ប្រែសម្រួល : កញ្ញាដាលីស (ស្ត្រេតថែមស៍) ៖ ដង្កូវរស់មួយក្បាលត្រូវបានវេជ្ជបណ្ឌិតអូស្ត្រាលីរកឃើញនៅក្នុងខួរក្បាលរបស់ស្ត្រីម្នាក់ ដែលនេះជាករណីលើកដំបូងដែលប៉ារ៉ាស៊ីតបែបនេះត្រូវបានរកឃើញក្នុងខ្លួនមនុស្ស។
ដង្កូវឈ្មោះថា Ophidascaris Robertsi ប្រវែង ៨ សង់ទីម៉ែត្រ ត្រូវបានរកឃើញបន្ទាប់ពីការវះកាត់ខួរក្បាលលើស្ត្រីអាយុ ៦៤ ឆ្នាំដោយវេជ្ជបណ្ឌិតនៅមន្ទីរពេទ្យក្រុងកង់បេរ៉ា។
BBC បានរាយការណ៍ថា ដង្កូវព្រូន ដែលមាន “រចនាសម្ពន្ធដូចខ្សែនេះ” អាចរស់នៅក្នុងខួរក្បាលរបស់គាត់បានរហូតដល់ពីរខែ។
ប៉ារ៉ាស៊ីតនេះឧស្សាហ៍រកឃើញជាទូទៅក្នុងពស់ថ្លាន់ក្នុងប្រទេសអូស្ត្រាលី។ រហូតមកដល់ពេលនេះ វាមិនត្រូវបានរកឃើញចំពោះមនុស្សទេ។
គេសង្ស័យថា ដង្កូវនេះបានចម្លងមេរោគដល់សរីរាង្គផ្សេងទៀតនៅក្នុងខ្លួនរបស់ស្ត្រីនេះផងដែរ នេះបើយោងតាមទូរទស្សន៍ Al Jazeera កាលពីថ្ងៃអង្គារ។
វេជ្ជបណ្ឌិត សាន់ចាយ៉ា សេណាណាយ៉ាកេ (Sanjaya Senanayake) អ្នកជំនាញខាងជំងឺឆ្លងនៅសាកលវិទ្យាល័យជាតិអូស្ត្រាលី និងមន្ទីរពេទ្យក្រុងកង់បេរ៉ា បាននិយាយថា “នេះគឺជាករណីដង្កូវព្រូន Ophidascaris លើមនុស្សដំបូងគេមិនធ្លាប់មាននៅក្នុងពិភពលោក”។
លោកវេជ្ជបណ្ឌិតបានបន្ថែមថា “ចំពោះចំណេះដឹងរបស់យើង នេះក៏ជាករណីដំបូងផងដែរ ដែលពាក់ព័ន្ធនឹងខួរក្បាលនៃប្រភេទថនិកសត្វ មនុស្ស ឬ ទាំងពីរ”។
កាសែត The Guardian បាននិយាយថា ករណីនេះត្រូវបានចងក្រងជាឯកសារនៅក្នុងទស្សនាវដ្តី Emerging Infectious Diseases លេខចេញផ្សាយសម្រាប់ខែកញ្ញា៕
ដង្កូវOphidascaris ត្រូវបានរកឃើញក្នុងខួរក្បាលស្ត្រីអូស្ត្រាលីអាយុ ៦៤ ឆ្នាំ