ប្រែសម្រួល : កញ្ញាដាលីស (ដេល្លីម៉េល) ៖ មេដឹកនាំរដ្ឋាភិបាលលីប៊ីបាននិយាយកាលពីថ្ងៃអាទិត្យថា លោកបានព្យួរការងាររដ្ឋមន្ត្រីការបរទេសរបស់លោក បន្ទាប់ពីសមភាគីអ៊ីស្រាអែលរបស់លោកស្រីបានប្រកាសថាគាត់បានជួបពិភាក្សាជាមួយលោកស្រីកាលពីសប្តាហ៍មុនក្នុងទីក្រុងរ៉ូម។
នាយករដ្ឋមន្ត្រី អាប់ឌុលហាមីដ ឌីបេបា (Abdulhamid Dbeibah) បាននិយាយកាលពីល្ងាចថ្ងៃអាទិត្យនៅក្នុងសេចក្តីសម្រេចចិត្តផ្លូវការរបស់គាត់ ដែលបង្ហោះលើហ្វេសប៊ុក យ៉ាងដូច្នេះថា លោកស្រី ណាចឡា អាល់មែនហ្គូស (Najla al-Mangoush) ត្រូវបានព្យួរការងារបណ្ដោះអាសន្ន ហើយនឹងត្រូវទទួលរង “ការស៊ើបអង្កេតរដ្ឋបាល” ដោយគណៈកម្មាការមួយ ដែលដឹកនាំដោយរដ្ឋមន្ត្រីយុត្តិធម៌។
ក្រសួងការបរទេសលីប៊ីបានពណ៌នាថាវា “ជាឱកាសចៃដន្យនិងជាការពើបប្រទះគ្នាក្រៅផ្លូវការ” ប៉ុន្តែព័ត៌មាននៃជំនួបនេះបាននាំឱ្យមានការតវ៉ាតាមដងផ្លូវនៅក្នុងទីក្រុងមួយចំនួននៃប្រទេសលីប៊ីរួចទៅហើយ។
ជម្លោះនយោបាយបានផ្ទុះឡើងកាលពីថ្ងៃអាទិត្យ បន្ទាប់ពីក្រសួងការបរទេសអ៊ីស្រាអែលបាននិយាយថា រដ្ឋមន្ត្រីការបរទេសនៃប្រទេសទាំងពីរបានជួបគ្នាកាលពីសប្តាហ៍មុន។
សេចក្តីថ្លែងការណ៍បាននិយាយថា រដ្ឋមន្ត្រីការបរទេសអ៊ីស្រាអែល លោក អែលី ខូហិន (Eli Cohen) និង លោកស្រីមែនហ្គូស ដែលជាសមភាគីលីប៊ីរបស់គាត់នៅក្នុងរដ្ឋបាលដែលមានមូលដ្ឋាននៅទី
ក្រុងទ្រីប៉ូលី បាននិយាយនៅក្នុងកិច្ចប្រជុំក្នុងទីក្រុងរ៉ូម ដែលរៀបចំដោយរដ្ឋមន្ត្រីការបរទេសអ៊ីតាលីលោក អង់តូនីញ៉ូ ថាចានី (Antonio Tajani)។
សេចក្តីថ្លែងការណ៍របស់អ៊ីស្រាអែលបានពណ៌នាវាថាជាគំនិតផ្តួចផ្តើមការទូតដំបូងបង្អស់រវាងប្រទេសទាំងពីរ។
លោកខូហិនបាននិយាយនៅក្នុងសេចក្តីថ្លែងការណ៍ពីក្រសួងការបរទេសអ៊ីស្រាអែលថា “ខ្ញុំបាននិយាយជាមួយលោកស្រីរដ្ឋមន្ត្រីការបរទេសអំពីសក្តានុពលដ៏អស្ចារ្យសម្រាប់ប្រទេសទាំងពីរពីទំនាក់ទំនងរបស់ពួកយើង”។
ប៉ុន្តែក្រសួងការបរទេសលីប៊ីបាននិយាយកាលពីល្ងាចថ្ងៃអាទិត្យថា លោកស្រីមែនហ្គូសបាន “បដិសេធមិនជួបជាមួយភាគីណាមួយ” ដែលតំណាងឱ្យអ៊ីស្រាអែលទេ។
ក្រសួងបាននិយាយនៅក្នុងសេចក្តីថ្លែងការណ៍មួយថា “អ្វីដែលបានកើតឡើងនៅទីក្រុងរ៉ូមគឺជាឱកាសចៃដន្យនិងជាការពើបប្រទះគ្នាក្រៅផ្លូវការ ក្នុងអំឡុងកិច្ចប្រជុំជាមួយសមភាគីអ៊ីតាលីរបស់គាត់ ដែលមិនពាក់ព័ន្ធនឹងការពិភាក្សា កិច្ចព្រមព្រៀង ឬការពិគ្រោះយោបល់ណាមួយឡើយ”។
សេចក្តីថ្លែងការណ៍បានបន្ថែមថា លោកស្រីរដ្ឋមន្ត្រីបានរំលឹកឡើងវិញ “ក្នុងលក្ខណៈច្បាស់លាស់និងគ្មានការសង្ស័យអំពីជំហររបស់លីប៊ីទាក់ទងនឹងបុព្វហេតុប៉ាឡេស្ទីន”។
ព័ត៌មាននៃជំនួបនេះបានបង្កឱ្យមានការតវ៉ានៅក្នុងទីក្រុងមួយចំនួននៃប្រទេសលីប៊ី និង លិខិតមួយច្បាប់ពីក្រុមប្រឹក្សាប្រធានាធិបតីរបស់ប្រទេស ដែលស្នើសុំការបំភ្លឺ។
ក្រសួងការបរទេសលីប៊ីបានចោទប្រកាន់អ៊ីស្រាអែលថាបានព្យាយាម “បង្ហាញឧបទ្ទវហេតុនេះ” ជា “កិច្ចប្រជុំឬការពិភាក្សា”។
នៅក្នុងសេចក្តីថ្លែងការណ៍របស់ក្រសួងការបរទេសអ៊ីស្រាអែល លោកខូហិនត្រូវបានដកស្រង់សម្តីដោយនិយាយថា អ្នកទាំងពីរបានពិភាក្សាអំពី “សារៈសំខាន់នៃការអភិរក្សបេតិកភណ្ឌរបស់ជនជាតិជ្វីហ្វលីប៊ី ដែលរួមមានការជួសជុលសាលាជំនុំនិងទីបញ្ចុះសពជនជាតិជ្វីហ្វនៅក្នុងប្រទេសនេះ”៕
រដ្ឋមន្ត្រីការបរទេសលីប៊ី លោកស្រី ណាចឡា អាល់មែនហ្គូស