ប្រែសម្រួល : កញ្ញាដាលីស (ដេល្លីម៉េល) ៖ រយៈពេលហោះហើរអតិបរមារបស់ដ្រូននេះគឺ ៦ ម៉ោង ដោយវាដំណើរការដោយប្រេងឥន្ធនៈ ជាអ្វីដែលអាចឱ្យប្រតិបត្តិករធ្វើការសកម្មភាពឈ្លបយកការណ៍យ៉ាងយកចិត្តទុកដាក់លើតំបន់ជាក់លាក់ណាមួយ។
ក្រុមហ៊ុនរុស្ស៊ី Svyaz-Spetszashchita (Communication-Special Defense) បានបង្កើតដ្រូនថ្មីនេះឡើង ដែលអាចប្រើជាមួយទាំងអាគុយនិងសាំង នេះបើតាមប្រធានផ្នែកទីផ្សាររបស់ក្រុមហ៊ុន លោក ឌីមីទ្រី ហ្ស៊ូបារ៉េវ (Dmitry Zubarev) ប្រាប់ទៅទីភ្នាក់ងារសារព័ត៌មាន Sputnik កាលពីថ្ងៃអង្គារ។
ដ្រូនទ្វេបំណងនេះ (ដែលមានន័យថាវាត្រូវបានរចនាឡើងសម្រាប់គោលដៅស៊ីវិលឬយោធា) បច្ចុប្បន្នកំពុងដាក់តាំងបង្ហាញនៅវេទិកាបច្ចេកទេសយោធា Army-2023 នៅទីប្រជុំជនគូប៊ីនកា (Kubinka) នៅខាងក្រៅទីក្រុងមូស្គូ។
លោកហ្ស៊ូបារ៉េវបាននិយាយថា “ដោយសារតែដ្រូន (UAV) នេះដំណើរការដោយប្រេងសាំង ពេលវេលាហោះហើរអតិបរមារបស់វាគឺរហូតដល់ ៦ ម៉ោង ដោយធ្វើឱ្យវាអាចអនុវត្តការងារទាក់ទងនឹងឈ្លបប្រកបដោយប្រសិទ្ធភាព”។
លោកបានសង្កត់ធ្ងន់ថា UAV មានសមត្ថភាពដឹកជញ្ជូនដ្រូនវាយប្រហារតូចៗចំនួនពីរ នៅក្នុងអ្វីដែលលោកហ្ស៊ូបារ៉េវពណ៌នាថាជា “លក្ខណៈពិសេសដែលចង់បានខ្លាំងនាពេលបច្ចុប្បន្ននេះ”។
លោកហ្ស៊ូបារ៉េវបានពន្យល់ថា “នៅពេលប្រទះឃើញវត្ថុគួរឱ្យចាប់អារម្មណ៍ UAV បញ្ជូនដ្រូនតូចមួយទៅកាន់តំបន់ដែលវត្ថុនោះត្រូវបានតាមដាន រួចហើយត្រឡប់ទៅមូលដ្ឋានវិញ” ដោយបន្ថែមថា UAV ត្រូវបានបំពាក់ដោយប្រព័ន្ធកំណត់អត្តសញ្ញាណវត្ថុផ្អែកលើបណ្តាញប្រសាទ។
ដ្រូនវាយប្រហារផ្សេងៗឥឡូវនេះត្រូវបានប្រើប្រាស់យ៉ាងទូលំទូលាយដោយកងកម្លាំងប្រដាប់អាវុធរុស្ស៊ីនៅក្នុងតំបន់ប្រតិបត្តិការយោធាពិសេសក្នុងប្រទេសអ៊ុយក្រែន៕
ដ្រូនថ្មីរបស់រុស្ស៊ីអាចបើកបាន ៦ ម៉ោង និងបំពាក់ប្រព័ន្ធកំណត់អត្តសញ្ញាណវត្ថុផ្អែកលើបណ្តាញប្រសាទ