ប្រែសម្រួល : កញ្ញាដាលីស (ដេល្លីម៉េល) ៖ អ្នកពន្លត់អគ្គិភ័យជាង ៦០០ នាក់ រួមទាំងកម្លាំងពង្រឹងពីបណ្តាប្រទេសអឺរ៉ុបជាច្រើន ដែលគាំទ្រដោយកងយន្តហោះទម្លាក់ទឹក និងឧទ្ធម្ភាគចក្រកំពុងតស៊ូពន្លត់ភ្លើងឆេះព្រៃធំៗចំនួនបីនៅក្នុងប្រទេសក្រិកកាលពីថ្ងៃអាទិត្យ ដែលពីរក្នុងចំណោមនោះបានឆាបឆេះអស់រយៈពេលជាច្រើនថ្ងៃមកហើយ។
ភ្លើងឆេះព្រៃដ៏ធំនៅក្នុងតំបន់ទីក្រុងអេវរ៉ូស (Evros) និងតំបន់ទីក្រុងអាឡិចសាន់ឌ្រូប៉ូលិស (Alexandroupolis) ភាគឦសានប្រទេស ដែលគេជឿថាបណ្តាលឱ្យមនុស្សស្លាប់ ២០ នាក់នោះ កំពុងឆាបឆេះឈានដល់ថ្ងៃទីប្រាំបួនហើយ។
ភ្លើងឆេះព្រៃ ដែលជាភ្លើងឆេះព្រៃទោលដ៏ធំបំផុតមិនធ្លាប់វាយប្រហារប្រទេសសហភាពអឺរ៉ុបពីមុនមក បានបំផ្លាញព្រៃឈើដ៏ច្រើនសម្បើម និង ឆេះផ្ទះនៅតំបន់ដាច់ស្រយាលនៃទីក្រុងអាឡិចសាន់ឌ្រូប៉ូលិស។
នាយកដ្ឋានពន្លត់អគ្គិភ័យបាននិយាយថា កាលពីថ្ងៃអាទិត្យ អ្នកពន្លត់អគ្គិភ័យចំនួន ២៩៥ នាក់ យន្តហោះចំនួន៧គ្រឿង និងឧទ្ធម្ភាគចក្រចំនួន៥ បានកំពុងពន្លត់ភ្លើងព្រៃ។ បទបញ្ជាជម្លៀសត្រូវបានចេញសម្រាប់ភូមិចំនួនពីរ ដោយភូមិមួយគឺនៅតំបន់ទីក្រុងអេវរ៉ូសនិងភូមិមួយទៀតនៅតំបន់រ៉ូដូពី (Rodopi)។
សេវាគ្រប់គ្រងគ្រាអាសន្នខូភើនីឃឺស (Copernicus) របស់សហភាពអឺរ៉ុបបាននិយាយកាលពីថ្ងៃអាទិត្យថា ភ្លើងឆេះព្រៃបានឆាបឆេះលើផ្ទៃដីចំនួន ៧៧.០០០ ហិកតា (៧៧០ គីឡូម៉ែត្រក្រឡា) និង មានចំណុចឆេះសកម្មចំនួន ១២០។
Copernicus គឺជាអង្គភាពសង្កេតភពផែនដីរបស់កម្មវិធីអវកាសសហភាពអឺរ៉ុប ហើយប្រើប្រាស់រូបភាពផ្កាយរណបដើម្បីផ្តល់ទិន្នន័យផែនទី។
នៅតំបន់ភាគពាយព្យនៃរដ្ឋធានីក្រិក ភ្លើងឆេះព្រៃដ៏ធំមួយទៀតបានកំពុងឆាបឆេះផ្ទះជាច្រើនថ្ងៃមកហើយ ហើយបានឆាបឆេះដល់ឧទ្យានជាតិនៅលើភ្នំផានីថា (Parnitha) ដែលជាតំបន់បៃតងចុងក្រោយមួយនៅជិតក្រុងអាថែន។
នាយកដ្ឋានពន្លត់អគ្គិភ័យបាននិយាយថា អ្នកពន្លត់អគ្គិភ័យចំនួន ២៦០ នាក់ យន្តហោះមួយគ្រឿង និង ឧទ្ធម្ភាគចក្រចំនួនបីគ្រឿង កំពុងព្យាយាមពន្លត់អណ្តាតភ្លើង។
ភ្លើងឆេះព្រៃដ៏ធំលើកទីបីបានចាប់ផ្តើមកាលពីថ្ងៃសៅរ៍នៅលើកោះស៊ីក្លាឌីក (Cycladic) នៃតំបន់អាន់ដ្រូស (Andros) ហើយនៅតែមិនអាចគ្រប់គ្រងបានកាលពីថ្ងៃអាទិត្យ ដោយមានអ្នកពន្លត់អគ្គិភ័យចំនួន ៧៣ នាក់ យន្តហោះពីរគ្រឿង និងឧទ្ធម្ភាគចក្រពីរគ្រឿងជួយពន្លត់ភ្លើង។
រន្ទះបាញ់ត្រូវគេសង្ស័យថាជាអ្នកបង្កភ្លើងឆេះព្រៃនោះ៕
ភ្លើងឆេះព្រៃដុតបំផ្លាញផ្ទះជាច្រើនខ្នងនៅភាគពាយព្យក្រុងអាថែន