ប្រែសម្រួលៈបំណង(បាងកកប៉ុស្តិ៍,ស្ត្រេតថែមស៍)៖ក្រសួងយុត្តិធម៌ថៃបានច្រានចោលរបាយការណ៍ព័ត៌មាននានាដែលថា អតីតនាយករដ្ឋមន្ត្រីថាក់ស៊ីន ស៊ីណាវ៉ាត ត្រូវបានផ្ទេរពីមន្ទីរពេទ្យប៉ូលិសទៅកាន់មន្ទីរពេទ្យឯកជនមួយ។
សាហាកាន ផេតណារីន(Sahakan Phetnarin) រងលេខាអចិន្ត្រៃយ៍របស់ក្រសួងយុត្តិធម៌កាលពីថ្ងៃព្រហស្បតិ៍បាននិយាយថា ថាក់ស៊ីនមិនត្រូវបានផ្ទេរទៅកាន់មន្ទីរពេទ្យឯកជនណាមួយដូចរបាយការណ៍សារព័ត៌មានទេ តែក្រសួងមិនអាចផ្តល់រូបលោកថាក់ស៊ីន ជាអ្នកទោសឬជាអ្នកជំងឺបានទេ ដោយសារសិទ្ធិរបស់លោក។
លោកសាហាកានបាននិយាយថា «ថាក់ស៊ីន នៅក្នុងការឃុំឃាំងក្នុងពន្ធនាគារ ទោះជាលោកកំពុងត្រូវព្យាបាលក្នុងមន្ទីរពេទ្យប៉ូលិស»ក៏ដោយចុះ។
បើតាមមន្រ្តីក្រសួងយុត្តិធម៌រូបនេះ ថាក់ស៊ីនកំពុងមានជំងឺបួនមុខ រួមមានបញ្ហាសរសៃឈាមបេះដូង ឡើងឈាម សួត និងឈឺឆ្អឹងខ្នង។
ក្រោមច្បាប់ សមាជិកគ្រួសារនិងសាច់ញាតិត្រូវបានអនុញ្ញាតអោយចូលសួរសុខទុក្ខលោកថាក់ស៊ីនមិនលើសពីដប់នាក់ និងត្រូវជូនដំណឹងដល់អាជ្ញាធរពន្ធនាគារBangkok Primand ជាមុន។
មុននេះកាលពីថ្ងៃពុធ នាយកមន្ទីរពេទ្យប៉ូលិស បាននិយាយថា លោកថាក់ស៊ីន មិនទទួលបានសិទ្ធិពិសេសឬអាទិភាពអីទេ គឺលោកកំពុងសម្រាកព្យាបាលក្រោមការតាមដានរបស់វេជ្ជបណ្ឌិតប្រាំមួយនាក់ក្រោយត្រូវបានបញ្ជូនទៅពេទ្យយ៉ាងរួសរាន់កាលពីព្រឹកថ្ងៃពុធ។
ឧត្តមសេនីយ៍ប៉ូលិសលោក សូផនរ៉ាត ស៊ីងហាចារូ(Soponrat Singhajaru)អគ្គនាយកមន្ទីរពេទ្យប៉ូលិស បានបដិសេធរបាយការណ៍ដែលថា ថាក់ស៊ីនត្រូវបាននាំទៅកាន់បន្ទប់ពិសេស(VIP)ប្រដាប់ដោយម៉ាស៊ីនត្រជាក់មួយនៅជាន់ទី១៤នៃអាគារពេទ្យកំពស់២០ជាន់។
អគ្គនាយកមន្ទីរពេទ្យប៉ូលិស បញ្ជាក់ថា ថាក់ស៊ីន ពិតជាកំពុងសម្រាកនៅក្នុងបន្ទប់នៅជាន់ទី១៤ កន្លែងដាក់អ្នកជំងឺកូវីដ១៩កាលពីមុន តែជាបន្ទប់គ្មានម៉ាស៊ីនត្រជាក់ទេ
លោកបានអោយដឹងថា លោកថាក់ស៊ីនស្រាប់តែឈឺទ្រូងភ្លាមៗនិងអុកស៊ីសែនចុះទាប ខណៈសម្ពាធឈាមឡើងខ្ពស់ និងត្រូវបញ្ជូនចេញពីបន្ទប់គុកទៅកាន់ពេទ្យប៉ូលិសនៅក្នុងពន្ធនាគារBangkok Primandភ្លាមនៅថ្ងៃលោកចូលគុកដំបូងតែម្តង។«ជំងឺរបស់ថាក់ស៊ីន ទាមទារការព្យាបាលពីគ្រូពេទ្យឯកទេស និងគ្រឿងបរិក្ខារពេទ្យទំនើប»៕
ថាក់ស៊ីន មកដល់ថៃកាលពីថ្ងៃ២២សីហានិងត្រូវបានបញ្ជូនទៅកាន់ពន្ធនាគារក្នុងថ្ងៃដដែល