ប្រែសម្រួលៈបំណង(ស្រេតថែមស៍)៖ប្រព័ន្ធផ្សព្វផ្សាយរដ្ឋកូរ៉េខាងជើងKCNAបាននិយាយនៅថ្ងៃអាទិត្យនេះថា កូរ៉េខាងជើងបានធ្វើសមយុទ្ធ«វាយប្រហារនុយគ្លេអ៊ែរកលយុទ្ធ»កាលពីថ្ងៃសៅរ៍ ដែលរួមមានការបាញ់កាំជ្រួចបណ្តែតចម្ងាយឆ្ងាយពីរគ្រាប់ផង នៅពេលមេដឹកនាំគីម ជុងអ៊ុន បានទៅពិនិត្យមើលរោងចក្រផលិតនាវានិងរោងចក្រផលិតគ្រាប់។
KCNAបាននិយាយថាសមយុទ្ធនេះត្រូវបានធ្វើឡើងកាលពីដើមថ្ងៃសៅរ៍ដើម្បី«ព្រមានសត្រូវ»និងថាប្រទេសនេះនឹងត្រៀមខ្លួនសំរាប់សង្គ្រាមនុយគ្លេអ៊ែរមួយ នៅពេលរដ្ឋាភិបាលទីក្រុងព្យុងយ៉ាងបានធ្វើការប្តេជ្ញាចិត្តជាថ្មីថានឹងបង្កើនសមត្ថភាពយោធាដើម្បីរារាំងការវាយប្រហាររបស់អាម៉េរិកនិងកូរ៉េខាងត្បូង។ 
កាំជ្រួចបណ្តែតពីរដើមដែលបំពាក់ក្បាលគ្រាប់ក្លែងក្លាយ ត្រូវបានបាញ់ឆ្ពោះទៅកាន់សមុទ្រខាងលិចនិងបានហោះបានចម្ងាយ១.៥០០គីឡូម៉ែត្រនៅកំពស់១៥០គីឡូម៉ែត្រ។
ការប្រកាសដាច់ដោយឡែកមួយបាននិយាយថា លោកគីម បានទៅទស្សនារោងចក្រPukjung Machine Complex ដែលផលិតម៉ាស៊ីននាវា និងរោងចក្រមួយទៀតដែលផលិតគ្រាប់រំសេវ ដើម្បីបញ្ជាក់ពីសារសំខាន់នៃការពង្រឹងកងកម្លាំងជើងទឹកកូរ៉េខាងជើង។
ការសាកល្បងកាំជ្រួចចុងក្រោយនេះបានកើតឡើងតែពីរថ្ងៃក្រោយអាម៉េរិកនិងកូរ៉េខាងត្បូងទើបបញ្ចប់សមយុទ្ធយោធារួមគ្នា១១ថ្ងៃរបស់ខ្លួន ដែលមានការចូលរួមពីយន្តហោះទម្លាក់គ្រាប់បែកB-1Bផង។
សូមបញ្ជាក់ថាកូរ៉េខាងជើងបាននិងកំពុងបង្កើនសមត្ថភាពយោធារារាំងរបស់ខ្លួនប្រឆាំងនឹងអាម៉េរិកនិងកូរ៉េខាងត្បូងដែលកងកម្លាំងនៃសម្ពន្ធមិត្តទាំងពីរក៏បានហាត់សមត្រៀមសំរាប់សង្គ្រាមនុយគ្លេអ៊ែរផងដែរ។កាលពីខែមុន KCNAបាននិយាយថា លោកគីមទើបទៅសួរសុខទុក្ខនិងត្រួតពិនិត្យកងទ័ពជើងទឹក នៅឆ្នេរខាងកើតដើម្បីមើលការបាញ់កាំជ្រួចបណ្តែតយុទ្ធសាស្ត្រចេញពីនាវាចម្បាំងមួយ និងបានបញ្ជាក់ថានាវានោះត្រូវតែរក្សាកម្លាំងវាយប្រហារសំរាប់ស្ថានភាពប្រយុទ្ធ៕