ប្រែសម្រួល : កញ្ញាដាលីស (ប៊ីប៊ីស៊ី) ៖ លោក ម៉ាក ហ្សាក់ឃើបឺក បាននិយាយថា អេឡុន ម៉ាស “មិនសូវចង់” ប្រយុទ្ធដាក់ក្នុងទ្រុងទេ ហើយអ៊ីចឹង “វាដល់ពេលត្រូវបន្តទៅមុខហើយ”។
នៅក្នុងសារបង្ហោះនៅលើវេបសាយបណ្តាញសង្គម Threads ថៅកែ Meta រូបនេះបាននិយាយថា គាត់បានផ្តល់ជូនលោកម៉ាសនូវ “កាលបរិច្ឆេទពិតប្រាកដ” ប៉ុន្តែសហគ្រិនជាគូប្រជែងបានរកលេសដោះសារ។
មហាសេដ្ឋីទាំងពីរបានយល់ព្រមប្រកួតដាក់ទ្រុងកាលពីខែមិថុនា ជាហេតុបង្កការចាប់អារម្មណ៍យ៉ាងខ្លាំងពីប្រព័ន្ធផ្សព្វផ្សាយនានា។
ប៉ុន្តែត្បិតញ៉ោះគ្នាជាច្រើនខែក៏ពិតមែន ក៏ប៉ុន្តែគូប្រជែងទាំងពីរមិនទាន់កំណត់ថ្ងៃប្រកួតបាននៅឡើយទេ ដោយធ្វើឱ្យមានការសង្ស័យថាតើការប្រកួតអាចនឹងកើតឡើងទេ។
សង្គ្រាមពាក្យសម្តីនេះត្រូវបានធ្វើឱ្យស្មុគស្មាញឡើងដោយការបើកដំណើរការ Threads ក្នុងខែកក្កដា ដោយកម្មវិធីផ្ញើសារជាគូប្រជែងរបស់ X បានទាក់ទាញអ្នកចុះឈ្មោះជាង ១០០ លាននាក់ក្នុងរយៈពេលតិចជាងមួយសប្តាហ៍។
ចំនួននេះបានធ្លាក់ចុះវិញ ហើយ X នៅតែនាំមុខយ៉ាងរំភើយ ជាមួយនឹងអ្នកប្រើប្រាស់ប្រហែល ៣៥០ លាននាក់ ប៉ុន្តែលោកម៉ាសបានគំរាមប្តឹង Facebook ពីបទ “លួចយកអាថ៌កំបាំងពាណិជ្ជកម្មរបស់ Twitter ដោយខុសច្បាប់”។
ក្រុមហ៊ុន Meta បានបដិសេធការចោទប្រកាន់នេះ។
កាលពីសប្តាហ៍មុន លោកហ្សាក់ឃើបឺកបាននិយាយថា លោកបានស្នើសុំថ្ងៃទី ២៦ ខែសីហាសម្រាប់ការប្រយុទ្ធក្នុងទ្រុង។ បន្ទាប់មកនៅក្នុងព្រឹត្តិការណ៍ក្រឡាប់ចាក់មួយកាលពីថ្ងៃសុក្រ រដ្ឋមន្ត្រីក្រសួងវប្បធម៌របស់អ៊ីតាលីបាននិយាយថា គាត់បាននិយាយទៅកាន់លោកម៉ាសអំពីការធ្វើជាម្ចាស់ផ្ទះការប្រកួតនៅក្នុងប្រទេសជាព្រឹត្តិការណ៍សប្បុរសធម៌។
លោកម៉ាសបានផ្តល់យោបល់ថា វានឹងមាន “រូបភាពទីក្រុងរ៉ូមបុរាណពីក្រោយទ្រុងប្រកួត”។
ទោះយ៉ាងណា កាលពីថ្ងៃអាទិត្យ ថៅកែ Meta បានបង្ហោះនៅលើ Threads ថា “អេឡុននឹងមិនបញ្ជាក់កាលបរិច្ឆេទទេ បន្ទាប់មកនិយាយថាគាត់ត្រូវការការវះកាត់ ហើយឥឡូវសុំឱ្យហ្វឹកហាត់នៅទីធ្លាក្រោយផ្ទះខ្ញុំជំនួសវិញ”។
“ប្រសិនបើអេឡុនធ្លាប់យកចិត្តទុកដាក់ចំពោះកាលបរិច្ឆេទពិតប្រាកដ និងព្រឹត្តិការណ៍ផ្លូវការ គាត់ដឹងពីរបៀបទាក់ទងខ្ញុំ។ បើមិនដូច្នេះទេវាដល់ពេលត្រូវបន្តទៅមុខហើយ។ ខ្ញុំនឹងផ្តោតលើការប្រកួតជាមួយមនុស្សដែលយកចិត្តទុកដាក់ខ្លាំងពីកីឡា”។
ទោះយ៉ាងណា ឆ្លើយតបនៅលើ X លោកម៉ាសបានហៅថៅកែ Meta ថា “មាន់”៕
ហ្សាក់ឃើបឺក (ឆ្វេង) និង ម៉ាស
ហ្សាក់ឃើបឺក ថាលោកម៉ាស មិនហ្មត់ចត់សោះរឿងប្រកួតគ្នា