ប្រែសម្រួល : កញ្ញាដាលីស (ដេល្លីម៉េល) ៖ សេតវិមានបាននិយាយកាលពីថ្ងៃពុធថា ប្រធានាធិបតី ចូ បៃដិន នឹងធ្វើដំណើរទៅកាន់កោះហាវ៉ៃនៅសប្តាហ៍ក្រោយ ដើម្បីជួបជាមួយអ្នករស់រានមានជីវិតពីភ្លើងឆេះព្រៃដ៏រន្ធត់ ហើយអ្នកឆ្លើយតបដំបូងនៅតែកំពុងតាមស្វែងរកសាកសព។
អគ្គិភ័យកាលពីសប្តាហ៍មុនបានពង្រាបទីប្រជុំជនប្រវត្តិសាស្ត្រឡាហៃណា (Lahaina) នៅលើកោះម៉ោអ៊ី (Maui) និងជាការស្លាប់ច្រើនបំផុតនៅក្នុងសហរដ្ឋអាម៉េរិកក្នុងរយៈពេលជាងមួយសតវត្សរ៍។ ចំនួនអ្នកស្លាប់ ១០៦ នាក់ត្រូវគេរំពឹងថានឹងបន្តកើនឡើងទៀតក្នុងប៉ុន្មានថ្ងៃខាងមុខនេះ។
រហូតមកទល់ពេលនេះ មានតែជនរងគ្រោះចំនួន៥ នាក់ប៉ុណ្ណោះត្រូវបានកំណត់អត្តសញ្ញាណ ដែលក្នុងនោះ២នាក់ត្រូវបានមន្ត្រីតំបន់ម៉ោអ៊ីខោនធី (Maui County) កំណត់ឈ្មោះបាន គឺ រ៉ូបឺត ឌីកមែន (Robert Dyckman) អាយុ ៧៤ ឆ្នាំ និង បាត់ឌី ចាន់តុក (Buddy Jantoc) អាយុ ៧៩ ឆ្នាំ ទាំងពីរនាក់គឺមកពីឡាហៃណាដូចគ្នា។
គ្រួសាររបស់លោកចាន់តុកបានពណ៌នាគាត់ថាជាតន្ត្រីករ ដែលធ្លាប់បានធ្វើដំណើរជាមួយតារាចម្រៀង កាឡូស សាន់តាណា (Carlos Santana)។
យោងតាមកាសែត The New York Times កូនប្រសាស្រីរបស់គាត់ ឈ្មោះ សារី ចាន់តុក (Shari Jantoc) បាននិយាយថា “ខ្ញុំសង្ឃឹមថាគាត់នឹងសម្រាន្តលក់។ ខ្ញុំសង្ឃឹមចំពោះព្រះថាគាត់នឹងមិនរងទុក្ខ”។
ក្រុមអ្នកជំនាញផ្នែកកោសល្យវិច្ច័យ ដែលខ្លះធ្លាប់ធ្វើការបន្ទាប់ពីការវាយប្រហារ ៩/១១ បានហោះទៅកាន់ទីប្រជុំជនម៉ោអ៊ី ខណៈកិច្ចខិតខំប្រឹងប្រែងត្រូវបានបង្កើនដើម្បីកំណត់អត្តសញ្ញាណសាកសព ដែលខ្លះឆេះខ្លោចមើលលែងស្គាល់៕
ទីប្រជុំជនឡាហៃណាឆេះក្លាយជាផេះ