ប្រែសម្រួល : កញ្ញាដាលីស (ដេល្លីម៉េល) ៖ ក្រុមហ៊ុន Toyota Motor នឹងចាប់ផ្តើមប្រតិបត្តិការឡើងវិញនៅរោងចក្រដំឡើងរថយន្តរបស់ខ្លួនជាច្រើនក្នុងប្រទេសជប៉ុននៅថ្ងៃពុធនេះ បន្ទាប់ពីដំណើរការខុសប្រក្រតីនៃប្រព័ន្ធផលិតកម្មក្នុងស្រុកបាននាំអោយផ្អាកដំណើរការនៅឯក្រុមហ៊ុនរថយន្ត ដែលលក់ដាច់បំផុតរបស់ពិភពលោក។
ក្រុមហ៊ុន Toyota នឹងបន្តប្រតិបត្តិការឡើងវិញនៅខ្សែផលិតកម្មចំនួន២៥ នៃរោងចក្ររាប់សិបនៅក្នុងទីផ្សារក្នុងស្រុករបស់ខ្លួនចាប់ពីព្រឹកថ្ងៃពុធនេះតទៅ ហើយបន្ថែមរោងចក្រពីរចុងក្រោយចាប់ពីពេលរសៀល។
ក្រុមហ៊ុនបន្តស៊ើបអង្កេតពីមូលហេតុនៃកំហុសនេះ ដែលខ្លួននិយាយថាមិនមែនដោយសារការវាយប្រហារតាមអ៊ីនធឺណិតទេ ដែលវាបានរារាំងខ្លួនពីការបញ្ជាទិញគ្រឿងបង្គំ។
ការគណនារបស់ទីភ្នាក់ងារសារព័ត៌មានរ៉យទ័របានបង្ហាញថា រោងចក្រទាំងអស់រួមគ្នាមានចំនួនប្រហែលមួយភាគបីនៃផលិតកម្មសកលរបស់ក្រុមហ៊ុនផលិតរថយន្តនេះ។
ផលិតកម្មក្នុងស្រុករបស់ក្រុមហ៊ុនបានស្ទុះងើបឡើងវិញបន្ទាប់ពីការកាត់បន្ថយទិន្នផលជាបន្តបន្ទាប់ ដែលខ្លួនបានស្តីបន្ទោសលើកង្វះបន្ទះឈីប។ ទិន្នផលបានកើនឡើង ២៩% ក្នុងខែមករាដល់ខែមិថុនា ដែលជាការកើនឡើងលើកដំបូងក្នុងរយៈពេលពីរឆ្នាំ។ ការគណនារបស់រ៉យទ័របានបង្ហាញថា ទិន្នផលនៅជប៉ុនជាមធ្យមមានប្រហែល ១៣.៥០០ គ្រឿងក្នុងមួយថ្ងៃក្នុងឆមាសទីមួយនៃឆ្នាំនេះ។ នោះមិនរាប់បញ្ចូលរថយន្តពីក្រុមហ៊ុនរង Daihatsu និង Hino នោះទេ៕
រោងចក្រផលិតរថយន្ត Toyota នៅជប៉ុននឹងចាប់ផ្តើមផលិតឡើងវិញនៅថ្ងៃពុធនេះ ក្រោយខូចប្រព័ន្ធផលិតកម្ម