ប្រែសម្រួលៈបំណង(ដេល្លីម៉េល)៖មេដឹកនាំចិនលោក ស៊ី ជីពីង នឹងធ្វើទស្សនកិច្ចផ្លូវរដ្ឋនៅអាហ្វ្រិកខាងត្បូងនាសប្តាហ៍ក្រោយហើយក៏នឹងចូលរួមជំនួបកំពូលរបស់ប្លុកប្រទេសមានសេដ្ឋកិច្ចកំពុងងើបស្ទុះហៅថាប្រ៊ិក(BRICS)នៅទីក្រុង ចូហាណេស្ប៊ឺក។
សូមបញ្ជាក់ថា អាហ្វ្រិកបានលេចធ្លោឡើងជាសមរភូមិការទូតថ្មីមួយ ដោយលោកខាងលិច រុស្ស៊ីនិងចិនកំពុងប្រជែងឥទ្ធិពលគ្នានៅទីនោះ ចំពេលមានការប្រកួតប្រជែងគ្នាខ្លាំងឡើងដើម្បីប្រភពធនធានរ៉ែនិងការបែកបាក់អន្តរជាតិជំរុញឡើងដោយសង្គ្រាមនៅអ៊ុយក្រែន។
អ្នកនាំពាក្យក្រសួងការបរទេសចិនលោកស្រី ហួរ ជុនយីង បាននិយាយនៅក្នុងសេចក្តីថ្លែងការណ៍តាមអនឡាញថា «តាមការអញ្ជើញរបស់ប្រធានាធិបតីអាហ្វ្រិកខាងត្បូងលោកស៊ីរីល រ៉ាម៉ាផូសា(Cyril Ramaphosa) ប្រធានាធិបតីស៊ី ជីនពីង នឹងទៅចូលរួមជំនួបកំពុលប្រ៊ិកលើកទី១៥នៅទីក្រុងចូហាណេស្ប៊ឺក ប្រទេសអាហ្វ្រិកខាងត្បូងចាប់ពីថ្ងៃ២១ដល់២៤សីហា»។
វានឹងជាដំណើរចេញក្រៅប្រទេសលើទីពីររបស់លោកស៊ីនៅក្នុងឆ្នាំ២០២៣នេះ ក្រោយលោកធ្វើទស្សនកិច្ចរុស្ស៊ីកាលពីខែមីនា។
ប្រមុខរដ្ឋប្រទេសប្រេស៊ីល ចិន ឥណ្ឌានិងអាហ្វ្រិកខាងត្បូង បូករួមទាំងអ្នកការទូតកំពូលរុស្ស៊ី នឹងជួបជុំគ្នាចាប់ពីថ្ងៃ២២ដល់២៤សីហានៅក្រោមប្រធានបទ«BRICS និងអាហ្វ្រិក» នេះបើតាមការអះអាងពីរដ្ឋមន្ត្រីការបរទេសអាហ្វ្រិកខាងត្បូង។
ពីមុនលោកស៊ីបានធ្វើទស្សនកិច្ចអាហ្វ្រិកខាងត្បូងនៅឆ្នាំ២០១៨ នៅពេលលោកស្វះស្វែងជំរុញទំនាក់ទំនងការទូតនិងសេដ្ឋកិច្ចជាមួយទ្វីបនេះ។
លើរបៀបវារនៃជំនួបកំពូលនៅចូហាណេស្ប៊ឺក អាចជាការពង្រីកសមាជិកភាពBRICSនាពេលអនាគត ដោយសារប្រទេសអាហ្វ្រិកជាច្រើនកន្លងមកបានបង្ហាញបំណងចូលរួមក្នុងប្លុកនេះ រួមមានអាល់ហ្សេរី អេហ្ស៊ីបនិងអេត្យូពី។
កាលពីខែកក្កដា ចិនបានទទួលប្រធានាធិបតីអាល់ហ្សេរីនៅក្រុងប៉េកាំងនិងបានប្រកាសក្នុងសេចក្តីថ្លែងការណ៍រួមថា «ចិនស្វាគមន៍បំណងរបស់អាល់ហ្សេរីក្នុងការចូលរួមBRICS»។
BRICSដែលមើលឃើញខ្លួនឯងជាក្រុមមួយសំរាប់ទប់ទល់នឹងឧត្តមភាពសេដ្ឋកិច្ចលោកខាងលិច ជាការផ្សំតួអក្សរចេញមកពី Brazil, Russia, India, China និង South Africa៕