ដោយ៖ សុវណ្ណកុម្ភៈ / ភ្នំពេញ៖ នៅថ្ងៃទី១៥ សីហា នេះ ក្រុមបាល់ទាត់ជម្រើសជាតិ អាយុក្រោម២៣ឆ្នាំកម្ពុជា បានធ្វើដំណើរទៅកាន់ប្រទេសថៃហើយ។
កម្ពុជា ត្រូវចូលរួមក្នុងព្រឹត្តិការណ៍ AFF U23 Championship 2023 នៅប្រទេសថៃ ដែលនឹងចាប់ផ្ដើមប្រកួត ចាប់ពីថ្ងៃទី ១៧ដល់ ២៦ ខែសីហា ឆ្នាំ២០២៣។
ព្រឹត្តិការណ៍នេះ អវត្តមានតែក្រុមសឹង្ហបូរី មួយប៉ុណ្ណោះ។ កម្ពុជា ស្ថិតនៅពូល A ជាមួយក្រុមថៃ ដែលជាម្ចាស់ផ្ទះ ប្រ៊ុយណេ និងមីយ៉ាន់ម៉ា។ ចំពោះពូល B វិញ មានទីម័រខាងកើត ម៉ាឡេស៊ី និងឥណ្ឌូនេស៊ី។ ចំពោះពូល C មានក្រុមវៀតណាម ហ្វីលីពីន និង ឡាវ ។
សម្រាប់ពូលនីមួយៗ ត្រូវយកមួយក្រុម ដែលមានពិន្ទុល្អជាងគេ ឡើងទៅលេងវគ្គពាក់កណ្ដាលផ្ដាច់ព្រ័ត្រ ហើយដើម្បីបាន ៤ ក្រុម លេងនៅវគ្គពាក់កណ្ដាលផ្ដាច់ព្រ័ត្រនេះ សហព័ន្ធបាល់ទាត់អាស៊ីអាគ្នេយ៍ (AFF) នឹងជ្រើសរើសយកក្រុមចំណាត់ថ្នាក់លេខ២ នៃពូលណាមួយ ក្នុងចំណោមពូលទាំង ៣ ដើម្បីទៅបង្គ្រប់ ៤ ក្រុម សម្រាប់លេងវគ្គ ៤ក្រុម ចុងក្រោយនេះ។
កម្ពុជា នឹងត្រូវហ្វឹកហាត់ នាល្ងាចថ្ងៃទី១៥ សីហានេះ មួយពេល នៅប្រទេសថៃ និងហាត់ស្អែកថ្ងៃទី១៦ សីហា មួយថ្ងៃទៀត មុនប្រកួតជាមួយប្រ៊ុយណេ ថ្ងៃទី១៧ សីហា និងជួបជាមួយ មីយ៉ាន់ម៉ា ថ្ងៃទី១៩ សីហា និងប្រកួតបញ្ចប់ពូល ជាមួយក្រុមម្ចាស់ផ្ទះថៃ ថ្ងៃទី២១ សីហា៕/V-PC
