ប្រែសម្រួល : កញ្ញាដាលីស (ដេល្លីម៉េល) ៖ ប្រធានក្រុមជម្រើសជាតិអង់គ្លេស ហារី ខេន (Harry Kane) បាននិយាយកាលពីថ្ងៃអាទិត្យថា រូបគេប្រហែលជាត្រូវការពេលវេលាដើម្បីសម្របខ្លួនទៅនឹងបាល់ទាត់អាល្លឺម៉ង់បន្ទាប់ពីការចាញ់ក្នុងការប្រកួតដំបូងរបស់គេសម្រាប់ក្រុម Bayern Munich ហើយនឹងមិន “ភ័យស្លន់ស្លោ” ទេ ប្រសិនបើរូបគេមិនអាចស៊ុតបញ្ចូលទី។
ខេនបានប្តូរចូលក្នុងនាមកីឡាករបម្រុងនៅនាទីទី ៦៤ ក្នុងបរាជ័យ ៣-០ ក្រោមស្នាដៃក្រុម Leipzig ក្នុងពានរង្វាន់ German Super Cup កាលពីថ្ងៃសៅរ៍ បន្ទាប់ពីត្រូវបានបញ្ជាក់ជាកីឡាកររបស់ Bayern កាលពីព្រឹកថ្ងៃសុក្រ។
រូបគេបាននិយាយថា “ជាក់ស្តែង ខ្ញុំបានចំណាយពេលពេញមួយអាជីពរបស់ខ្ញុំ ពេញមួយជីវិតរបស់ខ្ញុំ នៅក្នុងប្រទេសអង់គ្លេស និងនៅក្នុងក្របខណ្ឌ Premier League ដូច្នេះវាអាចត្រូវការពេលដើម្បីសម្របខ្លួនបន្តិច ដើម្បីឱ្យស៊ាំទៅនឹងលីកថ្មី”។
“សម្រាប់ខ្ញុំ វាគ្រាន់តែជាការតាំងទីលំនៅឱ្យបានងាយស្រួលតាមដែលអាចធ្វើទៅបាន ការស្វែងយល់ពីប្រភេទក្រុមបាល់ទាត់ផ្សេងៗ របៀបដែលខ្ញុំត្រូវលេង និងសម្របខ្លួន។ ខ្ញុំបានធ្វើវាពេញមួយអាជីពរបស់ខ្ញុំ មិនថាជាមួយ Tottenham ឬក្រុមជម្រើសជាតិ ហើយខ្ញុំនឹងធ្វើវាបាននៅទីនេះ”។
ខេនបានសារភាពថា វាគឺជា “ការសម្រេចចិត្តដ៏លំបាក” ក្នុងការចាកចេញពី Tottenham បន្ទាប់ពី ១៩ ឆ្នាំ ទោះបីជាមិនបានឈ្នះពានរង្វាន់ណាមួយក្នុងអំឡុងពេលដែលរូបគេនៅក្លិបភាគខាងជើងទីក្រុងឡុងដ៍ក៏ដោយ ដោយបានឡើងត្រឹមប្រកួតវគ្គផ្តាច់ព្រ័ត្រ Champions League ឆ្នាំ ២០១៩ ម្តង តែចាញ់ក្រោមស្នាដៃក្រុម Liverpool។
រូបគេបានបន្ថែមថា Bayern នឹងក្លាយជា “ការខកចិត្ត” ប្រសិនបើបញ្ចប់រដូវកាលដោយគ្មានពាន៕
ខេនអះអាងថាខ្លួនត្រូវការពេលដើម្បីសម្របខ្លួននឹងលីកអាល្លឺម៉ង់