ប្រែសម្រួល : កញ្ញាដាលីស (ដេល្លីម៉េល) ៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានប្តេជ្ញាសងសឹករុស្ស៊ី បន្ទាប់ពីពួកគេបានបាញ់មីស៊ីលទៅលើទីក្រុងមួយ ដែលសម្លាប់មនុស្ស ៧នាក់ និងបង្ករបួសជាង១០០នាក់។
លោកហ្សេលេនស្គីបានសន្យានៅក្នុងសុន្ទរកថាតាមវីដេអូកាលពីព្រឹកថ្ងៃអាទិត្យទី២០សីហាថា ទាហានអ៊ុយក្រែននឹង “ឆ្លើយតបជាក់ស្តែង” ចំពោះការវាយប្រហារទៅលើរោងមហោស្រពនិងទីលានសាធារណៈក្នុងទីក្រុងឆឺនីហ៊ីវ (Chernihiv) ភាគខាងជើង កាលពីថ្ងៃសៅរ៍។
លោកបានបន្ថែមថា “ចូរយើងប្រឹងប្រែងបន្ថែមទៀតដើម្បីបង្រួបបង្រួមពិភពលោកប្រឆាំងនឹងភេរវកម្មរបស់រុស្ស៊ី។ សូមជួយផ្តល់ឱ្យរដ្ឋយើងកាន់តែច្រើន ដើម្បីការពារអាយុជីវិត។ រុស្ស៊ីត្រូវតែចាញ់សង្គ្រាមនេះដើម្បីឱ្យអាយុជីវិតជាអ្នកឈ្នះ”។
ថ្លែងនៅចុងបញ្ចប់នៃដំណើរទស្សនកិច្ចទៅកាន់ប្រទេសស៊ុយអែត ប្រធានាធិបតីអាយុ ៤៥ ឆ្នាំរូបនេះបានបញ្ជាក់ថា កុមារ ១៥ នាក់បានស្ថិតក្នុងចំណោមអ្នករងរបួសហើយក៏បានបញ្ចេញឈ្មោះក្មេងស្រីសូហ្វីយ៉ា (Sofia) អាយុ៦ឆ្នាំថាជាមនុស្សម្នាក់ក្នុងចំណោមអ្នកស្លាប់ក្នុងសោកនាដកម្មនេះផងដែរ។
ក្នុងចំណោមជនរងគ្រោះក៏មានជនស៊ីវិលជាច្រើននាក់ផងដែរដែលកំពុងប្រារព្ធពិធីបុណ្យសាសនាគ្រិស្តអូស្សូដក់ (Orthodox) នៅព្រះវិហារក្បែរនោះ ដែលរងការខូចខាតរួមជាមួយនឹងអគារសាកលវិទ្យាល័យមួយ។
អភិបាលនៃតំបន់ទីក្រុងឆឺនីហ៊ីវ លោក វីយ៉ាឆេស្លាវ ឆូស (Vyacheslav Chaus) បានបង្ហាញថា មនុស្សសរុបចំនួន ១៤៨ នាក់បានរងរបួសនៅក្នុងការវាយប្រហារ ដែលត្រូវបានថ្កោលទោសដោយអង្គការសហប្រជាជាតិថា “សាហាវឃោរឃៅ”។
អ្នកសម្របសម្រួលផ្នែកមនុស្សធម៌របស់អ.ស.បសម្រាប់អ៊ុយក្រែន លោក ដេនីស ប្រោន (Denise Brown) បាននិយាយថា “វាសាហាវណាស់ក្នុងការវាយលុកទីលានសំខាន់ៗនៃទីក្រុងធំមួយទាំងព្រឹក ខណៈដែលមនុស្សកំពុងដើរ និងអ្នកខ្លះកំពុងទៅព្រះវិហារដើម្បីប្រារព្ធពិធីបុណ្យសាសនាសម្រាប់ប្រជាជនអ៊ុយក្រែនភាគច្រើន”។
អ៊ុយក្រែននិយាយថា រុស្ស៊ីបានកំណត់គោលដៅដោយចេតនាលើរោងមហោស្រពនេះ ព្រោះទីកន្លែងនេះកំពុងរៀបចំការប្រមូលផ្តុំនៃក្រុមហ៊ុនផលិតដ្រូន។
អភិបាលក្រុងឆឺនីហ៊ីវ លោក អូឡេកសាន់ឌឺ ឡូម៉ាកូ (Oleksandr Lomako) បានប្រាប់ BBC ថា “ខ្ញុំយល់ថា គោលបំណងរបស់ពួកគេគឺព្រឹត្តិការណ៍យោធា ដែលកើតឡើងនៅក្នុងអគារល្ខោន ហើយវាជាគោលដៅរបស់ពួកគេ”។
លោកបានអះអាងថា រុស្ស៊ីដឹងយ៉ាងច្បាស់ថា ការវាយប្រហារនេះនឹងបណ្តាលឱ្យជនស៊ីវិលស្លាប់។
លោកបន្តថា “វាច្បាស់ណាស់ថា រុស្ស៊ី ដែលបាញ់មីស៊ីលទាំងនោះនិង អ្នកដែលបញ្ជាឱ្យបាញ់ទាំងកណ្តាលថ្ងៃត្រង់ ទៅកាន់ទីក្រុងស៊ីវិល បានដឹងថា ជនរងគ្រោះភាគច្រើននឹងជាជនស៊ីវិល”។
លោកបានបន្ថែមថា “គ្មានវិធីណាផ្សេងក្នុងការបកស្រាយវាក្រៅតែពីឧក្រិដ្ឋកម្មសង្គ្រាមប្រឆាំងនឹងជនស៊ីវិលនោះឡើយ ដែលនេះជាឧក្រិដ្ឋកម្មសង្គ្រាមមួយទៀតរបស់រុស្ស៊ី”៕
