ប្រែសម្រួល : កញ្ញាដាលីស (ដេល្លីម៉េល) ៖ រដ្ឋាភិបាលអាម៉េរិកមានលក្ខណៈសម្ងាត់សាហាវណាស់ នៅពេលនិយាយដល់ការចែករំលែកអ្វីដែលខ្លួនបានដឹងអំពីជីវិតក្រៅភព។ប៉ុន្តែនៅក្នុងលទ្ធភាពប្រឹងប្រែងមួយដើម្បីឱ្យមានតម្លាភាព ក្រសួងការពារជាតិបានចេញផ្សាយឯកសារថ្មីមួយ ដែលបង្ហាញពី “ចំណុចដែលគេប្រទះឃើញ UFO នៅលើពិភពលោក”។
វារួមបញ្ចូលទាំងផែនទីបង្ហាញពីកន្លែងដែលការប្រទះឃើញភាគច្រើននៃវត្ថុមិនស្គាល់អត្តសញ្ញាណ (UFO) ត្រូវបានកត់ត្រា ដោយផ្អែកលើរបាយការណ៍រវាងឆ្នាំ ១៩៩៦ និង ២០២៣។
ផែនទីនេះបានកើតឡើងភ្លាមៗបន្ទាប់ពីប្រធានមន្ទីរបញ្ចកោណបានទទួលស្គាល់ថា វត្ថុអាថ៌កំបាំងរាប់រយត្រូវបានប្រទះឃើញ “នៅជុំវិញពិភពលោក”។
លោកបណ្ឌិត ស៊ីន កឺកផាទ្រីក (Sean Kirkpatrick) នាយកការិយាល័យដោះស្រាយភាពមិនប្រក្រតីនៃដែនទាំងឡាយ (AARO) របស់មន្ទីរបញ្ចកោណ បាននិយាយថា “យើងបានឃើញ [យានដែក] ទាំងនេះនៅទូទាំងពិភពលោក ហើយយើងឃើញការហោះហើរដ៏គួរឱ្យចាប់អារម្មណ៍យ៉ាងខ្លាំង”។
ផែនទីបានបង្ហាញទីក្រុងណាកាសាគិ និង ហ៊ីរ៉ូស៊ីម៉ា ក្នុងប្រទេសជប៉ុន ឆ្នេរសមុទ្រភាគខាងកើតនិងខាងលិចនៃសហរដ្ឋអាម៉េរិក រួមទាំងរដ្ឋកាលីហ្វ័រញ៉ា ក៏ដូចជាផ្នែកខ្លះនៃមជ្ឈិមបូព៌ា សុទ្ធតែជាចំណុចក្តៅសម្រាប់ការប្រទះឃើញ UFO ។
ការលាតត្រដាងថា ជប៉ុននិងតំបន់ខ្លះនៅមជ្ឈិមបូព៌ា រួមទាំងអ៊ីរ៉ាក់និងស៊ីរីជាចំណុចក្តៅនៃ UFO អាចនឹងបង្កការភ្ញាក់ផ្អើលដល់អ្នកដែលចូលចិត្តតាមដាន UFO ដែលតែងតែភ្ជាប់ការប្រទះឃើញតែនៅសហរដ្ឋអាម៉េរិក។
ជាពិសេស ផែនទីបានកំណត់តំបន់មួយនៅភាគនិរតីប្រទេសជប៉ុន ដោយគ្របដណ្តប់ទីក្រុងណាកាសាគីនិងហ៊ីរ៉ូស៊ីម៉ា ដែលល្បីល្បាញជាគោលដៅនៃការវាយប្រហារដោយគ្រាប់បែកបរមាណូរបស់សហរដ្ឋអាម៉េរិកក្នុងឆ្នាំ ១៩៤៥។
ចំណុចក្តៅមួយទៀតរបស់ជប៉ុនគឺសហគមន៍តូចមួយឈ្មោះ អ៊ីណូម៉ាឈិ (Iinomachi) ក្នុងខេត្តហ្វ៊ូគូស៊ីម៉ា (Fukushima) ដែលគេហៅថា UFO Town។
ទីប្រជុំជនអ៊ីណូម៉ាឈិត្រូវបានគេតុបតែងលម្អដោយផ្ទាំងទស្សនីយភាពក្រៅភពក្នុងកិច្ចប្រឹងប្រែងដើម្បីទាក់ទាញអ្នកគាំទ្រនិងលើកកម្ពស់ខ្លួនឯងជាជម្រកសម្រាប់មនុស្សក្រៅភព។
វាក៏ជាមូលដ្ឋាននៃវិទ្យាស្ថានស្រាវជ្រាវមួយដែលមានឈ្មោះថា International UFO Lab ផងដែរ ដែលបានបើកក្នុងឆ្នាំ ២០២១ និងដឹកនាំដោយអ្នកចូលចិត្តវត្ថុក្រៅភព លោក ថាកេហារុ មីកាមិ (Takeharu Mikami)។
នៅក្នុងខែមិថុនាឆ្នាំនេះ មន្ទីរពិសោធន៍ UFO អន្តរជាតិបានចេញផ្សាយរូបភាពចំនួន ៦ ដែលទំនងជា UFO ដែលត្រូវបានរាយការណ៍ថាបានថតនៅទីក្រុងកូបេ (Kobe) និង ហ្វ៊ូគូស៊ីម៉ា ក្នុងចំណោមតំបន់ផ្សេងទៀត។
រូបទាំងនោះត្រូវបានដកស្រង់ខ្លះៗពីរបាយការណ៍សរុបចំនួន ៤៩៤ ដែលមន្ទីរពិសោធន៍នេះទទួលបានពីប្រជាជនក្នុងប្រទេសជប៉ុននិងក្រៅប្រទេសក្នុងរយៈពេលមួយឆ្នាំ បើទោះបីជារូបភាគច្រើនមើលទៅដូចជាដ្រូន សត្វស្លាប ឬ គ្រាន់តែជាចំណាំងផ្លាតក៏ដោយ។
ផែនទីរបស់រដ្ឋាភិបាលអាម៉េរិកនេះគឺមាននៅក្នុងឯកសារកម្រាស់ប្រាំទំព័រហៅថា “UAP Reporting Trends” ដែលចេញផ្សាយនៅលើវេបសាយថ្មីរបស់ការិយាល័យដោះស្រាយភាពមិនប្រក្រតីនៃដែនទាំងឡាយ (AARO) ដែលជានាយកដ្ឋាន UFO ថ្មីបង្កើតឡើងកាលពីខែកក្កដាឆ្នាំមុន៕
ផែនទីរបស់អាម៉េរិកបង្ហាញការប្រទះឃើញ UFO នៅជុំវិញពិភពលោក
