ប្រែសម្រួល : កញ្ញាដាលីស (អេស៊ាវ័ន) ៖ លោកស្រីបានលាក់មុខពីរទសវត្សរ៍មកហើយ ប៉ុន្តែអតីតតារាសម្ដែងហុងកុង មូន លី (Moon Lee) ត្រៀមខ្លួនរួចជាស្រេចសម្រាប់ការផ្លាស់ប្តូរ។
ខណៈលោកស្រីបានចែករំលែកជាទៀងទាត់អំពីជីវិតរបស់ខ្លួននៅលើបណ្តាញសង្គមដោយបង្ហោះវីដេអូខ្លួនឯងហាត់ប្រាណ ដុតនំ និងដើរលេងជាមួយចៅៗនោះ តារាវ័យ ៥៨ ឆ្នាំរូបនេះថ្មីៗនេះបានប្រកាសអំពីឡាយស្ទ្រីម (Livestream)។
លោកស្រីមូនបានបង្ហោះនៅលើវេបសាយ Douyin កាលពីសប្តាហ៍មុន ដោយចែករំលែកថា “ខានជួបគ្នាយូរហើយ សូមត្រៀមសម្រាប់ការចាក់ផ្សាយ។ ជួបគ្នាថ្ងៃទី ១៥ កញ្ញា”។
ចំណងជើងនេះត្រូវបានអមជាមួយរូបថតថ្មីៗរបស់គាត់និងព័ត៌មានលម្អិតអំពីការផ្សាយឡាយស្ទ្រីម។
រូបថតទាំងនោះទំនងជាត្រូវបានថតនៅថ្ងៃឈប់សម្រាកក្នុងប្រទេសថៃ ដោយលោកស្រីមូនមើលទៅមានរូបរាងក្មេងជាងវ័យនិងស្លៀកសម្លៀកបំពាក់រលុង។
នៅក្នុងរូបថតខ្លះ លោកស្រីមូនឃើញបួងសក់ទៅក្រោយ ពាក់វ៉ែនតាធំៗ ខណៈគេឃើញគាត់ពាក់វ៉ែនតាតូចនិងមួកក្នុងរូបមួយផ្សេងទៀត។
ទោះបីជាលោកស្រីមូនមិនទាន់បានចែករំលែកថាតើនេះនឹងគ្រាន់តែជាឡាយស្ទ្រីមតែម្តងនឹងចប់ទៅវិញឬថាតើលោកស្រីនឹងមានគម្រោងត្រឡប់មកកាន់វិស័យកម្សាន្តវិញឬយ៉ាងណាក៏ដោយ ក៏វាបានធ្វើឱ្យអ្នកគាំទ្ររំភើបជាខ្លាំង។
អ្នកនិយមលេងអ៊ីនធឺណិតម្នាក់បានសរសេរថា “ខ្ញុំជឿថាជំនាញរបស់អ្នកនឹងនៅតែល្អដូចកាលពីមុន”។
ម្នាក់ទៀតបានសរសេរថា “ខ្ញុំមិនដឹងថាតើ [ព័ត៌មាននៃការវិលមកវិញរបស់គាត់] ពិតឬអត់ទេ ប៉ុន្តែយើងត្រូវតែគាំទ្រមូន”។
បន្ទាប់ពីបញ្ចប់ការសិក្សានៅវិទ្យាល័យ លោកស្រីមូនបានក្លាយជាតួជំនួសនិងជាតួសម្តែងក្នុងរឿងភាគទូរទស្សន៍ជាច្រើន មុននឹងប្តូរមកសម្តែងក្នុងរឿងដុំ ដូចជា រឿង Mr Vampire (១៩៨៥) និង Mr Vampire 2 (១៩៨៦) និងរឿង Hollywood The Protector (១៩៨៥) ដែលសម្តែងដោយជែក គីចាន់៕
លោកស្រី មូន លី ត្រឡប់មកបង្ហាញមុខវិញ ដោយចាប់ផ្តើមនៅលើឡាយស្ទ្រីមនៅថ្ងៃទី ១៥ កញ្ញាខាងមុខ