ប្រែសម្រួល : កញ្ញាដាលីស (ដេល្លីម៉េល) ៖ មន្ទីរបញ្ចកោណបាននិយាយកាលពីថ្ងៃព្រហស្បតិ៍ថា ខ្លួននឹងចាប់ផ្តើមបណ្តុះបណ្តាលអ្នកបើកយន្តហោះ F-16 របស់អ៊ុយក្រែននៅសហរដ្ឋអាម៉េរិកចាប់ពីខែក្រោយ។
អ្នកនាំពាក្យមន្ទីរបញ្ចកោណ លោក ផាត់ រ៉ាយឌ័រ (Pat Ryder) បាននិយាយថា ការហ្វឹកហ្វឺននេះនឹងមានអ្នកបើកយន្តហោះ “ជាច្រើននាក់” និងបុគ្គលិក “រាប់សិបនាក់” ដើម្បីថែទាំយន្តហោះ។
លោកបាននិយាយថា “អាកាសយានិកទាំងនេះនឹងធ្វើការបណ្តុះបណ្តាលភាសាអង់គ្លេសនៅមូលដ្ឋានទ័ពអាកាសលែកលែន (Lackland) ក្នុងទីក្រុងសាន់អង់តូនីញ៉ូ (San Antonio) រដ្ឋតិចសាស់ ក្នុងខែកញ្ញា មុនពេលចូលរួមការហ្វឹកហាត់ហោះហើរ F-16 នៅរដ្ឋអារីហ្សូណា” នៅខែបន្ទាប់។
លោកបានបន្ថែមថា ការហ្វឹកហ្វឺននៅរដ្ឋអារីហ្សូណានឹងធ្វើឡើងនៅមូលដ្ឋានឆ្មាំជាតិជើងអាកាសម៉ូរីស (Morris)។
កម្មវិធីរបស់សហរដ្ឋអាម៉េរិកបានពង្រីកផែនការនានា ដែលបានប្រកាសរួចហើយដោយសម្ពន្ធមិត្តអឺរ៉ុប ដើម្បីបណ្តុះបណ្តាលទាហានអ៊ុយក្រែនឱ្យហោះហើរយន្តហោះ F-16 ដែលផលិតដោយសហរដ្ឋអាម៉េរិក។
កាលពីសប្តាហ៍មុន សហរដ្ឋអាម៉េរិកបានប្រាប់ប្រទេសដាណឺម៉ាកនិងហូឡង់ថា ពួកគេអាចផ្ទេរយន្តហោះចម្បាំង F-16 របស់ពួកគេទៅកាន់អ៊ុយក្រែន នៅពេលណាដែលអាកាសយានិករបស់ប្រទេសនេះត្រូវបានបណ្តុះបណ្តាលឱ្យចេះប្រើវា។
កាលពីថ្ងៃព្រហស្បតិ៍ ន័រវែសក៏បាននិយាយដែរថាខ្លួននឹងផ្តល់យន្តហោះ F-16 ដល់អ៊ុយក្រែន ដោយទីភ្នាក់ងារសារព័ត៌មាន NTB បានរាយការណ៍ថា ការបរិច្ចាគនឹងមានយន្តហោះចន្លោះពី ៥ ទៅ ១០ គ្រឿង។
លោករ៉ាយឌ័របាននិយាយថា ការបណ្តុះបណ្តាលជាធម្មតាមានរយៈពេលពីប្រាំទៅប្រាំបីខែ អាស្រ័យលើជំនាញដែលអ្នកបើកយន្តហោះមានរួចហើយ។
លោកបានបន្តថា ការបណ្តុះបណ្តាលភាសានៅដើមដំបូងគឺមានសារៈសំខាន់ “ដោយហេតុថាវាមានភាពស្មុគស្មាញច្រើនហើយភាសាអង់គ្លេសឯកទេស គឺតម្រូវឱ្យចេះដើម្បីហោះហើរយន្តហោះទាំងនេះ”៕
យន្តហោះ F-16 បង្ហាញខ្លួននៅឥណ្ឌាកាលពីខែកុម្ភៈ ឆ្នាំ២០២៣