ប្រែសម្រួល : កញ្ញាដាលីស (ដេល្លីម៉េល) ៖ រដ្ឋមន្ត្រីការបរទេសរុស្ស៊ី លោក សឺហ្គេ ឡាវរ៉ូវ បាននិយាយថា ការកាន់កាប់អាវុធនុយក្លេអ៊ែរបានការពារប្រទេសរុស្ស៊ីពីការគំរាមកំហែងផ្នែកសន្តិសុខ ហើយរដ្ឋាភិបាលក្រុងមូស្គូនៅតែបន្តរំលឹកលោកខាងលិចអំពីហានិភ័យដើម្បីទប់ស្កាត់ជម្លោះរបស់ពួកមហាអំណាចនុយក្លេអ៊ែរ។
លោកឡាវរ៉ូវបាននិយាយនៅក្នុងបទសម្ភាសន៍មួយសម្រាប់ទស្សនាវដ្ដីរបស់រដ្ឋ The International Affairs ដែលបានចេញផ្សាយកាលពីព្រឹកថ្ងៃសៅរ៍ទី១៩សីហា នៅលើវេបសាយរបស់ក្រសួងការបរទេសថា “ការកាន់កាប់អាវុធនុយក្លេអ៊ែរនាពេលបច្ចុប្បន្ននេះ គឺជាការឆ្លើយតបតែមួយគត់ដែលអាចធ្វើទៅបានចំពោះការគំរាមកំហែងពីខាងក្រៅសំខាន់ៗមួយចំនួនចំពោះសន្តិសុខនៃប្រទេសរបស់យើង”។
កាលពីខែមុន អតីតប្រធានាធិបតីរុស្ស៊ី លោក ឌីមីទ្រី មេតវេដេវ បាននិយាយថា រដ្ឋាភិបាលក្រុងមូស្គូនឹងត្រូវប្រើអាវុធនុយក្លេអ៊ែរ ប្រសិនបើការវាយលុករបស់អ៊ុយក្រែនប្រឆាំងនឹងកងទ័ពរុស្ស៊ីទទួលបានជោគជ័យ។
ប្រទេសលោកខាងលិចកំពុងផ្តល់អាវុធដល់អ៊ុយក្រែន ខណៈដែលពួកគេព្យាយាមដណ្តើមយកទឹកដីដែលរុស្ស៊ីបានកាត់យកជាឯកតោភាគីចាប់តាំងពីការឈ្លានពានប្រទេសជិតខាងរបស់ខ្លួនកាលពីខែកុម្ភៈឆ្នាំ ២០២២។
លោកឡាវរ៉ូវបាននិយាយថា សហរដ្ឋអាម៉េរិកនិងសម្ពន្ធមិត្តណាតូប្រថុយប្រឈមមុខនឹង “ស្ថានភាពតទល់គ្នាដោយអាវុធនុយក្លេអ៊ែរដោយផ្ទាល់របស់ពួកមហាអំណាចនុយក្លេអ៊ែរ”។
លោកឡាវរ៉ូវបាននិយាយថា “យើងជឿថាការវិវត្តបែបនេះគួរតែត្រូវបានរារាំង។ នោះហើយជាមូលហេតុដែលយើងត្រូវរំលឹកអំពីអត្ថិភាពនៃហានិភ័យផ្នែកយោធានិងនយោបាយកម្រិតខ្ពស់ ហើយបញ្ជូនសញ្ញាប្រុងប្រយ័ត្នទៅកាន់គូប្រជែងរបស់យើង”។
ប្រធានាធិបតីអាម៉េរិក ចូ បៃដិន បានហៅការគំរាមកំហែងរបស់រុស្ស៊ីដោយប្រើអាវុធនុយក្លេអ៊ែរកលយុទ្ធថា “ពិតប្រាកដ” ខណៈប្រធានអង្គការណាតូលោក ជែន ស្តូលធិនបឺក (Jens Stoltenberg) បាននិយាយនៅសប្តាហ៍នេះថា សម្ពន្ធមិត្តយោធានេះមិនបានរកឃើញការចល័តទីណាមួយរបស់កងកម្លាំងនុយក្លេអ៊ែររុស្ស៊ីទេ៕
រដ្ឋមន្ត្រីការបរទេសរុស្ស៊ី លោក សឺហ្គេ ឡាវរ៉ូវ ថាអាវុធនុយក្លេអ៊ែរគឺទុកឆ្លើយតបនឹងការគំរាមពីខាងក្រៅ