ថ្ម​ថើប​គ្នា​ដ៏​ល្បី​របស់​វៀតណាម​កំពុង​រកកល់​ដួលរលំ​

​ប្រែ​សម្រួល : កញ្ញា​ដា​លី​ស (​ប៊ី​ប៊ីស៊ី​) ៖ របាយការណ៍​មួយ​បាន​ព្រមាន​ថា “​ផ្ទាំង​ថ្ម​ថើប​គ្នា​” ដ៏​ល្បីល្បាញ​របស់​វៀតណាម​នៅ​ចំ​កណ្តាល​ឆកសមុទ្រ​ហា​ឡុង (Ha Long) កំពុង​ប្រឈម​ហានិភ័យ​នៃ​ការដួលរលំ​។​

​ឆកសមុទ្រ​ហា​ឡុង​នៅ​ខេត្ត​ក្វាង​និ​ញ (Quang Ninh) មានកូន​កោះ​តូចៗ​រាប់រយ ដែល​ទាក់ទាញ​ភ្ញៀវទេសចរ​ចំនួន ៤ លាន​នាក់​ក្នុង​ឆ្នាំ ២០១៩​។​

​ថ្ម​ភ្លោះ ដែល​ផុសចេញ​ពី​ឆកសមុទ្រ​និង​ហាក់​ប៉ះគ្នា ឬ “​ថើប​គ្នា​” គឺ មាន​ការពេញនិយម​យ៉ាង​ខ្លាំង​ពី​សំណាក់​អ្នកទស្សនា​។​

​ប៉ុន្តែ​អ្នកជំនាញ​បាន​ព្រមាន​នៅក្នុង​របាយការណ៍​ខែកក្កដា​ថា ការកើនឡើង​កម្រិត​ទឹកសមុទ្រ​និង​ទូក​នេសាទ​ដែល​ធ្វើដំណើរ​កៀក​ពេក កំពុង​ធ្វើ​ឱ្យ​ថ្ម​សឹករេចរឹល​។​

​លោក ហូ ធៀន ជុង (Ho Tien Chung) មក​ពី​វិទ្យាស្ថាន​ភូគព្ភសាស្ត្រ​និង​ធនធាន​រ៉ែ​របស់​វៀតណាម បាន​និយាយថា ការ​នេសាទ​ខុសច្បាប់​និង​ទេសចរណ៍​គ្មាន​ច្បាប់​អនុញ្ញាត បាន​ជួយ​ពន្លឿន​ការ​សឹករេចរឹល​ថ្ម​នេះ​។​

​ខណៈ​វិទ្យាស្ថាន​កំពុង​ធ្វើ​ការស្រាវជ្រាវ​សម្រាប់​របាយការណ៍​នេះ ក្រុម​ការងារ​បាន​សង្កេត​ឃើញ​ទូក​ទេសចរណ៍​មួយ​បាន​ឈប់​សំចត​នៅក្នុង​ចម្ងាយ​ត្រឹមតែ ១៩ ម៉ែត្រ​ពី​ថ្ម​នេះ​។​

​អ្នកជំនាញ​បាន​សង្កេតឃើញ​មាន​ស្នាម​ប្រេះ​ជ្រៅ​ក្នុង​ផ្ទាំង​ថ្ម​នេះ ដោយ​ព្រមាន​ថា ថ្ម​អាច​ដួលរ​លំបាន ប្រសិនបើ​មិន​មាន​វិធានការណ៍​ដើម្បី​ការពារ​ពួកវា​។​

​លោក​ជុង​បាន​និយាយថា “​អ្នកទេសចរ​អាច​មើលឃើញ​ផ្ទាំង​ថ្ម​ឈរ​មិន​នឹងថ្កល់​ទេ​នៅ​ពេល​ទឹក​នាច​”​។​

“​ពេល​កម្រិត​ទឹក​ទាប​គឺ​ចេញ​គល់​ថ្ម ដែល​រេចរឹល​បណ្តើរៗ ជា​ហេតុ​បង្ក​ហានិភ័យ​នៃ​ការដួលរលំ ប្រសិនបើ​គ្មាន​វិធានការ​ការពារ​និង​ពង្រឹង​បន្ថែមទៀត​ក្នុងពេល​ឆាប់ៗ​”៕

​ថ្ម​ថើប​គ្នា​រកកល់​ដួលរលំ បើ​ពុំ​មាន​វិធានការ​ការពារ​បន្ទាន់