ប្រែសម្រួល : កញ្ញាដាលីស (ដេល្លីម៉េល) ៖ សេវាសង្គ្រោះបន្ទាន់របស់ទីក្រុងចូហានណេស្បឺក (Johannesburg) របស់អាហ្វ្រិកខាងត្បូងបាននិយាយថា មនុស្សជាង ៦០ នាក់បានស្លាប់នៅក្នុងអគ្គិភ័យដែលបានឆាបឆេះអគារកម្ពស់ប្រាំជាន់នៅកណ្តាលទីក្រុងនេះកាលពីថ្ងៃព្រហស្បតិ៍ទី៣១សីហា។
អ្នកនាំពាក្យសេវាគ្រប់គ្រងគ្រាអាសន្ន លោក រ៉ូបឺត មូឡូដហ្ស៊ី (Robert Mulaudzi) បាននិយាយថា មនុស្ស ៤៣ នាក់ផ្សេងទៀតបានរងរបួស ដោយខ្លះរងគ្រោះដោយការស្រូបផ្សែង ហើយត្រូវបាននាំទៅព្យាបាលនៅមន្ទីរពេទ្យក្នុងតំបន់។
លោកមូឡូដហ្ស៊ីបាននិយាយថា “ឥឡូវនេះយើងមានអ្នកស្លាប់ចំនួន ៦៤ នាក់ និងរបួស៤៣ នាក់ ដែលត្រូវបានជញ្ជូនទៅកាន់កន្លែងថែទាំសុខភាពផ្សេងៗ”។
ក្រុមអ្នកពន្លត់អគ្គិភ័យនៅកន្លែងកើតហេតុបានពន្លត់ភ្លើងបានសម្រេច ហើយប្រតិបត្តិការស្វែងរកនិងសង្គ្រោះកំពុងបន្ត។
លោកមូឡូដហ្ស៊ីបានប្រាប់ទូរទស្សន៍ក្នុងស្រុក ENCA ថា “យើងកំពុងឡើងតាមជាន់មួយទៅជាន់មួយទៀតដើម្បីយកសាកសព”។
អ្នកយកព័ត៌មាន AFP ម្នាក់នៅកន្លែងកើតហេតុបាននិយាយថា សេវាសង្គ្រោះបន្ទាន់កំពុងបន្តនាំយកសាកសពដែលឆេះខ្លោចចេញពីអគារ ដោយដាក់ពួកគេនៅក្រោមក្រណាត់ និងលើកម្រាលនៅលើដងផ្លូវខាងក្រៅ។
លោកមូឡូដហ្ស៊ីបាននិយាយថា “វាពិតជាថ្ងៃដ៏សោកសៅមួយសម្រាប់ទីក្រុងចូហានណេស្បឺក…ក្នុងរយៈពេលជាង ២០ ឆ្នាំនៅក្នុងសេវាកម្មនេះ ខ្ញុំមិនដែលជួបរឿងបែបនេះទេ”។
គេមិនទាន់ដឹងច្បាស់ពីមូលហេតុនៃការឆាបឆេះនេះទេ ដែលវាបានឆេះតាំងពីពេលយប់មក៕
មនុស្ស៦៤នាក់ស្លាប់ដោយសារភ្លើងឆេះអគារកម្ពស់៥ជាន់នៅទីក្រុងចូហានណេស្បឺកនៅថ្ងៃព្រហស្បតិ៍នេះ