ប្រែសម្រួលៈបំណង(ដេល្លីម៉េល)៖រដ្ឋមន្ត្រីការបរទេសចិនលោក វ៉ាង យី បានអំពាវនាវអោយហ្វីលីពីនធ្វើការជាមួយចិនដើម្បីស្វះស្វែងរកផ្លូវមានប្រសិទ្ធភាពមួយ ក្នុងបំណងបន្ថយភាពតានតឹងនៅសមុទ្រចិនខាងត្បូង នេះបើតាមការផ្សាយរបស់ទីភ្នាក់ងារសារព័ត៌មានស៊ីនហួរចិនកាលពីថ្ងៃសៅរ៍។
ការអំពាវនាវរបស់ប្រមុខការទូតចិនកើតឡើងចំពេលភាពតានតឹងរវាងប្រទេសទាំងពីរកើនឡើងដោយសារតែទីតាំងនាវាជាប់កឿងមួយដែលហ្វីលីពីនប្រើជាប៉ុស្តិ៍ប៉មយោធាជួរមុខរបស់ខ្លួនមួយនៅសមុទ្រចិនខាងត្បូង តែចិនទាមទារអោយអូសយកចេញដោយសារវាស្ថិតក្នុងដែនអធិបតេយ្យភាពរបស់ខ្លួន។
លោកវ៉ាងបានអំពាវនាវដូច្នេះក្នុងអំឡុងពេលលោកធ្វើទស្សនកិច្ចម៉ាឡេស៊ីកាលពីថ្ងៃសុក្រ
ស៊ីនហួរបាននិយាយថា លោកវ៉ាងបាននិយាយថា ចិនបានសម្តែងឆន្ទៈម្តងហើយម្តងទៀតចង់ដោះស្រាយការខ្វែងគំនិតគ្នាជាមួយហ្វីលីពីនតាមការចរចា ដោយសង្ឃឹមថារដ្ឋាភិបាលទីក្រុងម៉ានីលនឹងគោរពការមូលមតិគ្នាគ្នាមួយដែលត្រូវបានសំរេចឡើងកាលពីអតីតកាល។
សូមបញ្ជាក់ថា ហ្វីលីពីននៅឆ្នាំ១៩៩៩បានបើកនាវាចម្បាំងកញ្ចាស់សម័យសង្គ្រាមលោកលើកទីពីរ Sierra Madreទៅដាក់ចោលលើតំបន់ថ្មប៉ប្រះទឹកថូម៉ាស សូលទីពីរ(Second Thomas Shoal)នៅក្នុងតំបន់សេដ្ឋកិច្ចផ្តាច់មុខរបស់ខ្លួន ក្នុងបំណងអះអាងអធិបតេយ្យភាពលើតំបន់ប្រទាញប្រទង់នោះ។ទាហានហ្វីលីពីនមួយក្រុមតូចត្រូវបានដាក់អោយឈរជើងនៅទីនោះនិងការដូរវេនព្រមទាំងការដឹកជញ្ជូនស្បៀងទៅអោយត្រូវបានធ្វើឡើងជាប្រចាំ។
ចិនដែលអះអាងកម្មសិទ្ធិលើតំបន់នេះដែរកាលពីសប្តាហ៍មុនបានប្រើនាវាឆ្មាំសមុទ្របាញ់ទឹករារាំងនាវានិងទូកដឹកស្បៀងហ្វីលីពីនទៅកាន់នាវាSierra Madreនិងបានទាមទារអោយហ្វីលីពីនយកនាវានេះចេញ តែប្រធានាធិបតីហ្វីលីពីនបដិសេធនិងយោធាប្រទេសនេះបាននិយាយថា ខ្លួននឹងបញ្ជូនទូកដឹកស្បៀងទៅកាន់នាវាច្រែសចាប់នេះជាថ្មីនៅសប្តាហ៍ក្រោយ៕
នាវាឆ្មាំសមុទ្រហ្វីលីពីន នៅក្បែរនាវាជាប់កឿងSierra Madreក្នុងសមុទ្រចិនខាងត្បូង