្មោះ និងធ្វើការយ៉ាងជិតស្និទ្ធជាមួយ ភ្នាក់ងារទេសចរណ៍ក្នុងស្រុក នៅទីនេះ ក្នុងប្រទេស កម្ពុជា ហើយគិតត្រឹមឆ្នាំ២០២៤ ប្រទេសម៉ាឡេស៊ី បានកំណត់គោលដៅរបស់ខ្លួន ក្នុងការមកដល់នៃភ្ញៀវទេសចរអន្តរជាតិ ចំនួនជាង ១៦ លាននាក់ ជាមួយនឹងប្រាក់ចំណូល ពីទេសចរណ៍ ចំនួន ៤៩,២ ពាន់លាន រីងហ្គីត (RM)។
លោកស្រី ឆាយ ស៊ីវលីន ប្រធានសមាគមទេសចរណ៍កម្ពុជា (CATA) បានថ្លែងផង ដែរថាៈ វេទិកាភ្ជាប់បណ្តាញវិស័យទេសចរណ៍នេះ ជាព្រឹត្តិការណ៍ថ្មីមួយទៀត ដើម្បីពង្រឹងកិច្ចសហប្រតិបត្តិការរវាងកម្ពុជា និងម៉ាឡេស៊ី នៅក្នុងឧស្សាហកម្ម ទេសចរណ៍។ ជំនួបនេះដើរតួនាទីយ៉ាងសំខាន់ ក្នុងការផ្តល់ឱកាសដ៏អស្ចារ្យ ធ្វើឱ្យកិច្ចសហការ កាន់តែជិតស្និទ្ធ និងការយោគយល់គ្នា ក្នុងចំណោមអ្នកប្រកបរបរ ទទួលទាន លើវិស័យទេសចរណ៍។
លោកស្រី ឆាយ ស៊ីវលីន បានបន្ថែមថាៈ ម៉ាឡេស៊ី តែងតែជាជម្រើស Top 4 សម្រាប់ប្រជាជនកម្ពុជា សម្រាប់ការធ្វើដំណើរ ក្នុងគោលបំណងផ្សេងៗ ដូចជា សម្រាកលំហែ ក្រេបទឹកឃ្មុំ ពិនិត្យសុខភាព និងជំនួញ ។
នាឱកាសនោះដែរ លោកស្រី ពត រ៉ានី ប្រធានផ្នែកទីផ្សារ នៃក្រុមប្រឹក្សាផ្សព្វផ្សាយ ទេសចរណ៍ ម៉ាឡេស៊ីនៅកម្ពុជា បានឱ្យដឹងដែរថាៈ ពួកយើងនឹងផ្តល់ជាកម្លាំងចិត្ត ចាំជំរុញញនិងគាំទ្រគំនិតផ្តួចផ្ដើមកញ្ចប់ទេសចរណ៍ថ្មីៗដើម្បីនាំភ្ញៀវទេសចរកម្ពុជាឱ្យកាន់តែច្រើនទៅកាន់ប្រទេសម៉ាឡេស៊ី។ យើងសង្ឃឹមថានឹងជំរុញទឹកចិត្តដៃគូ ពាណិជ្ជកម្មទេសចរណ៍របស់យើង ឱ្យផ្សព្វផ្សាយវិស័យទេសចរណ៏ម៉ាឡេស៊ី ប្រកបដោយទំនុកចិត្ត ដើម្បីជាលទ្ធផលជោគជ័យ នៅកម្ពុជាវិញ។
លោកស្រី រ៉ានី បានបន្ថែមដែរថាៈ ជើងហោះហើរត្រង់ពីកម្ពុជា ទៅកាន់ទីក្រុងគូឡាឡាំពួ ដែលនឹងត្រូវបានផ្ដល់ ជូនបន្ថែមទៀត ពីក្រុមហ៊ុនអាកាសចរណ៍ម៉ាឡេស៊ី Malaysia Airlines, AirAsia ក៏ដូចជា ក្រុមហ៊ុនអាកាសចរណ៍ក្នុងស្រុក នាពេលខាងមុខនេះ សម្រាប់ជម្រើសនៃទិសដៅ និងកញ្ចប់ដំណើរកម្សាន្ត ទៅកាន់ប្រទេសម៉ាឡេស៊ី។ ហើយក៏ដើម្បីធានាថា ការិយាល័យក្រុមប្រឹក្សាផ្សព្វផ្សាយទេសចរណ៍ម៉ាឡេស៊ី របស់យើងនៅភ្នំពេញ នឹងជួយជម្រុញ និងគាំទ្រគំនិតផ្ដួចផ្ដើមកញ្ចប់ទេសចរណ៍ថ្មីៗ ដើម្បីនាំភ្ញៀវទេសចរកម្ពុជា ឱ្យកានតែច្រើន ទៅទស្សនប្រទេសម៉ាឡេស៊ី។
សូមបញ្ជាក់ថា ក្នុងឆ្នាំ២០១៩ ម៉ាឡេស៊ី បានស្វាគមន៍ការមកដល់ពីកម្ពុជា ចំនួន ៩៧.០៩៧ នាក់។ ភ្ញៀវទេសចរកម្ពុជា ចំនួន ៣៩.៨២៣ នាក់ ត្រូវបានកត់ត្រា ទៅកាន់ប្រទេសម៉ាឡេស៊ី បន្ទាប់ពីការបើកព្រំដែនអន្តរជាតិរបស់ម៉ាឡេស៊ី ឡើងវិញ ក្នុងខែមេសា ឆ្នាំ២០២២ ៕/V.mara
