ប្រែសម្រួលៈបំណង(បាងកកប៉ុស្តិ៍)៖វេជ្ជបណ្ឌិត ឆុលណាន ស្រ៊ីកែន(Cholnan Srikaew)បានគោរពពាក្យសម្តីនិងបានប្រកាសលាឈប់ពីប្រធានបក្សភឿថៃដោយសារតែគណបក្សសំរេចចិត្តបង្កើតរដ្ឋាភិបាលចម្រុះមួយជាមួយបណ្តាគណបក្សដែលមានទំនាក់ទំនងជាមួយក្រុមយោធា។
អ្នកនយោបាយជើងចាស់មកពីខេត្តណាន(Nan)រូបនេះបានធ្វើសន្និសីទកាសែតមួយនៅស្នាក់ការបក្សភឿថៃកាលពីល្ងាចថ្ងៃពុធដោយលោកបានអះអាងថា កាលពីពេលធ្វើយុទ្ធនការរកសម្លេងឆ្នោតកាលពីខែមេសា លោកបានសន្យាចុះចេញពីតំណែងបើសិនជាគណបក្សនេះបង្កើតក្រុមចំរុះមួយ ជាមួយគណបក្សផាឡាំងប្រចារ៉ាត របស់ឧត្តមសេនីយ៍ ប្រាវីត វង់ស៊ូវ៉ុន។
ប្រាវីត វង់ស៊ូវ៉ុន និង អតីតនាយករដ្ឋប្រាយុទ្ធ ចាន់អូចា ជាបងប្អូនធម៌នឹងគ្នា។ពួកលោក ដឹកនាំគណបក្សផាឡាំងប្រាចារ៉ាត និងប្អូនប្រុសរបស់លោកប្រាវីត ទំនងជាកាន់មុខតំណែងមួយក្នុងគណៈរដ្ឋមន្ត្រីថ្មីដឹកនាំដោយភឿថៃ។
វេជ្ជបណ្ឌិត ឆុលណាន គ្រូពេទ្យវ័យ៦២ឆ្នាំ និងជាអតីតប្រធានមន្ទីរពេទ្យមួយនៅខេត្តណានកំពុងកាន់តំណែងសមាជិកសភានិងត្រូវរំពឹងថានឹងទទួលបានតំណែងជារដ្ឋមន្ត្រីសុខាភិបាល។
សូមបញ្ជាក់ថា គូប្រជែងនយោបាយបានទាមទារអោយលោកឆុលណានចុះចេញពីតំណែងប្រធានបក្សភ្លាមក្រោយភឿថៃប្រកាសសម្ពន្ធភាពនយោបាយថ្មីមួយកាលពីថ្ងៃ២១សីហា តែលោកបានសុំពេលបួនប្រាំថ្ងៃទម្រាំដំណើរការរៀបចំគណៈរដ្ឋមន្ត្រីថ្មីចប់សព្វគ្រប់។
កាលពីថ្ងៃពុធលោកបាននិយាយថា «ឥឡូវជាពេលសមស្របសំរាប់ខ្ញុំលាឈប់ ដោយសារការបង្កើតរដ្ឋាភិបាលចប់សព្វគ្រប់ ដោយភឿថៃកាន់កាន់តំណែង១៧ក្នុងគណៈរដ្ឋមន្ត្រី»។
សូមបញ្ជាក់ថា ភឿថៃជាប់ឆ្នោតលំដាប់ទីពីរជាមួយនឹងអាសនៈសភា១៤១ក្នុងការបោះឆ្នោតសកលកាលពីខែឧសភា។គណបក្សនេះបានដកខ្លួនចេញពីសម្ពន្ធភាពដំបូងរបស់ខ្លួនជាមួយគណបក្សឈ្នះឆ្នោតលំដាប់ទីមួយកាវក្លៃឬឈានទៅមុខ(MFP)និងបង្កើតសម្ពន្ធភាពចម្រុះថ្មីមួយ ដោយរួមបញ្ចូលទាំងគណបក្សដែលស្និទ្ធនឹងក្រុមយោធា៕
លោកឆុលណាន (កណ្តាល)បានលាឈប់ពីប្រធានបក្សភឿថៃតែរក្សាតំណែងសភានិងទំនងបានតំណែងមួយក្នុងរដ្ឋាភិបាលថ្មី។ទោះជារងការរិះគន់ ក៏លោកមានមោទនភាពចំពោះតួនាទីរបស់លោកក្នុងការបញ្ចប់ភាពជាប់គាំងនយោបាយថៃ