ប្រែសម្រួល : កញ្ញាដាលីស (ដេល្លីម៉េល) ៖ នាងមានសក់ពណ៌ទង់ដែងវែង ភ្នែកពណ៌ខៀវ និងរាងស្វ៊ែល ប៉ុន្តែតារាបង្ហាញម៉ូតស្អាតគួរឱ្យភ្ញាក់ផ្អើលនៅលើក្របទស្សនាវដ្តីនេះត្រូវបានបង្កើតឡើងដោយបញ្ញាសិប្បនិម្មិត (AI)។
វេបសាយ DailyMail.com បាននិយាយទៅកាន់អ្នកបង្កើតរូបនាង ជីណា ស្តេវ៉ាត (Gina Stewart) ដែលបានក្លាយជាតារាបង្ហាញម៉ូត AI ដំបូងបង្អស់របស់ពិភពលោក បន្ទាប់ពីចុះកិច្ចសន្យាជាមួយទីភ្នាក់ងារតារាបង្ហាញម៉ូត ដែលមានមូលដ្ឋាននៅប្រទេសអាល្លឺម៉ង់កាលពីខែឧសភា។
ខណៈបុរសៗបានរចនាជនមានឥទ្ធិពល AI ជាច្រើនរូប នាងជីណាត្រូវបានបង្កើតឡើងដោយនារីម្នាក់ ដែលជាតារាបង្ហាញម៉ូតរបស់ទស្សនាវដ្តី Playboy ហើយនាងបានបង្កើតតារារូបនេះឡើង ដោយផ្អែកលើទម្រង់រូបរាងនិងស្ទីលផ្ទាល់ខ្លួនរបស់នាង។ ទោះយ៉ាងណាក៏ដោយ តារាបង្ហាញម៉ូត AI របស់នាងមានអាយុ ២៨ ឆ្នាំ ហើយនាងខ្លួនឯងមានអាយុ ៥២ ឆ្នាំ។
អ្នកបង្កើត ដែលមានឈ្មោះ ជីណា (Gina) ដែរនោះ បានប្រាប់ DailyMail.com ថា “អ្វីដែលគួរឱ្យអស់សំណើចគឺបុរសចូលចិត្តវា។ តារាបង្ហាញម៉ូត AI មានភាពឆើតឆាយ ស្រស់ស្អាត និងគួរឱ្យស្រឡាញ់ ដូចតារា Playboy នាទសវត្សរ៍ទី ៩០ ដែរ”។
“ខ្ញុំគិតថាវាជាគំនិតស្រដៀងគ្នានឹងកំពូលវីរបុរស។ មនុស្សគ្រប់គ្នាស្រលាញ់និងមានកំពូលវីរបុរសដែលចូលចិត្ត មនុស្សទៅរោងកុនដើម្បីមើល កោតសរសើរ និងឈ្លក់វង្វេងនឹងពួកគេ”។
“មនុស្សចង់ក្លាយជាពួកគេ ប៉ុន្តែពួកគេមិនមែនជាមនុស្សពិតទេ។ វាជាការស្រមើស្រមៃនិងគេចចេញពីការពិត”។
អ្នកបង្កើតជនជាតិអូស្ត្រាលីរូបនេះគឺជាម្តាយកូន ៤ នាក់ និង ជាជីដូនម្នាក់ ដែលធ្វើការជាគ្រូបង្ហាត់ផ្នែកសុខភាពនិងកាយសម្បទា នៅពេលដែលនាងមិនរចនារូប AI របស់នាង និងឈរថតរូបឱ្យ Playboy ។
នាងបាននិយាយថា “ខ្ញុំមើលថែខ្លួនឯងដោយការហាត់យ៉ូហ្គា សម្រកទម្ងន់ ធ្វើសមាធិ ហើយខ្ញុំជឿជាក់លើការធ្វើតេស្តិ៍រកកង្វះអាហារូបត្ថម្ភនិងអាហារបំប៉ុន”។
“នៅអាយុ ៥២ ឆ្នាំ ខ្ញុំមិនមានសក់ស្កូវមួយសរសៃនៅលើក្បាលរបស់ខ្ញុំ”។
ជីណា ដែលគេស្គាល់ថាជា “លោកយាយសិចស៊ីបំផុតរបស់ពិភពលោក” បានចាប់ផ្តើមល្បីល្បាញនៅលើ OnlyFans ប៉ុន្តែបានយកទេពកោសល្យរបស់នាងទៅកាន់ទស្សនាវដ្តី Playboy ក្នុងខែមីនាបន្ទាប់ពីសេវាកម្មជាវដែលមានមូលដ្ឋាននៅចក្រភពអង់គ្លេសនេះបានចាប់អារម្មណ៍ខ្លាំងលើស្នាដៃគូររូប AI របស់នាង។
ហើយមិនយូរប៉ុន្មាន AI Gina ត្រូវបានបង្កើតឡើង។
នាងជីណាបាននិយាយថា “ខណៈធ្វើដំណើរនៅរដូវក្តៅនេះនៅសហរដ្ឋអាម៉េរិក ខ្ញុំបានសម្រាកពីការថតរូបនៅលើបណ្តាញសង្គម”។
“ខ្ញុំធុញទ្រាន់នឹងការថតរូប ធ្វើសក់ ធ្វើក្រចក តុបតែងមុខ ស្លៀកឈុតសម្លៀកបំពាក់ជាដើម ហើយគ្រប់ពេលវេលា វាបានទាញយកថ្ងៃរបស់ខ្ញុំ ហើយភាពតានតឹងក៏ចូលរួមពាក់ព័ន្ធ។ ខ្ញុំគិតថាត្រូវតែមានវិធីល្អជាងនេះដើម្បីធ្វើការមួយនេះ ប្រសិនបើខ្ញុំត្រូវការពេលសម្រាក”។
ហើយនេះគឺជាគ្រាដែលជីណា អាយុ ២៨ ឆ្នាំមកពីរដ្ឋកាលីហ្វ័រញ៉ា បានចាប់កំណើត៕
នាងជីណា គូររូប AI ជីណា លក់ឱ្យទស្សនាវដ្តី Playboy