ដោយៈ ទេពកង្រី / កំពង់ឆ្នាំងៈ នៅថ្ងៃទី២ ខែកញ្ញា ឆ្នាំ២០២៣ លោក ដូវ គឹមស៊ីន អភិបាលស្រុកជលគីរី និងក្រុមការងារ បានជិះទូកឆ្លងទន្លេ ដោយបានយកអំណោយ របស់អនុសាខាកាកបាទក្រហមស្រុក រួមមាន អង្ករ ១០០ គីឡូក្រាម មី២កេះ ត្រីខ២យួរ ទឹកត្រី២យួ ទឹកស៊ីអុីវ២យួរ រួមនឹងថវិកា ១០ ម៉ឺនរៀល មកប្រគល់ជូនដល់ អតីតយុទ្ធជនពិការ និងមានសតិមិនប្រក្រតី មួយគ្រួសារ ដែលកំពុងជួបការខ្វះខាត រស់នៅក្នុងខ្ទមចាស់ទ្រុឌទ្រោម ក្នុងតំបន់ដាច់ស្រយាលមួយ ក្នុងភូមិពាមឆ្កោក ស្រុកជលគីរី ខេត្តកំពង់ឆ្នាំង ។
លោកអភិបាលស្រុកជលគីរី បានពាំនាំនូវការសាកសួរសុខទុក្ខ ពីលោក ស៊ុន សុវណ្ណារិទ្ធ អភិបាលខេត្តកំពង់ឆ្នាំង និងជាប្រធានកិត្តិយស សាខាកាកបាទក្រហម ខេត្តកំពង់ឆ្នាំង ចំពោះឈ្មោះ ប៊ូ ប៉ិន អាយុ៦៦ឆ្នាំ រស់នៅជាមួយកូនស្រី ក្នុងភូមិអន្លុង មេត្រី ឃុំពាមឆ្កោក ស្រុកជលគីរី អតីតយុទ្ធជនដែលពិការជើង ហើយកំពុងរស់នៅ ក្នុងខ្ទម ចាស់ទ្រុឌទ្រោម ក្នុងស្ថានភាពខ្វះខាត ដោយលោកបានផ្ដាំថា សូមកុំអស់ សង្ឃឹម ក្នុងជីវិត ត្រូវរស់នៅឱ្យ មានអនាម័យល្អ ដោយហូបស្អាត ផឹកស្អាត ពិសេស សម្រាននៅក្នុងមុង ឱ្យបានត្រឹម ត្រូវ ដើម្បីបង្ការមូសខ្លាខាំ ចម្លងមេរោគគ្រុនចាញ់ ព្រោះពេលនេះ ជារដូវវស្សា៕ V / N
